ހައިކޯޓުގެ ތާރީހުގައި ފުރަތަމަ ފަހަރަށް މައްސަލައެއް ބެއްލެވުމަށް މުޅިން ވެސް އަންހެން ފަނޑިޔާރުން ހިމެނިވަޑައިގަންނަވާ ބެންޗެއް އެކުލަވާލައްވައި, ޝަރީއަތް ފަށައިފި އެވެ.
އިސްތިއުނާފީ ކޯޓު, ހައިކޯޓުގައި ޖުމްލަ 11 ފަނޑިޔާރުން ތިއްބަވާއިރު އޭގެ ތެރޭން ތިން ބޭފުޅުންނަކީ އަންހެން ފަނޑިޔާރުންނެވެ. އެއީ, ފަނޑިޔާރު ފާތިމަތު ފަރްހީޒާ, ފަނޑިޔާރު ހުޒައިފާ މުހައްމަދު އަދި ފަނޑިޔާރު ދީބާނާޒް ފަހުމީ އެވެ.
ހައިކޯޓުގައި ކޮންމެ މައްސަލައެއް ވެސް ތިން ފަނޑިޔާރުންގެ ބެންޗަކުން ބައްލަވާއިރު, އެ ކޯޓުގައި މިއަދު ޝެޑިއުލްކޮށްފައި އޮތް އަމިއްލަ މީހަކާއި މޮރިޝަސް ބޭންކްއާ ދެމެދު ހިންގާ މައްސަލައެއްގެ ޝަރީއަތުގެ ބެންޗުގައި ހިމެނިވަޑައިގަންނަވަނީ ތިން އަންހެން ފަނޑިޔާރުންނެވެ.
އެކަން ހައިކޯޓުން ވަނީ އެ ކޯޓުގެ ސޯޝަލް މީޑިއާ އެކައުންޓްތަކުގައި ހާމަކޮށްފަ އެވެ.
ހައިކޯޓުން މައުލޫމާތު ދިން ގޮތުގައި, މުޅީން ވެސް އަންހެން ފަނޑިޔާރުން ހިމެނިވަޑައިގަންނަވާ ބެންޗެއް އެ ކޯޓުގައި ކުރިއަށްދާ ޝަރީއަތެއްގައި އެކުލަވާލެވުނު މިއީ ފުރަތަމަ ފަހަރު ކަމުން, އެ ކޯޓަށް ތާރީހީ ދުވަހެކެވެ.
މައުލޫމާތު ލިބިފައިވާ ގޮތުގައި, މިއީ ރާއްޖޭގައި ވެސް މިފަދަ ބެންޗެއް އެކުލަވާލެވުނު ފުރަތަމަ ފަހަރެވެ.
ބައެއް ބޮޑެތި ޝަރީއަތްތަކުގައި ކުރިމިނަލް ކޯޓުން ބެންޗްތައް އެކުލަވާލި ނަމަވެސް, އާންމު އުސޫލުން ފަނޑިޔާރުންގެ ބެންޗުތަކުން ޝަރީއަތްތައް ހިންގަވަނީ ހައިކޯޓު އަދި ސުޕްރީމް ކޯޓުގަ އެވެ. ހައިކޯޓުގައި މި ވަގުތު ތިން އަންހެން ފަނޑިޔާރުން ތިއްބެވިއިރު, ސުޕްރީމް ކޯޓުގައި ތިއްބެވީ އަންހެން ދެ ފަނޑިޔާރުންނެވެ.
