ޓެކްސް ބޮޑުކުރާ ބިލަށް މިއަދު ވެސް ވޯޓަކަށް ނޭހި، މެމްބަރުން ނުރުހިފައި

 މަޖިލިސް ބޭރުގައި މިއަދު ޓެކްސް ބޮޑު ކުރުމާ ދެކޮޅަށް އަޑު އުފުލަނީ: މިއަދު ވެސް ބިލަށް ވޯޓަކަށް ނޭހި - ފޮޓޯ: އަބްދުالله އިޔާން / އަދަދު

މަޖިލިސް ބޭރުގައި މިއަދު ޓެކްސް ބޮޑު ކުރުމާ ދެކޮޅަށް އަޑު އުފުލަނީ: މިއަދު ވެސް ބިލަށް ވޯޓަކަށް ނޭހި - ފޮޓޯ: އަބްދުالله އިޔާން / އަދަދު

ޖީއެސްޓީ އާއި ޓީޖީއެސްޓީ ބޮޑުކުރުމަށްޓަކައި ޓެކްސް ގާނޫނަށް ބަދަލުގެންނަން ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބިލު ފާސްކުރުމާ މެދު ރައްޔިތުންގެ މަޖިލީހުގެ މިއަދުގެ ޖަލްސާގައި ވެސް ވޯޓަށް ނޭހުމުން ބައެއް މެމްބަރުން ނުރުހުން ފާޅުކުރައްވައިފި އެވެ.

ޖީއެސްޓީ ހަ ޕަސެންޓުން އަށް ޕަސެންޓަށް އަދި ޓީޖީއެސްޓީ 12 ޕަސެންޓުން 16 ޕަސެންޓަށް ބޮޑުކުރުމަށްޓަކައި ސަރުކާރުގެ ފަރާތުން އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހެޅުއްވި ބިލު ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީން ދިރާސާކުރުމަށް ފަހު ނިންމީ އެ ބިލަށް އެއްވެސް ބަދަލެއް ނުގެނެސް ފާސްކުރުމަށެވެ. ފިނޭންސް މިނިސްޓަރު އިބްރާހީމް އަމީރާއި ކަމާ ބެހޭ އެހެން ބައެއް ފަރާތްތަކާ ސުވާލުކޮށް މަޝްވަރާކޮށްގެން އެގޮތަށް ނިންމައި އެކުލަވައިލި ރިިޕޯޓް މަޖިލީހުގެ ތަޅުމަށް ހުށަހެޅީ އިއްޔެ އެވެ.

އިއްޔެގެ ޖަލްސާ ނިންމައިލުމުގެ ކުރިން އޭރު ރިޔާސަތުގައި އިންނެވި ވިލުފުށި ދާއިރާގެ މެމްބަރު ހަސަން އަފީފު، އެ ރިޕޯޓަށް ބަހުސް ކުުރުމުގެ ފުރުސަތު ހުޅުއްވައިލެއްވި ނަމަވެސް އެ ބަހުސްގައި ބައިވެރިވެވަޑައިގަންނަވަން އެއްވެސް މެމްބަރަކު އެދިވަޑައެއް ނުގަންނަވަ އެވެ. އެހެންވެ އަފީފު އިއްޔެ ނިންމެވީ އެ ރިޕޯޓްގެ ބަހުސް ނިމުނީ ކަމަށެވެ. އެގޮތަށް ނިންމަވައި ވޯޓަށް އެއްސެވުމަށް އުޅުއްވާފައި އޭނާ ވިދާޅުވީ ވޯޓް ނެގޭ ވަރަށް ޖަލްސާގެ ކޯރަމް ހަމަނުވާ ކަމަށެވެ.

