ދޯހާ، ގަތަރު (ޑިސެމްބަރު 11) - ގަތަރުގައި މިހާރު ކުރިއަށްދާ ފީފާ ވޯލްޑް ކަޕްގެ ކުއާޓާ ފައިނަލުގައި މިދިޔަ ހުކުރު ދުވަހުގެރޭ އާޖެންޓީނާ އާއި ނެދަލެންޑްސް ބައްދަލުކުރި މެޗުގެ މައްސަލަތަކެއް ފީފާ އިން ބަލަން ފަށައިފި އެވެ.
ކުއާޓާ ފައިނަލުގައި ނެދަލެންޑްސް އާއި އާޖެންޓީނާ އިން ވާދަކުރި މި މެޗުގައި ފުރަތަމަ ދެ ގޯލު ޖަހައި، އާޖެންޓީނާ އިން ލީޑުނެގި އެވެ. މި ލަނޑުތައް ޖެހީ ނަަހުއެލް މޮލީނާ އާއި ލިއޮނަލް މެސީ އެވެ. އެކަމަކު، މެޗުގެ ފަހު ވަގުތު ނެދަލެންޑްސް އިން ދެ ގޯލު ޖަހައި، 2-2 އިން އެއްވަރުކުރި އެވެ. މި ދެ ލަނޑަކީ ވެސް ބަދަލަކަށް ކުޅެން އެރި ފޯވާޑް، ވައުޓް ވެގްހޯސްޓް ޖެހި ދެ ގޯލެވެ. އޭނާ، އެއްވަރުކޮށްދިން ލަނޑު ޖެހީ އިތުރު ވަގުތުގެ ވެސް ފަހު މިނިޓްގަ އެވެ.
ނެދަލެންޑްސް ޕެނަލްޓީ ޖަހައިގެން، 4-3 އިން ކަޓުވާލައި އާޖެންޓީނާ އިން ވޯލްޑް ކަޕްގެ ސެމީ ފައިނަލުން ޖާގަ ހޯދި މި މެޗުގައި ދެ ޓީމުގެ ކުޅުންތެރިންނާއި އޮފިޝަލުންގެ މެދުގައި ގިނަ ބަހުގެ ހަމަލާތަކެއް ބަދަލުކުރި އެވެ. ހަމަނުޖެހުންތަކެއް ވެސް ހިނގި މި މެޗު ނިންމާލަން ޖެހުނީ ވެސް ވަރަށް ހޫނުވި ހާލަތްތަކަކަށް ފަހު އެވެ.
އާޖެންޓީނާ އާއި ނެދަލެންޑްސްގެ މި މެޗުގައި ޖުމްލަ އެކު 18 ކާޑު ދެއްކިއިރު، މެޗުގެ ރެފްރީ، ސްޕެއިންގެ އެންޓޯނިއޯ މަޓޭއު ލަހޯޒް އަށް، ދެ ޓީމުން ވެސް ވަރަށް ބޮޑަށް ފާޑުކިއެވެ. އެ ގޮތުން އާޖެންޓީނާގެ ކެޕްޓަން, މެސީ ބުނީ މި ލެވަލްގެ މެޗަކަށް ލަހޯޒް ފިޓެއް ނޫން ކަމަށެވެ.
ނެދަލެންޑްސްގެ ކޯޗު ލުއީ ވެން ހާލް ވެސް ވަނީ ރެފްރީ، ލަހޯޒް އަތުން މެޗުގެ ކޮންޓްރޯލް ދިއުމަކީ މެޗަށް ވަރަށް ބޮޑަށް އަސަރުކުރި ކަމެއް ކަމަށް ބުނެފަ އެވެ.
ފީފާ އިން ވަނީ ނެދަލެންޑްސް އާއި އާޖެންޓީނާ މެޗުގެ ރިޕޯޓްތަކަށް ބެލުމަށް ފަހު، އިތުރަށް ތަހުގީގުކުރަން ޖެހޭ ކަންކަން ބަލަން ޖެހޭ ކަމަށް ނިންމައިފަ އެވެ. އެ ގޮތުން، ފީފާ އިން އާޖެންޓީނާގެ ކުޅުންތެރިއަކާއި އޮފިޝަލެއްގެ މައްސަލަ ބަލަން ނިންމާފައިވާއިރު، ނެދަލެންޑްސް ޓީމުގެ ބައެއް އަމަލުތައް ހުރި ގޮތް ވެސް ތަހުގީގުކުރާ މައްސަލަތަކުގެ ތެރޭގައި ހިމަނާފައިވެ އެވެ.
މި ފަހަރުގެ ވޯލްޑް ކަޕާ ގުޅުން ހުރި މައްސަލަތައް ބަލަން ފީފާގެ ޑިސިޕްލިނަރީ ކޮމިޓީން ވަނީ ވަކި ޕެނަލެއް ވެސް ހާއްސަކޮށްފަ އެވެ. އެހެންކަމުން، ނެދަލެންޑްސް އާއި އާޖެންޓީނާ މެޗުގައި ހިނގާދިިޔަ މި ކަންކަމުގައި ފިޔަވަޅު އަޅަންޖެހޭ ކަމެއް އޮވެއްޖެނަމަ ފީފާ އިން ވަރަށް އަވަހަށް އެކަމެއް ނިންމާނެ ކަމަށް ބެލެވެ އެވެ.
