ވިހި ތިރީސް ވަނަ އަހަރުގެ ކުރިން އިންސާނުން ދިގު މުއްދަތުތަކަށް ހަނދުގައި އުޅެން ފެށުމުގެ އުއްމީދު އެބަ އޮތް ކަމަށް އެމެރިކާގެ ޖައްވީ އިދާރާ ނާސާއިން ބުނެފި އެވެ.
ނާސާގެ އޮރަޔޯން ލޫނާ ސްޕޭސްކްރާފްޓް ޕްރޮގްރާމްގެ އެންމެ އިސް ސައިންޓިސްޓް ހޮވާޑް ހޫ ބީބީސީއަށް ވިދާޅުވީ ހަނދުގައި ތަހުލީލު ކުރެވޭނީ އިންސާނުންނަށް ހަނދުގައި ތިބެވޭނެ ގޮތް ހަމަޖެހިގެން ކަމަށެވެ.
ނާސާގެ ބިޔަ ސްޕޭސް ލޯންޗް ސިސްޓަމް (އެސްއެލްއެސް) ރޮކެޓް ހަނދަށް ދަތުރު ފެށީ މިދިޔަ ބުދަ ދުވަހު އެވެ. އޭގައި ހިމެނޭ އޮރަޔޯން ކެޕްސޫލް ހަނދު ވަށައި ތިން ހަފުތާ ވަންދެން ދަތުރު ކުރުމަށް ފަހު އެނބުރި ދުނިޔެއަށް އަންނާނެ އެވެ.
ހޫ ވިދާޅުވީ މިހާރު ކުރިއަށްދާ މިޝަނަކީ އިންސާނުން ޖައްވުގައި ކުރާ މަސައްކަތްތަކަށް ތާރީހީ މިޝަނެއް ކަމަަށެވެ. މި ވަގުތު އޮރަޔޯން ކެޕްސޫލް ދަތުރު ކުރަނީ ހަނދާ 134،000 ކިލޯމީޓަރު ދުރުންނެވެ.
ބައްތިރީސް ފަންގިފިލާހާ އުސް ރޮކެޓް ލޯންޗުކުރީ ކެނެޑީ ސްޕޭސް ސެންޓަރުންނެވެ. އެ ރޮކެޓުގެ އެންމެ ކޮޅުގައި ހަރުކޮށްފައިވާ އޮރަޔޯންއަކީ ޖައްވީ އުޅަނދެކެވެ.
މި ދަަތުރުގައި އެއްވެސް އެސްޓްރޮނޯޓަކު ނުދެ އެވެ. އެހެން ނަމަވެސް ދަތުރުގެ ސަބަބުން އިންސާނުންގެ ހަށިގަނޑަށް ކުރާނެ އަސަރު ދެނެގަންނަން ހާއްސަ "މެނިކިން" އެއް އެ ކެޕްސޫލް ތެރޭގައިވެ އެވެ.
ހޫ ވިދާޅުވީ މިހާރު ކުރިއަށްދާ މިޝަން ކާމިޔާބުވެއްޖެ ނަމަ، ޖެހިގެން އޮންނަ މިޝަނެއްގައި އެސްޓްރޮނޯޓުން ދަތުރު ކުރާނެ ކަމަށާއި ތިން ވަނަ މިޝަނެއްގައި އެސްޓްރޮނޯޓުން ހަނދަށް ފައިބާނެ ކަމަށެވެ.
އެންމެ ފަހުން އިންސާނުން ހަަނދަށް ދިޔެއީ މީގެ 50 އަހަރު ކުރިން އެޕޯލޯ 17 މިޝަންގައި ޑިސެމްބަރު 1972 ގަ އެވެ.
މިހާރު ކުރިއަށްދާ މިޝަންގެ އެންމެ މުހިއްމު އެއް ބަޔަކީ އޮރަޔޯން ރައްކާތެރިކަމާ އެކު އެނބުރި ދުނިޔެއަށް ގެނައުމެވެ. އޮރަޔޯން އެނބުރި ދުނިޔެއަށް ކުރާ ދަތުރުގައި އެޓްމޮސްފިއާގެ ތެރެއަށް އެތެރެވާނީ ގަޑިއަކު 38،000 ކިލޯމީޓަރު ބާރުމިނުގަ އެވެ.
އެ ކެޕްސޫލް ވެއްޓޭނީ ޕެސިފިކް ކަނޑުގެ ހިސާބަކަށް ކަމަަށް ބެލެވެ އެވެ. ހޫ ވިދާޅުވީ އެ ހުރިހާ ކަމެއް ކާމިޔާބުވެއްޖެ ނަމަ، 2030 ވަނަ އަހަރުގެ ކުރިން އިންސާނުން ހަނދުގައި އުޅެން ފަށާނެ ކަމަށެވެ.
ހަނދުގައި ތަހުލީލުތައް ހެދުމުގެ އެންމެ ބޮޑު އެއް ބޭނުމަކީ ހަނދުގެ އެންމެ ދެކުނުގައި ފެން ހުރިތޯ ބެލުމެވެ. އެ ތަނުގައި ފެން ހުރި ނަމަ، މާސް ފަދަ ޕްލެނެޓަކާ ހަމައަށް ދަތުރު ކުރުމަށް އެ ފެން ހަކަތައިގެ ގޮތުގައި ޖައްވީ އުޅަނދުތަކަށް ބޭނުންކުރެވޭނެ ކަމަށް ހޫ ވިދާޅުވި އެވެ.
އޮރަޔޯން ކެޕްސޫލް އެނބުރި ދުނިޔެއަށް އަންނާނީ ޑިސެމްބަރު 11 ވަނަ ދުވަހު އެވެ.
