އިރާނުގައި ސަރުކާރާ ދެކޮޅަށް ކުރަމުންދާ މުޒާހަރާގެ ތެރެއިން ހައްޔަރު ކުރި މީހަކު މެރުމަަށް ފުރަތަމަ ފަހަރަށް ހުކުމްކޮށްފި އެވެ.
ތެހްރާންގެ ކޯޓުން ކުރި ހުކުމުގައި ބުނީ ސަރުކާރުގެ ފެސިލިޓީއެއްގައި ރޯކޮށް، "މާތް ﷲ ގެ އަދުއްވެއްގެ" ގޮތުގައި އެ މީހާ އަމަލުކުރި ކަމަށް ސާބިތުވާ ކަމަށެވެ.
އެ މީހާ މެރުމަށް ހުކުމް ކުރި އިރު، އެހެން ކޯޓަކުން ވަނީ ފަސް މީހުން 10 އަހަރަށް ޖަލަށް ލުމަށް ވެސް ހުކުމްކޮށްފަ އެވެ.
އިންސާނީ ހައްގުތަކަށް މަސައްކަތް ކުރާ ގްރޫޕްތަކުން ބުނީ އަވަސް އަރުވާލައިގެން މަރުގެ ހުކުމް ތަންފީޒު ކުރަން ސަރުކާރުން މަސައްކަތް ކުރާނެ ކަމަށެވެ.
އިރާން ހިޔުމަން ރައިޓްސް ޖަމިއްޔާއިން ބުނީ މުޒާހަރާއިން ހައްޔަރުކޮށް ދައުވާ އުފުލި 20 މީހެއްގެ މައްޗަށް މަރުގެ ހުކުމް އައުން އެކަށީގެންވާ ކަމަށެވެ.
ސެޕްޓެމްބަރު މަހުގެ ތެރޭގައި މުޒާހަރާތައް ފެށީ ބުރުގާ ނާޅާ ހުރުމުން ފުލުހުން ހައްޔަރު ކުރި ޒުވާން އަންހެނަކު މަރުވި މައްސަަލައިގަ އެވެ.
މުޒާހަރާ ބޮޑެތި ސިޓީތަކުން ފެށިގެން ކުޑަ އަވަށްތަކަށް ފެތުރިގެން ގޮސް އާއްމުންނާއި ސަލާމަތީ ފައުޖުތަކާ ދެމެދު ބޮޑެތި ކުރިމަތިލުންތައް ހިނގާފައިވެ އެވެ.
މިހާތަނަށް 326 މީހުން މަރުވެފައިވާ އިރު، އޭގެ ތެރޭގައި 43 ކުދިންނާއި 25 އަންހެނުން ހިމެނެ އެވެ. އިތުރު 15،800 މީހުން ތިބީ ހައްޔަރުކޮށްފަ އެވެ.
އިރާނުގެ ސަަރުކާރުން ސިފަކުރާ ގޮތުގައި ގައުމުގައި "ހަމަނުޖެހުން" ހިންގަމުން ދަނީ ބޭރުގެ ދުޝްމަނުންގެ ރޭވުމެއްގެ ދަށުންނެވެ.
