ޓްވިޓާގެ މުވައްޒަަފުންނަށް ގިނަ ވަގުތު މަސައްކަތް ނުކުރެވޭ ނަމަ އިސްތިއުފާ ދިނުމަށް ކުންފުނީގެ ވެރިޔާ އެލޮން މަސްކް އަންގައިފި އެވެ.
މުވައްޒަފުންނަށް ފޮނުވި އީމެއިލެއްގައި މަސްކް ބުނީ ކުންފުނީގައި ދެމިތިބެން ބޭނުންވާ ނަމަ ގިނަ ވަގުތު މަސައްކަތް ކުރަަން ވައުދުވާން ޖެހޭނެ ކަމަށެވެ.
ވޮޝިންޓަން ޕޯސްޓް ނޫހުން ބުނީ އެގޮތަށް އަަންގައި އިގްރާރެއްގައި ސޮއިކުރަން ހުރިހާ މުވައްޒަފުންނަށް އީމެއިލް ފޮނުވި ކަމަށެވެ. ބުރާސްފަތު ދުވަހުގެ ކުރިން ސޮއިނުކުރާ އެންމެންނަށް ތިން މަހުގެ މުސާރަ ދިނުމަށް ފަހު ވަޒީފާއިން ވަކިކުރާނެ އެވެ.
ޓްވިޓާއިން އެކަމާ ގުޅޭ ގޮތުން ވަކި އެއްޗެއް ނުބުނެ އެވެ. ގާޑިއަން ނޫހުން ވެސް އެ އީމެއިލްގެ ވާހަކަ ރިޕޯޓުކުރި އިރު، އޭގައިވާ ގޮތުން މަސްކް ބުނީ ކުންފުނި ކުރިއަރުވަން ވަރަށް ބުރަކޮށް މަސައްކަތް ކުރަން ޖެހޭ ކަމަށެވެ.
ދުނިޔޭގެ އެންމެ ބޮޑު މަހުޖަނު ޓްވިޓާ ގަތީ 44 ބިލިއަން ޑޮލަރަށެވެ. އޭގެ ފަހުން އޭނާ ވަނީ ކުންފުނީގެ 50 ޕަސެންޓު މުވައްޒަަފުން ވަޒީފާއިން ވަކިކޮށްފަ އެވެ.
މަސްކް ބުނީ ވަޒީފާތައް މަދު ކުރަން ޖެހުނީ މަޖުބޫރުވެގެން ކަމަށާއި ކޮންމެ ދުވަހަކު ވެސް ކުންފުންޏަށް ހަތަރު މިލިއަން ޑޮލަރުގެ ގެއްލުން ލިބެމުންދާ ކަމަށެވެ.
އޭގެ އިތުރުން ޓްވިޓާގެ ބައެއް އިސް އޮފިޝަލުން ވަނީ ކުންފުންޏަށް ގެންނަމުންދާ ބަދަލުތަކާ މެދު ހިތްހަމަނުޖެހި އަމިއްލައަށް އިސްތިއުފާ ދީފަ އެވެ.