Advertisement

އެހެން ވިދާޅުވެ އިއްޔެގެ ޖަލްސާ ނިންމަވައިލެއްވުމުން އެމްޑީޕީގެ ބައެެއް މެމްބަރުން އެކަމާ ކަންބޮޑުވުން ފާޅުކުރެއްވި އެވެ. އެ ޕާޓީގެ ޕާލަމެންޓްރީ ގްރޫޕްގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ތުހުމަތުކުރެއްވި ގޮތުގައި އަފީފު އިއްޔެގެ ޖަލްސާ ނިންމަވައިލެއްވީ ރައްޔިތުންގެ މަޖިލީހުގެ ގަވައިދާ ހިލާފަށެެވެ. އެއީ ވޯޓަށް އެހުމުގެ ކުރިން ޖަހަން ޖެހޭ ރަނގަބީލު ނުޖަހާތީއާއި ރަނގަބީލު ޖެހުމަށް ފަހު ދޭން ޖެހޭ ވަގުތު ވެސް ނުދޭތީ އެވެ.

ޖަލްސާ ނިންމައިލުމުން އަސްލަމާއި އެހެން ބައެއް މެމްބަރުން މަޖިލީހުގެ ސެކްރެޓޭރިއަޓްގައި އެދިވަޑައިގެންނެވީ ޓެކްސް ބިލަށް ވޯޓަށް އަހާނެ ގަޑިއެއް ދެއްވުމަށެވެ. އަސްލަމް އިއްޔެ ވިދާޅުވި ގޮތުގައި މިއަދުގެ 1:00 ގައި އެ ބިލަށް ވޯޓަށް އަހާނެ ކަމަށް ސެކްރެޓޭރިއަޓުން ބުންޏެވެ.

އެހެން ނަމަވެސް މަޖިލީހުގެ މިއަދުގެ ޖަލްސާ ވެސް ނިންމައިލީ އެ ބިލަށް ވޯޓަށް ނާހަ އެވެ. އިއްޔެ އާއި މިއަދު ބައެއް މެމްބަރުން އެކަމާ ކަންބޮޑުވުން ފާޅުކުރެއްވުމުން އެކަމަށް ޖަވާބުދާރީ ވެވަޑައިގަންނަވަމުން މިއަދު ހެނދުނު މަޖިލީހުގެ ރިޔާސަތުން ރައީސް މުހައްމަދު ނަޝީދު ވިދާޅުވީ އެ ބިލުގެ މަސައްކަތް އަދި ވޯޓަށް އެހުމުގެ މަރުހަލާއާ ހިސާބަށް ނުދާ ކަަމަށެވެ.

"ވޯޓަށް އެހުން މި އޮންނަނީ ތިން ވަނަ ކިއުން ކިއުމަށް ފަހުގައި. އެ ބަހުސް ނިންމާފައި ތިންވަނަ ކިއުމެއް ނުކިޔޭ. އެހެންވީމާ އަޅުގަނޑު މި ދެކެނީ އެ މައްސަލައިގެ ބަހުސް އަދި ނިންމަން ޖެހޭ ކަމަށް. ނިންމުމަށް ފަހުގައި ތިން ވަނަ ކިއުން ކިޔާނެ،" ނަޝީދު ވިދާޅުވި އެވެ.

އެހެން ނަމަވެސް އެ ބިލުގެ ބަހުސަށް މިއަދު އަލުން ހުޅުއްވައެއް ވެސް ނުލައްވަ އެވެ. ޖަލްސާ ނިންމަވައިލެއްވުމުގެ ކުރިން މިއަދު ވޯޓަށް އެއްސެވީ ޗާގޯސް މައްސަ؛ލައާ ގުޅުވައި ދަނގެތި ދާއިރާގެ މެމްބަރު މުހައްމަދު ނާޒިމު ހުށަހަޅުއްވާފައިވާ ގަރާރު ފާސްކުރުމާ މެދު ގޮތެއް ނިންމުމަށެވެ.

އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އެކަން ސިފަކުރެއްވީ "މަޖިލީހުގެ ރިޔާސަތަށް އޮންނަ ބާރުގެ ބޭނުން ނަހަމަގޮތުގައި ކުރެއްވުން" ކަމަށެވެ.

