އެމެރިކާގެ ރައީސް ޖޯ ބައިޑެން، ރަޝިއާގެ ރައީސް ލެޑިމިއަ ޕުޓިންއާ ބައްދަލުކުރަން ބޭނުންވެވަޑައިނުގަންނަވާ ކަމަށް ވައިޓް ހައުސްއިން ބުނެފި އެވެ.
ބައިޑެން މިދިޔަ ބުރާސްފަތި ދުވަހު ވިދާޅުވީ ޝަރުތުތަކާ އެކު ޕުޓިންއާ ބައްދަލުކުރެއްވިދާނެ ކަމަށެވެ. އެހެން ނަމަވެސް ވައިޓް ހައުސްއިން ބުނީ މިހާރު އެ ވިސްނުން ބަދަލުވެފައިވާ ކަމަށެވެ.
"އެމަނިކުފާނުގެ މިހާރުގެ ވިސްނުންފުޅެއް ނޫން އެއީ ޕުޓިންއާ މަޝްވަރާ ކުރެއްވުން. އެމަނިކުފާނު ވިދާޅުވީ މަޝްވަރ ކުރަން ޕުޓިން ބޭނުންފުޅު ނުވާ ކަމަށް،" ވައިޓް ހައުސްގެ ނޭޝަނަލް ސެކިއުރިޓީ އެޑްވައިޒަރު ޖޯން ކާބީ ނޫސްވެރިންނަށް ވިދާޅުވި އެވެ.
ބުރާސްފަތި ދުވަހު ބައިޑެން ވިދާޅުވީ "ޔޫކްރެއިން ހަނގުރާމަ ނިންމޭނެ ގޮތެއް ހޯދަން" ޕުޓިން ބޭނުންފުޅުވާ ނަމަ ބައްދަލުކޮށް މަޝްވަރާ ކުރައްވާނެ ކަމަށެވެ.
ރަޝިއާ ސަރުކާރުން ބުނީ ބައިޑެންއާ އެކު ބައްދަަލުވުމެއް ބާއްވަން ރަޝިއާއިން ބޭނުން ނުވާ ކަމަށެވެ.
ކާބީ ވިދާޅުވީ ހަނގުރާމައިގައި ޔޫކްރެއިނުން ކުރިއެރުންތަކެއް ހޯދާފައި ވަނިކޮށް ރަޝިއާއާ އެކު މަޝްވަރާ ކުރަން އެމެރިކާއިން ޔޫކްރެއިނަށް ޕްރެޝަރު ނުކުރާ ކަމަށެވެ.
