ރާއްޖޭގެ ހަ ސަރަހައްދެއްގައި އަޅާ ރީޖަނަލް އެއާޕޯޓުތަކަށް ފައިނޭންސް ކުރާނެ އަމިއްލަ އެއް ކުންފުނީގެ ގޮތުގައި މުނި އެންޓަޕްރައިސް ކަނޑައަޅައި އެކަމުގެ އެއްބަސްވުމުގައި މިއަދު ސޮއިކޮށްފި އެވެ.
ޕްލޭނިން މިނިސްޓްރީން ބުނީ މުނި އެންޓަޕްރައިސްއާއެކު ފައިނޭންސިން އެއްބަސްވުމަކަށް ދިޔައީ އެއާޕޯޓުތަކަށް ފައިނޭންސް ކުރާނެ ނުވަތަ އެއާޕޯޓު ތަރައްގީ ކުރާނެ ބަޔަކު ހޯދުމަށް އިއުލާނު ކުރުމަށްފަހު ކަމަށެވެ.
މުނިއަކީ ރީޓެއިލް ވިޔަފާރި ކުރާ ފިހާރައެއްގައި ގޮތުގައި 1983 ވަނަ އަހަރު ވުޖޫދަށް އައި ކުންފުންޏެކެވެ. މުނީގެ ބޮޑު ދެތިން ފިހާރައެއް މިހާރު ވެސް މާލޭގައި ހިންގަ އެވެ. އޭގެ އިތުރުން، އެ ކުންފުނިން ދަނީ 1975 ވަނަ އަހަރުން ފެށިގެން ރާއްޖޭގައި ސަފާރީ ދުއްވަމުންނެވެ. އަދި މީގެ ފަސް އަހަރު ކުރިން 2017 ގައި ފުށިފަރުގެ ނަމުގައި ރިސޯޓެއް ވެސް ވަނީ ހުޅުވައިފަ އެވެ.
މި ސަރުކާރުގެ ޕްލޭނަކީ ރާއްޖޭގެ ކޮންމެ ސަރަހައްދެއްގައި ފަސޭހައިން ދަތުރު ކުރެވޭނެ ގޮތަށް އެއާޕޯޓުތައް ގާއިމް ކުރުމެވެ. އެގޮތުން ކޮންމެ ހއ. ހަނިމާދޫ ހިމެނޭ ގޮތަށް ރާއްޖޭގެ ވަރަށް ގިނަ ސަރަހައްދުތަކުގައި ދަނީ އެއާޕޯޓު އެޅުމުގެ މަސައްކަތް ކުރަމުންނެވެ.