އޭނާ ވިދާޅުވި ގޮތުގައި ޓެކްސް ބިލުގެ ރިޕޯޓަށް ބަހުސް ކުރައްވަން އެއްވެސް މެމްބަރަކު އެދިވަޑައިނުގެންނެވުމުން އެ ބަހުސް އެ އޮތީ ނިމިފަ އެވެ. އެއީ ބަހުސް ނިމުން ކަން ރިޔާސަތުން ގަބޫލުނުކުރައްވާ ނަމަ މިއަދު އަލުން ބަހުސަށް ހުޅުވާލައި، 1:30 ގައި ވޯޓަށް އެހުމަކީ ވެސް ކުރެެއްވޭނެ ކަމެއް ކަމަށް އޭނާ ވިދާޅުވި އެވެ.

"މީގެ ކުރިން ވެސް 2:30 ވަންދެން ޖަލްސާ ކުރިއަށް ގެންދޭ، މިއަދު ވެސް އެގޮތަށް ގެންދެވުނީސް،" އަސްލަމް ވިދާޅުވި އެވެ.

ޓެކްސް ބިލަށް ވޯޓަށް ނޭހުމުން މިއަދު ބައެއް މެމްބަރުން ރިޔާސަތުގެ މޭޒު ކައިރިއަށް ވަޑައިގެން ވެސް ނުރުހުން ފާޅުކުރެއްވި އެވެ.

ޓެކްސް ބޮޑުކުރާ ބިލާ މެދު މަޖިލީހުގެ ރިޔާސަތުން މިގޮތަށް އަމަލުކޮށްފައި ވާއިރު އެ ބިލާ ދެކޮޅަށް ރައީސް ނަޝީދާއި އެމަނިކުފާނަށް ތާއީދުކުރައްވާ މެމްބަރުން މީގެ ކުރިން ވަނީ ވާހަކަދައްކަވައިފަ އެވެ.

ކޮމެންޓް

ފަހުގެ ޚަބަރު

ދިރާގު ރޯޑް ރޭސް 5،500އަށްވުރެ ގިނަ ދުވުންތެރިންނާއެކު ބާއްވައިފި

ދިރާގު މޯލްޑިވްސް ރޯޑް ރޭހުގެ 17 ވަނަ އެޑިޝަން 5،500 އަށްވުރެ ގިނަ ދުވުންތެރިންނާއެކު ހުޅުމާލެ ސެންޓްރަލް ޕާކުގައި ވަނީ ބާއްވާފައެވެ. މި ދުވުމުގެ ލައިވް އަޕްޑޭޓްތަކާއި، ނަތީޖާ އަދި ދުވުންތެރިންގެ ރޭންކިންގ ބަލައިލުމުގެ ފުރުސަތު ދިރާގުން ވަނީ ޚާއްޞަ މޮބައިލް އެޕްލިކޭޝަނެއް މެދުވެރިކޮށް ފަހިކޮށްދީފައެވެ.

ޕީއެންސީގެ މެންބަރުންގެ އަދަދު ލައްކައަކަށްވުރެ ދަށަށް

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އެރިތާ 24 ގަޑިއިރު ނުވަނީސް، އަލުން އެ އަދަދު ލައްކައަކަށް ވުރެ ދަށަށް ގޮސްފިއެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި މި އަދަދު ހަމަކުރުމަށްޓަކައި ވަޒީފާގެ ބިރުދެއްކުމާއި ރިޝްވަތުގެ ގޮތުގައި ފައިސާ ބޭނުންކޮށްފައިވެއެވެ. އީސީގެ ތަފާސްހިސާބުތަކުން ދައްކާގޮތުގައި އެ ޕާޓީގެ މެންބަރުންގެ އަދަދު މިހާރު ވަނީ 99,930 އަށް ތިރިވެފައެވެ.

