ޓެސްލާއިން އުފެއްދި ފުރަތަމަ ބެޓެރީ ޓްރަކްތައް މިދިޔަ ބުރާސްފަަތި ދުވަހު ކަސްޓަމަރުންނާ ހަވާލުކޮށްފި އެވެ.
އެ ބަރު އުޅަނދުތައް ހަވާލުކުރީ ކުރިން ކަނޑައެޅި ތާރީހަށް ވުރެ ތިން އަހަރު ލަހުންނެވެ. އެ ހަފުލާގައި ކުންފުނީގެ ވެރިޔާ އެލޮން މަސްކް ބައިވެރިވި އެވެ.
"މި އުޅަނދު ހީވަނީ މިއީ މާ ފަހުގެ ޒަމާނެއްގެ އެއްޗެއްހެން،" ނެވާޑާގައި އޮތް ހަފުލާގައި މަސްކް ބުންޏެވެ.
ޓެސްލާގެ ބެޓެރީ ޓްރަކްގެ ޕްރޮޓޯޓައިޕް އާއްމު ކުރީ 2017 ގަ އެވެ. އޭރު ކުންފުނިން ބުނީ 2019 ގައި އެ އުޅަނދު މާކެޓަށް ނެރޭނެ ކަމަށެވެ.
ރިޕޯޓުތައް ބުނާ ގޮތުން އެ އުޅަނދު މާކެޓަށް ނެރުން ލަސްވީ ބެޓެރީ އުފެއްދުމުގެ މަސައްކަތަށް ހުރަސް އެޅިގެންނެވެ.
އެ އުޅަނދުގައި 14،969 ކިލޯގެ މުދާ އުފުލޭނެ އެވެ. ޓެސްލާއިން ބުނީ ޑީސެލް އުޅަނދަކަށް ވުރެ، ޓެސްލާ ސެމީގެ ބާރު ތިން ގުނަ އިތުރު ވާނެ ކަމަށެވެ. އެއީ އިންގިލާބީ އުޅަނދެއް ކަމަށް މަސްކް ބުންޏެވެ.
ޓެސްލާ ސެމީ އިއުލާން ކުރިތާ ހޭދަވި ފަސް އަހަރުގެ ތެރޭގައި ވާދަވެރި އެހެން ކުންފުނިތަކުން ވަނީ މާކެޓަށް އެ މީހުންގެ ޓްރަކްތައް ނެރިފަ އެވެ. އޭގެ ތެރޭގައި ޑެއިމްލާ، ވޮލްވޯ އަދި ޗައިނާގެ ބީވައިޑީ ހިމެނެ އެވެ.
އެހެން ނަމަވެސް، އެ ހުރިހާ އުޅަނދުތަކާއި ޓެސްލާ ސެމީއާ އޮތް އެންމެ ބޮޑު ތަފާތަކީ ކަރަންޓު ނުވަތަ "އިލެކްޓްރިކް" ޓްރަކެއްގެ ގޮތުގައި ޓެސްލާ ސެމީ ތައްޔާރުކޮށްފައިވުމެވެ.
އާއްމުކޮށް ކަރަންޓު ޓްރަކްގެ އަގު އުޅެނީ ޑީސެލް ޓްރަކްތަކަށް ވުރެ 70 ޕަސެންޓު ބޮޑުކޮށެވެ. ޓެސްލާ ސެމީގެ އަގު މިހާތަނަށް އާއްމުކޮށްފައެއް ނުވެ އެވެ.
އެކަމަކު ދިގު މުއްދަތުގައި މާލީ ގޮތުން ބޮޑަށް ފައިދާ ކުރަނީ ޑީސެލް ޓްރަކަށް ވުރެ ބޮޑަށް ކަރަންޓު ޓްރަކުންނެވެ. އެއީ ތެލަށް ކުރާ ހަރަދާއި މެއިންޓެނަންސަށް ކުރާ ހަރަދު ކުޑަ ވާތީ އެވެ.
