އިރާނުގައި ބުރުގާ އެޅުން މަޖުބޫރު ކުރަން ހާއްސަ "މޮރަލިޓީ" ފުލުހުންގެ ޔުނިޓް އުވާލައިފި އެވެ.
ބުރުގާ އަޅަން މަޖުބޫރު ކުރުމާ ދެކޮޅަށް މިދިޔަ ސެޕްޓެމްބަރު މަހު މުޒާހަރާ ފެށީ ބުރުގާ ނާޅާ ހުރުމުން ހައްޔަރު ކުރި ޒުވާން އަންހެނަކު މަރުވި މައްސަލައިގަ އެވެ.
މުޒާހަރާގެ ބައިވެރިން ބުރުގާ އަންދައި، އިސްތަށިގަނޑު ބުރިކޮށް ސަރުކާރާ ދެކޮޅަށް ޝުއޫރު ފާޅުކުރަމުންދެ އެވެ. ގިނަ ބަޔަކު މިހާރު އާއްމު ދިރިއުޅުމުގައި ވެސް ބުރުގާ ނާޅަ އެވެ.
"މޮރަލިޓީ ފުލުހުންނަކީ ޖުޑިޝަރީއާ އެއްވެސް ގުޅުމެއް އޮތް ބައެއް ނޫން. އެހެންވީމާ އެ ޔުނިޓް އުވާލައިފިން،" އެޓޯނީ ޖެނެރަލް މުހައްމަދު ޖައުފަރު މޮންތަޒޭރީ ވިދާޅުވި އެވެ.
އިރާނުގެ އަންހެނުން ބުރުގާ އަޅަން މަޖުބޫރު ކުރީ އެޕްރީލް 1983 ގަ އެވެ. އެއީ އެމެރިކާގެ ތާއީދާ އެކު އޮތް ރަސްކަން 1979 ވަނަ އަހަރުގެ އިންގިލާބުގައި ބަދަލު ކުރުމަށް ފަހު ގެނައި ގާނޫނެކެވެ.
އޭގެ ފަހުން އެ ގާނޫނު ތަންފީޒު ކުރަން އެކި ގޮތްގޮތުން މަސައްކަތް ކުރި އެވެ. "މޮރަލިޓީ" ފުލުހުން ނުވަތަ ގަޝްތޭ އިރުޝާދު އުފެއްދީ ކުރީގެ ރައީސް މަހްމޫދު އަހްމަދިއްނިޖާދް އެވެ.
އިރާންގެ ސަގާފީ އިންގިލާބާ ގުޅޭ އެންމެ މަތީ ކައުންސިލްހގެ ދަށުން އުފެއްދި ފުލުހުންގެ ޔުނިޓުގެ މިހާރުގެ އެންމެ އިސްވެރިޔަކީ ރައީސް އިބްރާހިމް ރައިސީ އެވެ.
"މޮރަލިޓީ" ފުލުހުން މަގުތައް ޕެޓްރޯލް ކުރަން ފެށީ 2006 ގަ އެވެ. އެ ޔުނިޓް އުވާލިކަން އިއުލާން ކުރި އިރު، ބުރުގާ އެޅުން މަޖުބޫރުވާ ގާނޫނު މުރާޖައާ ކުރުމުގެ މަސައްކަތް ވެސް ދަނީ ކުރަމުންނެވެ.
"ޕާލަމެންޓާއި ޖުޑިޝަރީއިން ވެސް ދަނީ އެކަމުގައި މަސައްކަތްކޮށް، ގާނޫނަށް ބަދަލުތަކެއް ގެންނަން ޖެހޭތޯ ބަލަމުން،" އެޓާނީ ޖެނެރަލް މުހައްމަދު ޖަފަރް މޮންތަޒޭރީ ވިދާޅުވި އެވެ.
އޭނާ ވިދާޅުވީ ކުރިއަށް އޮތް ދެ ހަފުތާ ތެރޭގައި ނިންމުންތަކެއް އިއުލާން ކުރާނެ ކަމަށެވެ. ރައީސް އިބްރާހިމް ރައިސީ ހޮނިހިރު ދުވަހު ވިދާޅުވީ އިރާނުގެ ހަމަތަކަށް ބަދަލު ނުގެނެވޭނެ ކަމަށެވެ.
އެކަމަކު އެ ހަމަތައް ތަންފީޒު ކުރުމުގައި ދޭނެ ލުއިތަކާއި އަމަލު ކުރާން ގޮތްތައް ބަދަލު ކުރެވިދާނެ ކަމަށް ޓީވީ މެދުވެރިކޮށް ރަައިސީ ވިދާޅުވި އެވެ.
