އިރާނުގެ ފުޓްބޯޅަ ލެޖެންޑް އަލީ ދާއީގެ ގަހަނާ ވިއްކާ ފިހާރަ އާއި ރެސްޓޯރެންޓު ބަންދުކޮށްފި އެވެ.
ބައިނަލްއަގްވާމީ ފުޓްބޯޅައިގައި ދާއީ ޖެހި 109 ގޯލް ވަރަށް ފަހަކާ ޖެހެންދެން އޮތީ ރެކޯޑެއްގެ ގޮތުގަ އެވެ. އެ ރެކޯޑް މުގުރާލީ ޕޯޗުގަލްގެ ކްރިސްޓިއާނޯ ރޮނާލްޑޯ އެވެ.
އިރާނުގެ ނޫސްތަކުން ބުނީ ވެރިރަށް ތެހްރާންގެ މަގްބޫލް ސަރަހައްދެއްގައި ހުންނަ ދާއީގެ ރެސްޓޯރެންޓާއި ފިހާރަ ބަންދު ކުރަން ކޯޓުން އަމުރުކޮށްފައިވާ ކަމަށެވެ.
"އިންގިލާބާ ދެކޮޅު ގްރޫޕުތަކާ ގުޅިގެން ސުލްހައަށް ހުރަސް އަޅަން އޮންލައިންކޮށް މަސައްކަތްކޮށްފައި ވާތީ ނޫރް ޖުވެލްރީ ގެލެރީ ބަންދުކުރުމުގެ އަމުރެއް ނެރުނު،" އިސްނާ ނިއުސް އެޖެންސީން ބުންޏެވެ.
އޭގެ އިތުރުން ދާއީއާ ގުޅުން ހުރި ރެސްޓޯރެންޓް ބަންދު ކުރަން ވެސް އަމުރު ނެރުނެވެ. ނަމަވެސް ނޫސްތަކުގައި އެ ރެސްޓޯރެންޓާ ގުޅޭ ތަފްސީލެއް ނެތެވެ.
މިދިޔަ ހަފުތާގައި ދާއީ ބުނީ އިރާނުގައި މިހާރު ކުރަމުންދާ މުޒާހަރާތައް ތާއީދު ކުރުމުން އޭނާއަށް ތަފާތު އެކި އިންޒާރުތައް ލިބެމުންދާ ކަމަށެވެ.
ސެޕްޓެމްބަރު މަހުން ފެށިގެން މުޒާހަރާ ކުރަމުން ދަނީ ބުރުގާ ނާޅާ ހުރުމުން ހައްޔަރު ކުރި ޒުވާން އަންހެނަކު މަރުވި މައްސަލަައިގަ އެވެ.
މުޒާހަރާތަކާ ގުޅުން ހުރި އެތައް ހާސް މީހުން ހައްޔަރު ކުރަމުންދާ އިރު އޭގެ ތެރޭގައި ފުޓްބޯޅަ ކުޅުންތެރިންނާއި އެހެން ސެލެބްރިޓީން ހިމެނެ އެވެ.
ދާއީއަކީ 1998 ވަނަ އަހަރުގެ ފީފާ ވޯލްޑް ކަޕްގައި އިރާނުން 1-2 އިން އެމެރިކާ ބަލިކުރި މެޗުގައި ކުޅުނު ކުޅުންތެރިއެކެވެ. އޭނާ ވަނީ ޖަރުމަނު ލީގުގައި ބަޔާން މިޔުނިކަށް ވެސް ކުޅެފަ އެވެ.
