ރާމަﷲ، ފަލަސްތީން (ޑިސެމްބަރު 12) - އިޒްރޭލުގެ ސިފައިން ހުޅަނގު އައްސޭރީގައި ހިންގި އޮޕަރޭޝަނެއްގެ ތެރެއިން ގެޔެއްގެ ފުރާޅުމަތީގައި އިން ފަލަސްތީނުގެ އަންހެން ކުއްޖެއްގެ ގަޔަށް ބަޑި ޖަހައި މަރާލައިފި އެވެ.
އިޒްރޭލް ސިފައިން ބުނީ އެ ސަރަހައްދުގައި ހަމަލާ ބަދަލު ކުރީ ތުހުމަތު ކުރެވޭ ބަޔަކާ ދެކޮޅަށް ކަމަށެވެ. އޭގެ އިތުރުން "ފަލަސްތީނުގެ އަންހެނަކު މަރުވިކަމުގެ" ރިޕޯޓު ލިބުނު ކަމަށާއި އެކަން ބަލަމުންދާ ކަމަށް ބުންޏެވެ.
ފަލަސްތީނުގެ ހެލްތު މިނިސްޓްރީން ބުނީ މަރުވީ ޖަނާ ޒަކަރްނާ ނަމަކަށް ކިޔާ އުމުރުން 16 އަހަރުގެ ކުއްޖެއް ކަމަށެވެ. އެ ކުއްޖާ ދިރިއުޅުނީ ހުޅަނގު އައްސޭރީގެ ދެކުނުގައި އޮންނަ ޖެނިން ސިޓީގަ އެވެ.
ފަލަސްތީނުގެ ރަސްމީ ނިއުސް އެޖެންސީ ވަފާއިން ބުނީ ޒަކަރްނާ މަރުވީ ބޮލަށް ބަޑި ޖެހުމުން ކަމަށެވެ. އޭނާ މަރުވެފައި އޮއްވާ ފެނުނީ އިޒްރޭލް ސިފައިން އެ ސަރަހައްދުން ދިޔުމުން އާއިލާއިން ފުރާޅަށް އެރި ވަގުތު އެވެ.
ފަލަސްތީނުގެ ރެޑް ކްރެސެންޓުން ބުނީ އިޒްރޭލް ސިފައިން ހިންގި އޮޕަރޭޝަނުގައި ފަލަސްތީނުގެ ތިން މީހުންނަށް އަނިޔާވި ކަމަށެވެ.
މި އަހަރު ހިނގި އެކި ކުރިމަތިލުންތަކުގައި ގުދުސް އާއި ހުޅަނގު އައްސޭރި އަދި އިޒްރޭލުން ހިފައިގެން އުޅޭ ފަލަސްތީނުގެ ސިޓީތަކުން 150 ފަލަސްތީން މީހުންނާއި 26 އިޒްރޭލް މީހުން މަރުވި އެވެ.
