ރިޔާދް، ސައުދީ އަރަބިއްޔާ (ޑިސެމްބަރު 6) - ޗައިނާގެ ރައީސް ޝީ ޖިންޕިން ތިން ދުވަހުގެ ދަތުރުފުޅެއްގައި ބުދަ ދުވަހު ސައުދީ އަރަބިއްޔާއަށް ވަޑައިގަންނަވާނެ އެވެ.
މިއީ 2016 ވަނަ އަހަރަށް ފަހު ޝީ ސައުދީއަށް ކުރައްވާ ފުރަތަމަ ދަތުރުފުޅެވެ. މި ދަތުރުފުޅުގައި ރަސްގެފާނު ސަލްމާންއާ ބައްދަލުކުރައްވާނެ އެވެ.
ސައުދީ ޕްރެސް އެޖެންސީ (އެސްޕީއޭ) އިން ބުނީ ދެ ގައުމުގެ މެދުގައި އޮންނަ ސަމިޓު ރިޔާސަތު ބަލަހައްޓަވާނީ ރަސްގެފާނު ކަމަަށެވެ. ވަލީ އަހުދު އަމީރު މުހައްމަދު ބިން ސަލްމާން ވެސް އެ ސަމިޓުގައި ބައިވެރިވެވަޑައިގަންނަވާނެ އެވެ.
އޭގެ އިތުރުން މެދުއިރުމަތީގެ ހަ ގައުމު ހިމެނޭ ގަލްފް ކޯޕޮރޭޝަން ކައުންސިލް (ޖީސީސީ) އާއި ޗައިނާއާ ދެމެދު އޮންނަ ސަމިޓެއްގައި ވެސް ޝީ ބައިވެރިވެވަޑައިގަންނަވާނެ އެވެ.
ޗައިނާގެ ރައީސް ސައުދީ އަރަބިއްޔާއަށް ދަތުރު ކުރައްވަން ނިންމެވި އިރު، ތެލުގެ މައްސަލައިގައި ސައުދީ އަރަބިއްޔާ އާއި އެމެރިކާއާ ދެމެދު ބޮޑު ނުތަނަވަސްކަމެއް އެބަ އޮތެވެ.
އެމެރިކާއިން ހިތްހަމަނުޖެހުނީ ތެޔޮ އުފައްދާ ގައުމުތައް ހިމެނޭ އޯޕެކް+ ގްރޫޕުން ދުވާލަކު އުފައްދާ ތެޔޮ ފީފާގެ އަދަދު މަދުކުރަން ނިންމުމުންނެވެ. މިދިޔަ އޮކްޓޯބަރު މަހު އެ ނިންމުމާ ގުޅިގެން އެމެރިކާއިން ބުނީ އެއީ ޔޫކްރެއިން ހަނގުރާމައިގައި "ރަޝިއާ ފަޅިއަށް އެރުން" ކަމަށެވެ.
އެމެރިކާ އާއި ހުޅަނގުގެ އެހެން ގައުމުތަކުގެ ކަންބޮޑުވުންތަކަށް ބެލުމަށް ފަހު މިދިޔަ އާދީއްތަ ދުވަހު ވެސް އޯޕެކް+ އިން ނިންމީ އޮކްޓޯބަރު މަހުގެ ނިންމުން ބަދަލު ނުކުރުމަށެވެ.
ސައުދީ އަރަބިއްޔާގެ ސާފު ނުކުރާ ތެޔޮ ގަންނަ އެންމެ ބޮޑު ކަސްޓަމަރަކީ ޗައިނާ އެވެ. ސައުދީއިން ބޭރު ކުރާ ތެލުގެ ހަތަރު ބައި ކޮށްފައި އެއް ބައި ގަންނަނީ ޗައިނާއިންނެވެ.
