ބުދަ ދުވަހު އެމެރިކާގެ ދެކުނަށް އެއް ފަހަރާ 20 ނަގޫރޯޅި އަރައި ގެތަކަށް ގެއްލުން ލިބި ކަރަންޓު ކެނޑުނު ކަމަށް ނޭޝަނަލް ވެދާ ސާވިސް (އެންޑަބްލިއުއެސް) އިން ބުނެފި އެވެ.
އެންޑަބްލިއުއެސްއިން ބުނީ ނަގޫރޯޅިތައް އެރީ މިސިސިޕީ، ލުއިޒިއާނާ އަދި އަލަބާމާ ސްޓޭޓަށް ކަމަށެވެ. ނަގޫރޯޅިތައް އެރުމުން މަގުތަކަށް ގެއްލުންވެ، ގަސްގަހާގެހި ވެއްޓި، ގެތަކުގެ ފުރާޅު އެއްލާލި އެވެ.
އެންޑަބްލިއުއެސްއިން ނެރުނު އިންޒާރެއްގައި ބުނީ އަލަބާމާއަށް އެރި އެއް ނަގޫރޯޅިއަކީ ފުރާނައަށް ނުރައްކާ ކުރިމަތި ކުރުވާނެ ފަދަ ބޮޑު، ބާރުގަދަ ނަގޫރޯޅިއެއް ކަމަށެވެ.
"ރޭގަނޑުގެ ވަގުތުގައި ނަގޫރޯޅި ހޯދައި ދެނެގަންނަން ވަރަށް އުނދަގޫވާނެ. ނަގޫރޯޅި ފެންނާނެ ކަމަށް ނުވަތަ އަޑު އިވޭނެ ކަމަށް ނުތިބެ، އަވަހަށް ރައްކާތެރި ތަނަކަށް ބަދަލުވޭ!" އިންޒާރުގައިވެ އެވެ.
ނޮވެމްބަރު މަހުގެ ފުރަތަމަ ހަފުތާގައި އޮކްލަހޯމާ، ޓެކްސަސް އަދި އާކަންސާ ސްޓޭޓަށް ނަަގޫރޯޅިތަކެއް އަރައި އެކަކު މަރުވި އެވެ.
ނަގޫރޯޅިއަކީ ވަރަށް ގިނައިން އެމެރިކާއަށް ކުރިމަތިވާ މޫސުމީ ކަމެކެވެ. އޭގެ ނުރައްކާ އެންމެ ބޮޑީ ކަންސަސް ސްޓޭޓުގެ ގްރޭޓް ޕްލެއިންސް ހުސް ބިމާއި، އޮކްލަހޯމާ އަދި ޓެކްސަސް ސްޓޭޓަށެވެ.
މިދިޔަ އަހަރުގެ ޑިސެމްބަރު މަހު އެއް ފަހަރާ ގިނަ ނަގޫރޯޅިތަކެއް އަރައި ގިނަ ފަސް ސްޓޭޓަށް ގެއްލުން ލިބުނެވެ. އެގޮތުން ކެންޓަކީއިން 79 މީހުން މަރުވި އެވެ. ޓެނެސީ، އާކަންސާ، މިޒޫރީ އަދި އިލިނޮއި އިން ވެސް މީހުން މަރުވި އެވެ.
