ހައި ކޯޓުގެ އިސްފަނޑިޔާރުގެ މަގާމުގައި ހުންނެވި ހާތިފް ހިލްމީ ރިޓަޔާ ކުރެއްވުމުން، އެ ކޯޓަށް ފަނޑިޔާރަކު ހޯދުމަށް އިއުލާނުކޮށްފި އެވެ.
މި މަހުގެ 17 ވަނަ ދުވަހު ޖުޑީޝަލް ސާވިސް ކޮމިޝަން (ޖޭއެސްސީ) އިން ކުރި އިއުލާނެއްގައި އެ މަގާމުގެ ތައުލީމީ ބުނީ ގާނޫނީ ދާއިރާއިން ފުރަތަމަ ޑިގްރީ ހާސިލް ކޮށްފައިވާ އަދި ފަނޑިޔާރުކަމުގައި ނުވަތަ ވަކީލުކަމުގައި ފަސް އަހަރު ފުރިފައިވުމެވެ.
މި މަގާމަށް ކުރިމަތިލާ ފަރާތްތަކަކީ 25 އަހަރު ފުރިފައިވާ މީހަކަށް ވާން ޖެހެ އެވެ.
ހައިކޯޓު ފަނޑިޔާރުންގެ މުސާރައަކީ މަހަކު 54300ރ. އެވެ. އޭގެ އިތުރުން ރައްޔިތުންގެ މަޖިލީހުން ކަނޑައަޅާފައިވާ ގޮތުގެމަތިން މެޑިކަލް އެލަވަންސާއި ފޯނު އެލަވަންސް ލިބޭނެ އެވެ.
ހައިކޯޓުގެ އިސްފަނޑިޔާރުކަމުގެ މަގާމު ހުސްވީ، އެ މަގާމުގައި ހުންނެވި ހާތިފް ހިލްމީ ފަނޑިޔާރު ކަމުން ރިޓަޔާ ކުރެއްވުމުންނެވެ. ހާތިފް އެ މަގާމުން ރިޓަޔާކުރެއްވީ ދެ އަހަރު ދުވަހު އެ މަގާމު ފުރުއްވުމަށްފަހު އެވެ. އޭނާ ވަނީ 2019 ވަނަ އަހަރުން ފެށިގެން ހައިކޯޓުގެ ފަނޑިޔާރުކަން ކުރައްވާފަ އެވެ.
އެ މަގާމު ވަގުތީ ގޮތުން ހަވާލު ކުރައްވާފައި ވަނީ ފަނޑިޔާރު ހުސެއިން ޝަހީދާ އެވެ. އިސްފަނޑިޔާރުކަމުގެ މަސްއޫލިއްޔަތުތައް ވަގުތީގޮތުން ހަވާލުކުރި ޝަހީދު ގެންދަވަނީ 2018 ވަނަ އަހަރުން ފެށިގެން ހައިކޯޓުގެ ފަނޑިޔާރުކަން ކުރައްވަމުންނެވެ.