ރަސްމާލޭގެ ޑީލުގައި ސޮއިނުކުރަން އެދި އަލައްބާރަށް ސިޓީއެއް

ރަސްމާލެ މަޝްރޫއުގެ މިހާރުގެ ޝަރުތުތަކާއި ގާނޫނުއަސާސީއާ ފުށުއެރުންތަކެއް ހުރި ކަމަށާއި، އެކަމުގައި އެކަށީގެންވާ ގޮތެއްގައި ރައްޔިތުންގެ ހިޔާލު ހޯދާފައި ނުވާތީ، ދެން އަންނަ ސަރުކާރަކުން ވެސް މި މަޝްރޫއުގެ އެއްބަސްވުން އަލުން މުރާޖައާކުރުމަށް ނުވަތަ އެއްކޮށް ބާތިލުކުރުމުގެ ފުރުސަތު އޮތް ކަމަށް އެ ސިޓީގައި ބުނެފައިވޭ.

"ރަސްމާލެ މައްސަލައިގައި މުއިއްޒު ވަނީ އަނގަވަތަށް ވެއްޓިފައި"

ރަސްމާލެ މަޝްރޫއަކީ ރާއްޖޭގެ ސިޔާދަތަށް އުނިކަންލިބޭ، ބޭރުގެ ފަރާތްތަކަށް ބިން ދިނުމަށް ހިންގާ ހީލަތްތެރި ރޭވުމެއް ކަމަށް ވިދާޅުވެ ކުރީގެ ރައީސް ޔާމީން ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ. މި މަޝްރޫއުގެ ސަބަބުން ރައީސް މުއިއްޒު ރައްޔިތުންގެ ކުރިމަތީގައި ބޭޒާރުވެފައިވާ ކަމަށާއި، މި ސަރުކާރަށް ދެވަނަ ދައުރެއް ރައްޔިތުން ނުދޭނެ ކަމަށް ޔާމީން ވިދާޅުވިއެވެ.

ރަސްމާލެ ދޫކޮށްލުމާ ދެކޮޅުވެރިކަމެއް ނެތްކަމުގެ އިޝާރާތެއް

ރަސްމާލެއިން ބައެއް ބޭރުގެ ކުންފުންޏަކަށް ދޫކޮށްލުމާ ދެކޮޅު ހަދަނީ މަދު ބަޔަކު ކަމަށާއި، ދިވެހިން އަބަދުވެސް އިސްކުރަނީ ގައުމީ ތަރައްގީކަން މުއިއްޒު ފާހަގަކުރެއްވި. މީގެކުރިންވެސް ރާއްޖެއަށް އައި ބޮޑެތި ބަދަލުތަކާ ބައެއް މީހުން ދެކޮޅު ހެދި ނަމަވެސް، ގިނަ ރައްޔިތުން ތާއީދުކުރީ ގައުމީ ކުރިއެރުމަށްކަން އެމަނިކުފާނު ބަޔާންކޮށްދެއްވި.

ހުލާސާކޮށް އިއްޔެ: ސިޔާސީ ޕާޓީތަކުގެ ދަފްތަރަށް އައި ބޮޑު ބަދަލު

ޕީއެންސީގެ މެންބަރުންގެ އަދަދު އެއްލައްކައަށް އެރުމާއެކު، ޖުމްހޫރީ ޕާޓީ އާއި އަދާލަތު ޕާޓީ ފަދަ ދުވަސްވީ ޕާޓީތަކުން ގިނަ އަދަދެއްގެ މެންބަރުންނާއި އިސް ބޭފުޅުން ވަނީ ވަކިވެފައެވެ. މީގެ އިތުރުން، ރަސްމީ ޖަލްސާތަކުގެ ޕްރޮޓޮކޯލަށް ބަދަލުތަކެއް ގެނެސްފައިވާއިރު، ރަސްމާލެ މަޝްރޫއާ ގުޅޭގޮތުން އިލްމުވެރިންނާއި ސިޔާސީ ފަރާތްތަކުގެ މެދުގައި ވަނީ ޚިޔާލުތަފާތުވުންތަކެއް އުފެދިފައެވެ.

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

Newsletter

Get the latest news delivered straight to your inbox