ދޯހާ، ގަތަރު (ޑިސެމްބަރު 14) - ފީފާ ވޯލްޑް ކަޕްގައި މި ފަހަރު އާޖެންޓީނާ އިން ކުޅުނު ފުރަތަމަ މެޗުގައި ސައުދީ އަރަބިއްޔާ އަތުން ބަލިވިއިރު، އެ މެޗަށް ފަހު ދެން ކުޅުނު ކޮންމެ މެޗަކަށް ވެސް އާޖެންޓީނާ އިން ނުކުތީ ފައިނަލެއްގެ ގޮތުގައި ދެކިގެން ކަމަށް މި ފަހަރުގެ މުބާރާތުގެ ފައިނަލުގެ ފުރަތަމަ ޖާގަ ހޯދި އާޖެންޓީނާ ޓީމުގެ ކެޕްޓަން، ލިއޮނަލް މެސީ ބުނެފި އެވެ.
ވޯލްޑް ކަޕްގެ ސެމީ ފައިނަލް ފުރަތަމަ މެޗުގައި ރޭ އާޖެންޓީނާ އިން ވަނީ 2018 ވަނަ އަހަރުގެ ރަނަރަޕް ކްރޮއޭޝިއާ 3-0 އިން ބަލިކޮށް، މި ފަހަރުގެ ފައިނަލުގެ ފުރަތަމަ ޖާގަ ހޯދައިފަ އެވެ.
ވޯލްޑް ކަޕްގެ ތާރީހުގައި އާޖެންޓީނާ އިން ކުޅޭ ހަ ވަނަ ފައިނަލުގައި އަންނަ އާދިއްތަ ދުވަހުގެރޭ ނުކުންނާނެ ޓީމެއް އެނގޭނީ މިރޭ ކުޅޭ ދެ ވަަނަ ސެމީ ފައިނަލަށް ފަހު އެވެ. ދެ ވަނަ ސެމީގައި ކުޅޭނީ އެންމެ ފަހުގެ ޗެމްޕިއަން ފްރާންސާއި މުޅިން އަލަށް ސެމީ އަށް ދަތުރުކުރި މޮރޮކޯ އެވެ.
ރޭ ކްރޮއޭޝިއާ އަތުން އާޖެންޓީނާ މޮޅުވި މެޗުގެ މޮޅު ކުޅުންތެރިއަކަށް ހޮވުނު މެސީ، 35، ވަނީ އެއް ގޯލު ޖެހުމުގެ އިތުރުން އެއް ގޯލު ޖަހަން ފުރުސަތު ވެސް ތަނަަވަސްކޮށްދީފަ އެވެ.
މެޗަށް ފަހު، މީޑިއާ އަށް ދިން އިންޓަވިއުއެއްގައި މެސީ ބުނީ ފައިނަލަށް އައުމުގެ ކުރިން ވެސް އާޖެންޓީނާ އިން މި ފަހަރުގެ މުބާރާތުގައި ގިނަ ފައިނަލްތަކެއް ކުޅެފައިވާ ކަމަށެވެ.
"ފުރަތަމަ މެޗުގައި އަހަރެމެން ބަލިވުން އެއީ ވަރަށް އުނދަގޫ ފައްތަރަކަށް ޓީމު ދިޔަ ހިސާބެއް، 36 މެޗު ބަލިނުވެ އައިސްފައި، މުބާރާތް ފަށަން މި ޖެހުނީ ބައްޔަކުން،" މެސީ ބުންޏެވެ.
"އެކަމަކު، އެ ނަތީޖާގެ ސަބަބުން ޓީމު އެއްބައިވަންތަވެ، ރޫހު ރަނގަޅުވެގެންދިޔަ، ހަގީގަތުގައި ފުރަތަމަ މެޗުގެ އެ ނަތީޖާ އަށް ފަހު ދެން އަހަރެމެން ނުކުތް ކޮންމެ މެޗެއްގައި ވެސް އޮތީ ފައިނަލެއްގެ ވިސްނުން. އަހަރެމެން ފަސް ފައިނަލު ކުޅެފިން، ދެން އޮތީ ބޮޑު ފައިނަލް،"
މެސީ ވަނީ މި ފަހަރުގެ ވޯލްޑް ކަޕްގައި ގިނަ ރެކޯޑްތަކެއް މުގުރާލައި، އަނެއް ބައި ރެކޯޑްތަކާ ހަމަކޮށްފަ އެވެ.
މުގުރާލި ރެކޯޑްތަކަށް ބަލާއިރު، މެސީ އަކީ އާޖެންޓީނާ އަށް ވޯލްޑް ކަޕްގައި އެންމެ ގިނަ ގޯލު ޖަހައިދިން ކުޅުންތެރިޔާ އެވެ. އެ ގޮތުން މެސީ ވަނީ މި ފަހަރުގެ ވޯލްޑް ކަޕްގައި ޖެހި ފަސް ގޯލާ އެކު ޖުމްލަ އެކު، ވޯލްޑް ކަޕްގެ މެޗުތަކުގައި އާޖެންޓީނާ އަށް 11 ގޯލު ޖަހައިފަ އެވެ. ކުރިން އެ ރެކޯޑް އޮތީ 10 ގޯލު ޖެހި ފޯވާޑް، ގަބްރިއެލް ބަޓިސްޓޫޓާ އަތުގަ އެވެ.
ދެން، މެސީ މުގުރާލި އެއް ރެކޯޑަކީ ހަތަރު ވޯލްޑް ކަޕެއްގައި ގޯލެއް ޖެހުމުގެ އިތުރުން ގޯލެއް ޖަހަން ފުރުސަތު ތަނަވަސްކޮށްދިން ކުޅުންތެރިޔާގެ ރެކޯޑެވެ. އަދި ރޭ މެސީ ކުޅުނު މެޗަކީ ވޯލްޑް ކަޕްގައި އޭނާގެ 25 ވަނަ މެޗެެވެ. މިއާ އެކު ޖަރުމަނުގެ ލެޖެންޑަރީ މިޑްފީލްޑަރު، ލޯތާ މަތައިސް ވޯލްޑް ކަޕްގައި އެންމެ ގިނަ މެޗު ކުޅެގެން ހެދި ރެކޯޑާ ހަމަކުރީ އެވެ. މެސީ ފައިނަލުގައި ކުޅެފިނަމަ މަތައިސްގެ ރެކޯޑް މުގުރާލެވޭނެ އެވެ.
މެސީ ބުނީ މެޗަކަށް ފަހު މެޗެއް އޭނާގެ ކޮންފިޑެންސް ރަނގަޅުވަމުން އަންނަ ކަމަށާއި ފައިނަލަށް ނުކުންނައިރު ވެސް އޮތީ ތަފާތު ހިތްވަރެއް ކަމަށެވެ.
ދުނިޔޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ ކަމަށް ގިނަ ބަޔަކު އެއްބަސްވާ މެސީގެ ކެރިއަރަށް މަދުވަނީ ވޯލްޑް ކަޕްގެ ތަށްޓެވެ. މެސީ ވަނީ މީގެ ކުރިން 2014 ވަނަ އަހަރުގެ ވޯލްޑް ކަޕް ފައިނަލުގައި ވާދަކޮށްފަ އެވެ. އެ ފަހަރު އާޖެންޓީނާ ވަނީ 1-0 އިން ޖަރުމަނު އަތުން ބަލިވެފަ އެވެ.
