އިރާނުގައި ފުލުހުން ހައްޔަރު ކުރި އަންހެނަކު މަރުވި މައްސަލައިގައި ފެށި މުޒާހަރާތަކާ ގުޅިގެން މިހާތަނަށް 750 މީހުންނާ ދެކޮޅަށް ދައުވާ އުފުލައިފި އެވެ.
ތިން ޕްރޮވިންސެއްގެ 750 މީހުންނާ ދެކޮޅަށް ދައުވާ އުފުލި އިރު، އޭގެ ކުރިން ވެރިރަށް ތެހްރާނުގައި ވެސް 2000 މީހުންނާ ދެކޮޅަށް ދައުވާ އުފުލި އެވެ.
ސެޕްޓެމްބަރު މަހުގެ މެދުތެރޭގައި ފެށި މުޒާހަރާތަކުގައި ގިނަ އަދަދެއްގެ މީހުން މަރުވެފައިވާ އިރު، އޭގެ ތެރޭގައި ސެކިއުރިޓީ ފައުޖުގެ މެމްބަރުން ވެސް ހިމެނެ އެވެ.
ދެކުނު ހޮރްމޮޒްގާން ޕްރޮވިންސްގެ ޖުޑީޝަލް ޗީފް މޮޖްތަބާ ގަހްރެމާނީ ވިދާޅުވީ "ގައުމުގައި ހިންގަމުންދާ ހަމަނުޖެހުންތަކާ ގުޅިގެން" 164 މީހުންނާ ދެކޮޅަށް ދައުވާ އުފުލާފައިވާ ކަމަށެވެ.
އެ މީހުންނާ ދެކޮޅަށް އުފުލި ދައުވާތަކުގެ ތެރޭގައި މީހުން މެރުމަށް ހިތްވަރު ދިނުމާއި، ސަލާމަތީ ފައުޖަށް ގެއްލުން ދިނުމާއި، ސަރުކާރާ ދެކޮޅު ޕްރޮޕެގެންޑާ ފެތުރުމާއި، އާއްމު މުދަލަށް ގެއްލުން ދިނުން ހިމެނެ އެވެ.
އިތުރު 276 މީހުންނާ ދެކޮޅަށް ދައުވާ އުފުލީ މެދުތެރޭގައި އޮންނަ މަރްކަޒީ ޕްރޮވިންސްގަ އެވެ. އެ ޕްރޮވިންސްގެ 100 އެއްހާ ޒުވާނުން ފުލުހުންގެ ބަންދުން ދޫކޮށްލީ މުޒާހަރާ ނުކުރަން ޝަރުތުކޮށްފަ އެވެ.
މެދުތެރޭގައި އޮންނަ އިސްފަހާން ޕްރޮވިންސްގެ ޖުޑީޝަލް ޗީފް އަސަދުﷲ ޖައުފަރީ ވިދާޅުވީ 316 މީހުންނާ ދެކޮޅަށް ދައުވާ އުފުލި ކަމަށެވެ.
މަހްސާ އާމިނީ ނަމަކަށް ކިޔާ ޒުވާން އަންހެނަކު ސެޕްޓެމްބަރު 16 ވަނަ ދުވަހު މަރުވީ ބުރުގާ ނާޅައި ހުރުމުން އޭނާ ހައްޔަރު ކުރި ފަހުންނެވެ.
