އައިފޯން އުފައްދާ އެޕަލް ކުންފުނީގެ އެޕް ސްޓޯރާ ދެކޮޅަށް ވާހަކަ ދެއްކީ އޮޅުމެއްގެ ސަބަބުން ކަމަށް ޓްވިޓާގެ ވެރިޔާ އެލޮން މަސްކް ބުނެފި އެވެ.
ބުރާސްފަތި ދުވަހު މަސްކް ކުރި ޓްވީޓެއްގައި ބުނީ މައްސަލަ ޖެހުނީ އޮޅުމެއްގެ ސަބަބުން ކަމަށާއި އެޕަލްގެ ސީއީއޯ ޓިމް ކުކްއާ ބައްދަލުކޮށްފައިވާ ކަމަށެވެ.
"މަޝްވަރާ ކުރި ކަންކަމުގެ ތެރެއިން ހައްލު ކުރެވުނު އެއް ކަމަކީ އެޕް ސްޓޯރުން ޓްވިޓާ ނެގުމާ ގުޅޭ ގޮތުން އުފެދުނު އޮޅުން،" މަސްކް ބުންޏެވެ.
"އެއީ އެޕަލްއިން އެއްވެސް އިރެއްގައި އަޅަން ނިންމި ފިޔަވަޅެއް ނޫން ކަމަށް ޓިމް ބުނި."
ދުނިޔޭގެ އެންމެ ބޮޑު މަހުޖަނު މި ހަފުތާގެ ކުރީކޮޅު އެޕަލްއާ ދެކޮޅަށް ވާހަކަ ދެއްކީ އެޕް ސްޓޯރުގެ ފީތަކާއި ގަވާއިދުތަކާ މެދު ހިތްހަމަނުޖެހިގެންނެވެ.
އެކަމާ ގުޅޭ ގޮތުން އެޕަލްއިން ވަކި އެއްޗެއް ނުބުނެ އެވެ. އެނެލިސްޓުން ލަފާކުރާ ގޮތުގައި އަސްލު މައްސަލަ ޖެހުނީ ފައިސާއާ ގުޅޭ ގޮތުންނެވެ.
އެގޮތުން އެޕް ސްޓޯރު މެދުވެރިކޮށް އާ ސަބްސްކްރިޕްޝަނެއް އެޕަކުން ތައާރަފް ކުރާ ނަމަ އެޕަލްއިން ކޮމިޝަނެއް ނެގުމަކީ މަސްކް ހިތްހަމަނުޖެހުނު ކަންތަކަށް ވެދާނެ ކަމަށް ބެލެވެ އެވެ.
މަސްކް ވަނީ ޓްވިޓާ ގަނެ "ޓްވިޓާ ބްލޫ" ގެ ނަމުގައި ސަބްސްކްރިޕްޝަން ފަށަން ތައްޔާރުވެފަ އެވެ. އެހެން ނަމަވެސް އަދިވެސް ރަސްމީކޮށް ލޯންޗެއް ނުކުރެ އެވެ.
