ޓްވިޓާއާ ގުޅޭ ގޮތުން މަޝްވަރާ ކުރުމަށް ފްރާންސްގެ ރައީސް އިމޭނުއެލް މެކްރޯން ކުއްލި ގޮތަކަށް ބިލިއަނަރު އެލޮން މަސްކްއާ ބަައްދަލުކުރައްވައިފި އެވެ.
އެ ބައްދަލުވުން އޮތީ އެމެރިކާގެ ނިއު އޯލީންސްގަ އެވެ. މެކްރޯން ކުރެއްވި ޓްވީޓެއްގައި ވިދާޅުވީ އެ ޕްލެޓްފޯމްގެ ކޮންޓެންޓް މޮޑަރޭޓް ކުރުމާ ގުޅޭ ކަންބޮޑުވުން ހިއްސާކުރެއްވި ކަމަށެވެ.
މަސްކް ޓްވިޓާ ގަތީ މިދިޔަ އޮކްޓޯބަރު މަހު 44 ބިލިއަން ޑޮލަރަށެވެ. އޭނާ ބުނީ ކުރިއަށް ވުރެ ބޮޑަށް އެ ޕްލެޓްފޯމްގައި ހިޔާލު ފާޅުކުރުމުގެ މިނިވަންކަން ކަށަވަރުކޮށްދޭނެ ކަމަށެވެ.
"ޓްވިޓާ ބޭނުންކުރާ މީހުންނާ ގުޅޭ ދެފުށްފެންނަ ސިޔާސަތެއް، ކޮންޓެންޓް ރަނގަޅު ގޮތުގައި މޮޑަރޭޓް ކުރުން އަދި ހިޔާލު ފާޅުކުރުމުގެ މިނިވަންކަން ރައްކާތެރި ކުރުމަކީ މުހިއްމު ކަންކަން. ޔޫރޮޕްގެ ގަވާއިދުތަކާ އެއް ގޮތަށް އަމަލު ކުރަން ޓްވިޓާއިން މަސައްކަތްތަކެއް ކުރަން އެބަ ޖެހޭ،" މެކްރޯން ވިދާޅުވި އެވެ.
މަސްކްގެ ދަށުން ޓްވިޓާ ހިންގަން ފެށުމުން އެތައް ހާސް މުވައްޒަަފުން ވަކިކޮށް ކުންފުނީގެ ސިޔާސަތުތަކަށް ބޮޑެތި ބަދަލުތަކެއް ގެނެސްފައިވެ އެވެ.
