ދިވެހި ރައްޔިތެއްކަން އަންގައިދޭ ކާޑު ޑިޒައިން ބަދަލުކުރަން ކުރި ދެ ވަނަ އިއުލާނު ވެސް ބާތިލުކޮށް އެ މަސައްކަތް ކުރާނެ ބަޔަކު ހޯދަން އިއްޔެ ތިން ވަނަ ފަހަރަށް އަނެއްކާ ވެސް އިއުލާނުކޮށްފި އެވެ.
މި ފަހަރު އިއުލާން ބާތިލުކުރީ ހުޅުވާލި މުއްދަތުގައި އެކަށީގެންވާ އަދަދަކަށް ޕްރޮޕޯސަލް ލިބިފައިނުވާތީ ކަމަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) އިން ބުންޏެވެ.
ޑީއެންއާރުގެ އިންފޮމޭޝަން އޮފިސަރަށް "އަދަދު" އިން ގުޅުމުން ފޯނަށް ޖަވާބުދީފައިނުވާތީ އިތުރު ތަފުސީލެއް ލިބޭގޮތް ވަނީ ނުވެފަ އެވެ.
އައިޑީކާޑުގެ ޑިޒައިން ބަދަލުކުރުމަށް ފުރަތަމަ ހުޅުވާލީ ޖޫން 27، ގަ އެވެ. އެ އިއުލާން ބާތިލުކޮށް ދެވަނަ ފަހަރަށް ހުޅުވާލީ އޮކްޓޯބަރު 16، ގަ އެވެ. އެ އިއުލާން ބާތިލުކޮށް އިއްޔެ އަލުން ހުޅުވާލިއިރު މިފަހަރު ސުންގަޑިއެއްގެ ގޮތުގައި އޮތީ ޑިސެމްބަރު 1، ވަނަ ދުވަހެވެ. މައުލޫމާތު ސާފުކުރުމުގެ ސުންގަޑިއެއްގެ ގޮތުގައި އޮތީ މި ހިނގާ ނޮވެމްބަރު 24، އެވެ.
މި އިއުލާނަށް ހުށަހަޅާ ޑިޒައިންތަކުގެ ތެރެއިން އެންމެ ރަނގަޅު ހުށަހެޅެމެއް ހުށަހަޅާ ފަރާތަކަށް ދެ ލައްކަ ރުފިޔާގެ ފައިސާގެ އިނާމެއް ލިބޭނެ އެވެ.
