އިލެކްޓްރިކް ކާރު އުފައްދާ ޓެސްލާ ކުންފުނީގެ ހިއްސާގެ އަގުތައް މި އަހަރު ވަރަށް ބޮޑަށް ވެއްޓުމުން، ދުނިޔޭގެ އެންމެ ބޮޑު މަޖުހަނުގެ ލަގަބު އެ ކުންފުނީގެ ވެރިޔާ އެލޮން މަސްކްއަށް ގެއްލިއްޖެ އެވެ.
ފޯބްސް އަދި ބްލޫމްބާގްއިން ބުނީ މިހާރު ދުނިޔޭގެ އެންމެ ބޮޑު މަހުޖަނަކީ ލަގްޒަނީ ތަކެތި ވިއްކާ އެލްވީއެމްއެޗް ގްރޫޕުގެ ޗީފް އެގްޒެކްޓިވް ބާނާޑް އާނޯލްޓް ކަމަށެވެ.
މަސްކްއަކީ ޓެސްލާގެ ޗީފް އެގްޒެކްޓިވް އަދި އެ ކުންފުނީގެ އެންމެ ބޮޑު ހިއްސާދާރެވެ. ރިޕޯޓުތައް ބުނާ ގޮތުން ކުންފުނީގެ 14 ޕަސެންޓް ހިއްސާ އޮންނަނީ މަސްކް އަށެވެ.
މިދިޔަ އޮކްޓޯބަރު މަަހު އޭނާ ވަނީ 44 ބިލިއަން ޑޮލަރު ހޭދަކޮށްގެން ޓްވިޓާ ގަނެފަ އެވެ. ފޯބްސްއިން ބުނީ މިހާރު މަސްކްގެ މުއްސަނދިކަމުގެ އަގަކީ ގާތްގަނޑަކަށް 178 ބިލިއަން ޑޮލަރު ކަމަށެވެ.
ފްރާންސަށް ނިސްބަތްވާ އުމުރުން 73 އަހަރުގެ އާނޯލްޓްގެ މުއްސަނދިކަމުގެ އަގަކީ 188 ބިލިއަން ޑޮލަރެވެ.
އެނެލިސްޓުން ދެކޭ ގޮތުގައި "މަސްކްގެ ބްރޭންޑަށް" ގެއްލުންވަމުން ދަނީ ޓްވިޓާ ގަތުމަށް ފަހު އަޅަމުންދާ އެކި ފިޔަަވަޅުތަކާ ގުޅިގެންނެވެ.
ޓްވިޓާ ގަންނަން ފައިސާ ހޯދުމުގެ ގޮތުން މަސްކް ވަނީ އެތައް ބިލިއަން ޑޮލަރުގެ އަގުހުރި ޓެސްލާގެ ހިއްސާ ވިއްކައިފަ އެވެ. އެއީ ހިއްސާގެ އަގު ވެއްޓުނު އެއް ސަބަބެވެ.
އޭގެ އިތުރުން އިގްތިސާދު މަޑު ޖެހި އިންޓްރެސްޓް ރޭޓް މަތިވަމުންދާ ވަރަކަށް ޓެސްލާގެ އިލެކްޓްރިކް ކާރުތަކަށް އޮންނަ ޑިމާންޑު ކުޑަވުމުގެ ކަންބޮޑުވުން ވެސް އެބަ އޮތެވެ.
