ނާސާގެ ބިޔަ ސްޕޭސް ލޯންޗް ސިސްޓަމް (އެސްއެލްއެސް) ރޮކެޓް ހަނދަށް ދާން ކުރާ ދަތުރު ބުދަ ދުވަހުގެ ހެނދުނު ވަގުތެއްގައި އެމެރިކާގެ ފްލޮރިޑާއިން ފަށައިފި އެވެ.
ބައްތިރީސް ފަންގިފިލާހާ އުސް ރޮކެޓް ލޯންޗުކުރީ ކެނެޑީ ސްޕޭސް ސެންޓަރުންނެވެ. އޭގައި ހިމެނޭ އޮރަޔޯން ކެޕްސޫލް ހަނދު ވަށައި ތިން ހަފުތާ ވަންދެން ދަތުރު ކުރުމަށް ފަހު އެނބުރި ދުނިޔެއަށް އަންނާނެ އެވެ.
ޓެސްޓު ދަތުރެއްގެ ގޮތުގައި ހަނދަށް ކުރާ މި ދަތުރުގައި އެއްވެސް އެސްޓްރޮނޯޓަކު ބައިވެރިއެއް ނުވެ އެވެ. މީގެ ކުރިން ދެ ފަހަރު ރޮކެޓް ލޯންޗު ކުރަން މަސައްކަތްކޮށް ފެއިލްވި އެވެ.
އެޕޯލޯ 17 މިޝަންގައި އެންމެ ފަހުން އިންސާނުން ހަނދަަށް ކުރި ދަތުރަށް 50 އަހަރު ފުރޭނީ އަންނަ ޑިސެމްބަރު މަހުގަ އެވެ.
ނާސާއިން ފަށާފައިވާ އާ ޕްރޮގްރާމް އާޓެމިސްގެ ދަށުން އަނެއްކާ ވެސް އިންސާނުން ހަނދަށް ގެންދާނެ ކަމަށް ވަނީ އިއުލާންކޮށްފަ އެވެ.
ނާސާއިން 1969 އިން 1972 އަށް ހިންގި އެޕޯލޯ ހަ މިޝަންގައި 12 އެސްޓްރޮނޯޓުން ހަނދަށް ދިޔަ އެވެ. ނާސާއިން ފެށި އާ ޕްރޮގްރާމްގައި ގިނަ ކޮމާޝަލް ބައިވެރިން ހިމެނެ އެވެ.
އެގޮތުން އެލޮން މަސްކްގެ ސްޕޭސް އެކްސް ކުންފުންޏާއި، ޔޫރަޕާއި ކެނެޑާ އަދި ޖަޕާންގެ ޖައްވީ އިދާރާތަކުން ވެސް ބައިވެރިވާނެ އެވެ.
އެންމެ ބޮޑު އަމާޒަކީ ހަނދުގައި އިންސާނުންނަށް ތިބެވޭނެ މަރުކަޒެއް އަޅައި، އިންސާނުން މާސްއަށް ދަތުރު ކުރަން ތައްޔާރުވުމެވެ.
އެހެން ނަމަވެސް މާސްއަަށް އެސްޓްރޮނޯޓުން ފޮނުވުމަށް އެންމެ މަދުވެގެން ވެސް އިތުރު 15 އަހަރު ނަގާނެ ކަމަށް ތަޖުރިބާކާރުން ދެކެ އެވެ.
