ދޯހާ، ގަތަރު (ޑިސެމްބަރު 14) - ފީފާ ވޯލްޑް ކަޕްގެ ސެމީ ފައިނަލުގައި މިރޭ ފްރާންސާ ދެކޮޅަށް ނުކުންނައިރު، އެ ޓީމަކީ ދުނިޔޭގެ އެއް ވަނަ ޓީމު ކަމަށާއި އެހެން ނަމަވެސް މި މެޗުން މޮރޮކޯ އަށް ވެސް މޮޅުވުމުގެ ފުރުސަތު އެބައޮތް ކަމަށް އެ ޓީމުގެ ކޯޗު ވަލީދު ރެގްރާގީ ބުނެފި އެވެ.
ވޯލްޑް ކަޕްގެ ފައިނަލުގެ ފުރަތަމަ ޖާގަ ހޯދީ ރޭ ކްރޮއޭޝިއާ ބަލިކުރި އާޖެންޓީނާ އަށެވެ. އާދިއްތަ ދުވަހުގެރޭ ކުޅޭ ފައިނަލުގައި އާޖެންޓީނާއާ ކުޅޭނެ ޓީމެއް ކަނޑައެޅިގެންދާނީ މިރޭ އެންމެ ފަހުގެ ޗެމްޕިއަން ފްރާންސާއި މުބާރާތުގައި ރެކޯޑް ކާމިޔާބީތަކެއް ހޯދަމުން އަންނަ މޮރޮކޯ ކުޅޭ ސެމީ ފައިނަލް މެޗުންނެވެ.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން މޮރޮކޯގެ ކޯޗު ރެގްރާގީ ވަނީ އޭނާގެ އުފަން ގައުމު ކަމަށްވާ ފްރާންސަށް ތައުރީފުކޮށް ވާހަކަ ދައްކައިފަ އެވެ.
ރެގްރާގީ ބުނީ އޭނާ އަކީ އުފަންވި ގައުމަށް ބަލާނަމަ ފްރާންސް ކަމަށާއި އެކަމަކު، ހަވާލުވެ ހުރި ޒިންމާ އަށް ބަލާނަމަ މޮރޮކޯ ގޮވައިގެން ފްރާންސާ ދެކޮޅަށް ނުކުންނާނެ މީހެއް ކަމަށެވެ.
މިދިޔަ އޮގަސްޓް މަހު މޮރޮކޯގެ ކޯޗުކަމާ ހަވާލުވި ރެގްރާގީ އެ ޓީމާ އެކު ނުކުތް މެޗުތަކުން މިހާތަނަށް ބަލިވެފައިނުވެ އެވެ. އޭނާ ބުނީ ސެމީ ފައިނަލުގައި ފްރާންސާ ކުޅޭނީ ވެސް މޮޅުވުމުގެ ރޫހުގައި އެއީ ކުރެވޭނެ ކަމެއް ކަމަށް ގަބޫލުކޮށްގެން ކަމަށެވެ.
"ދުނިޔޭގެ އެއް ވަނަ ޓީމާ ކުޅުމަކީ ޗެލެންޖެއް. އަހަރެމެން މޮރޮކޯ ޓީމަށް ކުޅޭއިރު އިދިކޮޅަށް ކުޅޭ ޓީމެއް ނުބަލައި، މޮޅުވާން ކުޅެން ބޭނުންވަނީ، އަހަރެމެންނަކީ މޮރޮކޯ،" ރެގްރާގީ ބުންޏެވެ.
މޮރޮކޯ އަކީ ވޯލްޑް ކަޕްގެ ސެމީ ފައިނަލަށް ދަތުރުކުރި އެފްރިކާ ބައްރަށް ނިސްބަތްވާ ފުރަތަމަ ގައުމެވެ. މީގެ ކުރިން ކުއާޓާ ފައިނަލުގައި ވާދަކުރި އެފްރިކާގެ ތިން ގައުމެއް ވަނީ އިތުރަށް ކުރިއަށް ނުދެވި މުބާރާތުން ކަޓައިފަ އެވެ. މޮރޮކޯ އިން ސެމީން ފުރުސަތު ހޯދައި، ތާރީހީ ކަމެއް ހާސިލްކުރެވުނަސް، ރެގްރާގީ ހުރީ މި ވަރުން ފުއްދާލާ ގޮތަކަށް ނޫނެވެ.
"އަހަރެމެން ބޭނުން ފައިނަލަށް ދާން. މި ހިސާބަށް އައިސް ސެމީގައި ކުޅެވުނޭ، އެއީ ހިތްހަމަޖެހުމެކޭ ބުނެފައި ދާން ބޭނުމެއް ނޫން،" ރެގްރާގީ ބުންޏެވެ.
"އަދިވެސް އެއް ފަހަރު މިކަން ފާހަގަކޮށްލާނަން. އަހަރެމެން މި ކުޅެނީ ދުނިޔޭގެ އެންމެ މޮޅު ޓީމާކަން ގަބޫލުކުރަން ޖެހޭ. ދެން، މީގެ އޮތް ފުރުސަތުތަކަށް ބަލާއިރު، މިއީ އެންމެ މެޗެއް، އެއް މެޗުން ނަތީޖާ ނެރެވިދާނެކަން އަހަރެމެން މި މުބާރާތުގައި ދައްކައިދީފިން،"
މޮޮރޮކޯ އިން ވަނީ މި ފަހަރުގެ ގްރޫޕް ސްޓޭޖުގައި ބެލްޖިއަމް ބަލިކޮށްފަ އެވެ. ގަދަ 16 ބުރުގައި ގަދަފަދަ ސްޕެއިން ކަޓުވާލިއިރު، މޮރޮކޯ އިން ކުއާޓާގައި ވަނީ ޕޯޗުގަލް ބަލިކޮށްފަ އެވެ.
ތަފާތު ރޫހެއްގައި ކުޅޭ މޮރޮކޯ ކޮޅަށް މި ފަހަރުގެ ވޯލްޑް ކަޕްގައި އެ ޓީމު ކުޅުނު ފަސް މެޗުގެ ތެރެއިން ވަނީ އެންމެ ގޯލެކެވެ. މީގެ ކުރިން ވޯލްޑް ކަޕެއްގައި ބައިކޮޅަށް ގޯލެއް ނުވަދެ ފަސް މެޗު ފުރިހަމަކުރި ދެ ޓީމުން ވެސް ވަނީ ތަށި އުފުލާލައިފަ އެވެ. އެއީ 2006ގެ އިޓަލީ ޓީމާއި 2010ގެ ސްޕެއިން ޓީމެވެ.
ފްރާންސާއި މޮރޮކޯ ކުޅޭ ސެމީ ފައިނަލް މެޗު ފަށާނީ މިރޭ 12 ޖަހާއިރު އެވެ.
