ހުޅަނގު އައްސޭރީގައި އިޒްރޭލް ސިފައިން ބަޑި ޖަހައި ފަލަސްތީނުގެ އިތުރު ތިން މީހުން މަރާލާފައިވާ ކަމަށް ފަލަސްތީނުގެ ހެލްތު މިނިސްޓްރީން ބުނެފި އެވެ.
ރާމަﷲ ކައިރީގައި ބަޑި ޖަހައި އެއް އާއިލާއެއްގެ ދެބެއިން މަރާލި އެވެ. ތިން ވަނަ މީހާ މަރުވީ ހިބްރޫން ކައިރީގައި ބޮލަށް ބަޑި ޖެހުމުންނެވެ.
އިޒްރޭލް ސިފައިން ބުނީ ބަޑި ޖެހީ އެ ސަރަހައްދުތަކުގައި އޮޕަރޭޝަނެއް ކުރިއަށް ގެންދަނިކޮށް ގަލާއި ގޮވާ ޒާތުގެ ތަކެތި އުކުމުން ކަމަށެވެ.
ރާމަﷲ ކައިރިން މަރުވީ އުމުރުން 22 އަހަރުގެ ޖަވާދް އަބްދުލްރަހްމާން ރިމާވީ އާއި 21 އަހަރުގެ ދާފެރް އަބްދުލް ރަހްމާން ރިމާވީ އެވެ.
ހިބްރޫން ކައިރިން މަރުވި މީހާގެ ވަނަވަރު ނޭނގޭ ކަމަށް ފަލަސްތީނުގެ ހެލްތު މިނިސްޓްރީން ބުންޏެވެ.
އެއް އާއިލާއެއްގެ ދެބެއިން މަރާލުމާ ގުޅިގެން ފަލަސްތީނުގެ ސިވިލް އެފެއާޒް މިނިސްޓަރު ވިދާޅުވީ "އެއީ ގަސްދުގައި މީހުން މެރުމުގެ އަމަލެއް" ކަމަށެވެ.
ގާޒާގައި ވެރިކަން ކުރާ ހަމާސް ގްރޫޕުން ބުނީ އިޒްރޭލުން ހަމަލާތައް އިތުރު ކުރާ ނަމަ ރައްދުގައި ފަލަސްތީނު ރައްޔިތުން އަޅާ ފިޔަވަޅުތައް ވެސް އިތުރު ކުރާނެ ކަމަށެވެ.
މި އަހަރު ހުޅަނގު އައްސޭރީގައި އިޒްރޭލުން އޮޕަރޭޝަނެއް ނުހިންގާ ދުވަހެއް މަދެވެ. ކޮންމެ އޮޕަރޭޝަނެއްގެ ތެރެއިން ވެސް ފަލަސްތީނުގެ ރައްޔިތުންނަށް ހަމަލާދެ އެވެ.
އިޒްރޭލް ސިފައިން ބުނީ "އޮޕަރޭޝަން ބްރޭކް ދަ ވޭވް" ގެ ދަށުން މިހާތަނަށް 3،000 އަށް ވުރެ ގިނަ މީހުން ހައްޔަރުކޮށްފައިވާ ކަމަށެވެ.
އދ. އިން ލަފާކުރާ ގޮތުގައި މި އަހަރުގެ ތެރޭގައި ހުޅަނގު އައްސޭރީގައި ފަލަސްތީނުގެ 125 މީހުން އެކި ހަމަލާތަކުގައި މަރުވި އެވެ. އިޒްރޭލުން ހުޅަނގު އައްސޭރި ހިފީ 1967 ގަ އެވެ.
