މޯލްޑިވްސް ބޯޓިން އެވޯޑްސްގެ އަހަރުގެ އެންމެ މޮޅު ބޯޓު ޑިޒައިންގެ އެވޯޑު އަލްޝާލީ މެރިން މޯލްޑިވްސް އަށް ލިބިއްޖެ އެވެ.
ދެހާސް ސާދަވަނަ އަހަރުން ފެށިގެން މޯލްޑިވްސް ބޯޓިން އެސޯސިއޭޝަނުން ދެމުން އަންނަ ބޯޓިން އެވޯޑަކީ ރާއްޖޭގައި ކަނޑު އުޅަނދުގެ ސިނާއަތުގައި ހަރަކާތްތެރިވާ އެކި ފަރާތްތަކުގެ އަގު ވަޒަންކޮށް އެ ފަރާތްތަކަށް ހިތްވަރު ދިނުމުގެ ގޮތުން ދޭ އެވޯޑުތަކެކެވެ. މިއީ މިދާއިރާއިން ރާއްޖޭގައި ދޭ ހަމައެކަނި އެވޯޑެވެ.
މިއަހަރުގެ ބޯޓިން އެވޯޑްސްގައި އެންމެ މޮޅު ބޯޓު ޑިޒައިންގެ އިތުރުން ފަސް ފޫޓާއި ދިހަ ފޫޓާ ދެމެދުގެ އެންމެ މޮޅު ފައިބަރު އުޅަނދުގެ އެވޯޑާއި 15 ފޫޓާއި 45 ފޫޓާ ދެމެދުގެ އެންމެ މޮޅު ފައިބަރު އުޅަނދުގެ އެވޯޑު އަލްޝާލީ މޯލްޑިވްސް އަށް ލިބުނެވެ.
ތިލަފުށީގައި ހުންނަ އަލްޝާލީގެ ބޯޑުޔާޑު
އެންމެ މޮޅު ޑިޒައިންގެ އެވޯޑު އެ ކުންފުންޏަށް ލިބުނީ ދާދި ފަހުން ތައާރަފުކުރި، ކެޓް އެކްސްޕްރެސް 55 ގެ ޑައިޒައިން އަށެވެ.
އެއީ ކެޓް ހަލް ފަރުމާގެ ބޯޓެކެވެ. ރާއްޖޭގައި އާންމުކޮށް ބޭނުންކުރާ "މޮނޯ" ހަލްއަށް ވުރެ "ކެޓް" ހަލްތަކުގެ "ސްޓެބިލިޓީ" ރަނގަޅު ކަމަށް މެރިން އިންޑަސްޓްރީގެ ގިނަ މީހުން ގަބޫލުކުރާ ކަމަށެވެ.
ކެޓް އެކްސްޕްރެސް 55
- ދިގުމިން – 55 ފޫޓު
- ސީޓިން ކެޕޭސިޓީ – ގިނަވެގެން 70 ގޮނޑި
- އިންޖީނު – 1400 ހޯސްޕަވަރުގެ އިންބޯޑް ޑީސަލް އިންޖީނެއް
- ދުވެލި- 32 ނޮޓު
- މި ބޯޓުގައި ގިނަވެގެން ޖެހެނީ 70 ގޮނޑި އެވެ. ބޭނުންނަމަ ވީއައިޕީ ކޮންސެޕްޓަށް ބޭނުން ގޮތަކަށް ކަސްޓަމައިޒް ކޮށްލެވެ އެވެ.
ބޯޓިން އެވޯޑުތައް އަލްޝާލީ މެރިންއަށް ލިބުމަކީ ލިބުނު ވަރަށް ބޮޑު ފަހުރެއް ކަމަށް އެ ކުންފުނީގެ ޖެނެރަލް މެނޭޖަރު، އިސްމާއިލް ޝަރީފް ވިދާޅުވި އެވެ.
އަލްޝާލީ މެރިން މޯލްޑިވްސްއަކީ ރާއްޖޭގެ ކޯސްޓްލައިން އިންވެސްޓްމެންޓްސް ޕްރައިވެޓް ލިމިޓެޑާއި ޔޫއޭއީގެ އަލްޝާލީ މެރިން ދުބާއީއާ ދެމެދު އެކުލަވާލާފައިވާ ޖޮއިންޓް ވެންޗާ ކުންފުންޏެކެވެ. އަލްޝާލީގެ މައި ކުންފުނީގެ މަސައްކަތްތައް 1979 ގައި ފެށިއިރު މެދުއިރުމަތީގައި އެ ކުންފުންޏަކީ ފައިބާގްލާސް ބޯޓާއި ޔޮޓު އުފެއްދުމުގައި ނަން ހިނގާ ކުންފުންޏެކެވެ.
