މޮސްކޯ، ރަޝިއާ (ޑިސެމްބަރު 8) - އެމެރިކާގައި ބަންދުކޮށްފައި ހުރި ރަޝިއާގެ ހަތިޔާރު ވިއްކާ ވިކްޓާ ބައުޓް މިނިވަން ކުރުމުން، ބަދަލެއްގެ ގޮތުގައި ރަޝިއާގައި ބަންދުކޮށްފައި ހުރި އެމެރިކާގެ ބާސްކެޓްބޯޅަ ތަރި ބްރިޓްނީ ގްރައިނާ މިނިވަންކޮށްފި އެވެ.
"ޑިސެމްބަރު، 8، 2022 ގައި އަބޫ ދާބީ އެއާޕޯޓުގައި ރަޝިއާގެ ވިކްޓާ ބައުޓް އާއި އެމެރިކާގެ ބްރިޓްނީ ގްރައިނާ ކާމިޔާބުކަމާ އެކު ބަދަލުކުރެވުނު،" ރަޝިއާ ފޮރިން މިނިސްޓްރީއިން ނެރުނު ބަޔާނެއްގައި ބުންޏެވެ.
ރަޝިއާއިން ބުނީ ބައުޓް މިނިވަން ކުރުމަށް އެމެރިކާއާ އެކު މަޝްވަރާ ކުރަމުން ދާތާ "ގިނަ ދުވަސްތަކެއް ވެއްޖެ" ކަމަށާއި އޭނާ ހިމެނޭ އެއްވެސް މަޝްވަރާއެއްގައި ބައިވެރިނުވާނެ ކަމަށް އެމެރިކާއިން އެންމެ ފުރަތަމަ ބުނި ކަމަށެވެ.
އެމެރިކާގައި ބައުޓް ހައްޔަރުކޮށް 25 އަހަރަށް ޖަލަށް ހުކުމް ކުރީ 2012 ގަ އެވެ. އޭނާގެ މައްޗަށް ތުހުމަތު ކުރީ ދުނިޔޭގައި ހިނގާ ހަމަނުޖެހުންތަކުގައި އެކި ފަރާތްތަކަށް ހަތިޔާރު ފޯރުކޮށްދޭ ކަމަށެވެ.
ގްރައިނާ ހައްޔަރު ކުރީ މިދިޔަ ފެބްރުއަރީ މަހު ޔޫކްރެއިން ހަނގުރާމަ ފެށުމުގެ ކުޑަ ދުވަސްކޮޅެއް ކުރިންނެވެ. އޭނާ ނުވަ އަހަރަށް ޖަލަށް ހުކުމް ކުރީ ކެނެބިސް ގެންގުޅުމުގެ ކުށް ސާބިތުވުމުންނެވެ.
ގްރައިނާއަކީ ދެ ފަހަރު އޮލިމްޕިކް ރަން މެޑަލް ހޯދާފައިވާ ދުނިޔޭގެ އެންމެ މޮޅު ބާސްކެޓްބޯޅަ ކުޅުންތެރިންގެ ތެރޭގައި ހިމެނޭ އެތްލީޓެކެވެ.
އޭނާ ހައްޔަރު ކުރީ މިދިޔަ ފެބްރުއަރީ މަހު މޮސްކޯ ކައިރީގައި ހުންނަ އެއާޕޯޓަކުންނެވެ. އޭނާގެ ލަގެޖުގެ ތެރެއިން ފެނުނީ ކެނެބިސް ތެޔޮ ހުރި ވޭޕް ކާޓްރިޖްތަކެކެވެ. އޭނާ ރަޝިއާއަށް ދިޔައީ އެމެރިކާގެ އޯފް ސީޒަންގައި ބާސްކެޓްބޯޅަ ކުޅުމަށެވެ.
ގްރައިނާ ހަައްޔަރު ކުރިތާ މާ ގިނަ ދުވަސްތަކެއް ނުވަނީ ޔޫކްރެއިން ހަނގުރާމަ ފަށައި، އެމެރިކާ އާއި ރަޝިއާގެ ޑިޕްލޮމެސީގެ ތެރެއަށް އޭނާގެ މައްސަލަ ވަނެވެ.
