ސައުދީ އަރަބިއްޔާ ދެމިއޮންނާނީ ޗައިނާއަށް އިތުބާރު ކުރެވޭ އަދި ބަރޯސާވެވޭ ހަކަތައިގެ މުހިއްމު ބައިވެރިއެއްގެ ގޮތުގައި ކަމަށް ސައުދީގެ އެނާޖީ މިނިސްޓަރު އަމީރް އަބްދުލްއަޒީޒް ބިން ސަލްމާން ވިދާޅުވެއްޖެ އެވެ.
ޗައިނާގެ ރައީސް ޝީ ޖިންޕިން ވަނީ ތިން ދުވަހުގެ ދަތުރުފުޅެއްގައި ބުދަ ދުވަހު ރިޔާދަށް ވަޑައިގެންފަ އެވެ. ސައުދީ ޕްރެސް އެޖެންސީ (އެސްޕީއޭ) އަށް ދެއްވި އިންޓަވިއުއެއްގައި އަމީރު އަބްދުލްއަޒީޒް ވިދާޅުވީ ދުނިޔޭގެ ތެލުގެ މާކެޓަށް ބޮޑެތި ލޮޅުންތައް ނައިސް އޮންނަނީ ޗައިނާ އާއި ސައުދީ އަރަބިއްޔާގެ މަސައްކަތުން ކަމަށެވެ.
ހަކަތަ އެންމެ ގިނައިން ބޭނުންކުރާ ގައުމަކީ ޗައިނާ އެވެ. އަދި ހަކަތަ އެންމެ ގިނައިން އެކްސްޕޯޓް ކުރާ ގައުމަކީ ސައުދީ އަރަބިއްޔާ އެވެ.
ބުދަ ދުވަހު ސައުދީ އަރަބިއްޔާއަށް ވަޑައިގެން ޝީ ވިދާޅުވީ ދެ ގައުމުގެ މެދުގައި އޮންނަ ސަމިޓާއި ޗައިނާ އާއި ގަލްފު ގައުމުތަކާ ދެމެދު އޮންނަ ސަމިޓުގެ ސަބަބުން ގުޅުންތައް ވަރުގަދަ ވާނެ ކަމަށެވެ.
މުހިއްމު ކަންކަމާ ގުޅޭ ގޮތުން ރަސްގެފާނު ސަލްމާން އަދި ވަލީ އަހުދު އަމީރު މުހައްމަދު ބިން ސަލްމާންއާ އެކު މަޝްވަަރާ ކުރައްވާނެ ކަމަށް ޝީ ވިދާޅުވި އެވެ. މިއީ 2016 ވަނަ އަހަރަށް ފަހު ޝީ ސައުދީއަށް ކުރައްވާ ފުރަތަމަ ދަތުރުފުޅެވެ.
އެސްޕީއޭއިން ރިޕޯޓުކުރާ ގޮތުގައި މި ދަަތުރުގެ ތެރެއިން ދެ ގައުމުގެ މެދުގައި 20 އަށް ވުރެ ގިނަ އެއްބަސްވުމުގައި ސޮއިކުރާނެ އެވެ. އެއީ 29.26 ބިލިއަން ޑޮލަރުގެ އަގުހުރި އެއްބަަަސްވުންތަކެކެވެ.
ޗައިނާގެ ރައީސް ސައުދީ އަރަބިއްޔާއަށް ދަތުރު ކުރައްވަން ނިންމެވި އިރު، ތެލުގެ މައްސަލައިގައި ސައުދީ އަރަބިއްޔާ އާއި އެމެރިކާއާ ދެމެދު ބޮޑު ނުތަނަވަސްކަމެއް އެބަ އޮތެވެ.
އެމެރިކާއިން ހިތްހަމަނުޖެހުނީ ތެޔޮ އުފައްދާ ގައުމުތައް ހިމެނޭ އޯޕެކް+ ގްރޫޕުން ދުވާލަކު އުފައްދާ ތެޔޮ ފީފާގެ އަދަދު މަދުކުރަން ނިންމުމުންނެވެ. މިދިޔަ އޮކްޓޯބަރު މަހު އެ ނިންމުމާ ގުޅިގެން އެމެރިކާއިން ބުނީ އެއީ ޔޫކްރެއިން ހަނގުރާމައިގައި "ރަޝިއާ ފަޅިއަށް އެރުން" ކަމަށެވެ.
އެމެރިކާ އާއި ހުޅަނގުގެ އެހެން ގައުމުތަކުގެ ކަންބޮޑުވުންތަކަށް ބެލުމަށް ފަހު މިދިޔަ އާދީއްތަ ދުވަހު ވެސް އޯޕެކް+ އިން ނިންމީ އޮކްޓޯބަރު މަހުގެ ނިންމުން ބަދަލު ނުކުރުމަށެވެ.
ސައުދީ އަރަބިއްޔާގެ ސާފު ނުކުރާ ތެޔޮ ގަންނަ އެންމެ ބޮޑު ކަސްޓަމަރަކީ ޗައިނާ އެވެ. ސައުދީއިން ބޭރު ކުރާ ތެލުގެ ހަތަރު ބައި ކޮށްފައި އެއް ބައި ގަންނަނީ ޗައިނާއިންނެވެ.
