ފެނުން ހަކަތަ އުފެއްދުމާއި ސީދާ އިންވެސްޓްމަންޓް އިތުރު ކުރުން ފަދަ ގިނަ ކަންކަމުގައި ޗައިނާ އާއި ސައުދީ އަރަބިއްޔާއާ ދެމެދު އެއްބަސްވުންތަކެއްގައި ސޮއިކޮށްފި އެވެ.
ސައުދީ ޕްރެސް އެޖެންސީ (އެސްޕީއޭ) އިން ބުނީ ޗައިނާގެ ރައީސް ޝީ ޖިންޕިން އެ ގައުމަށް ކުރައްވަމުންދާ ދަތުރުފުޅުގައި ވަލީ އަހުދު އަމީރު މުހައްމަދު ބިން ސަލްމާންއާ ބައްދަލުކުރެއްވީ ބުރާސްފަތި ދިވަހު އަލް ޔަމާމާ ގަނޑުވަރުގައި ކަމަށެވެ.
އެ ތަނުގައި ދެ ލީޑަރުން ވަނީ މުހިއްމު ސަރަހައްދީ މައްސަލަތަކާއި ބައިނަލްއަގްވާމީ ގޮންޖެހުންތައް އަދި ދެ ގައުމު ގުޅިގެން ކުރިއެރުން ހޯދޭނެ ގޮތްތަކާ ބެހޭ މަޝްވަރާ ކުރައްވައިފަ އެވެ.
ދެ ގައުމުގެ މެދުގައި އެއްބަސްވުންތަކުގައި ސޮއިކުރީ އެ ބައްދަލުވުމަށް ފަހުގަ އެވެ. ފެނުން ހަކަތަ އުފެއްދުމާއި އިންވެސްޓްމަންޓުގެ އިތުރުން ޗައިނާ ބަސް ދަސްކޮށްދިނުމާ ގުޅޭ އެއްބަސްވުންތަކުގައި ސޮއިކުރި އެވެ.
ވަލީ އަހުދުގެ އިތުރުން ޝީ އާއި ރަސްގެފާނު ސަލްމާން ބިން އަބްދުލް އަޒީޒް ވެސް ބައްދަލުކުރެއްވީ ބުރާސްފަތި ދުވަހު އަލް ޔަމާމާ ގަނޑުވަރުގަ އެވެ.
ރަސްގެފާނާއި ޗައިނާގެ ރައީސް ވަނީ ދެ ގައުމުގެ ސްޓްރެޓެޖިކް ޕާޓްނާޝިޕް ފުޅާކުރުމާ ގުޅޭ ބޮޑު އެއްބަސްވުމެއްގައި ސޮއިކުރައްވައިފަ އެވެ.
އޭގެ ފަހުން އޮތް ހަފްލާއެއްގައި ކިންގް ސައުދް ޔުނިވާސިޓީއިން ވަނީ ޝީއަށް އޮނޮރަރީ ޑޮކްޓަރޭޓް އެވޯޑް އަރުވައިފަ އެވެ.
ސައުދީ އަރަބިއްޔާ އާއި ޗައިނާއާ ދެމެދު މަޝްވަރާ ކުރުމުގެ އިތުރުން ޗައިނާ-ގަލްފް ސަމިޓާއި ޗައިނާ-އަރަބި ސަމިޓުގައި ވެސް ޝީ ބައިވެރިވެވަޑައިގަންނަވާނެ އެވެ.
