ތުރުކީގެ އިސްތަންބޫލުގެ މެދުތެރޭގައި ކާރޫބާރޫ ބޮޑު ސަރަހައްދެއްގައި އެއްޗެއް ގޮވައި ހަ މީހުން މަރުވެ 81 މީހުންނަށް އަނިޔާވެއްޖެ އެވެ.
އެ ހާދިސާ ހިނގީ ތުރުކީގެ ގަޑިން ހަވީރު 04:20 ހާއިރު ތަކްސިމް މައިދާން ކައިރީގައި ވިޔަފާރި ކުރަން މަގްބޫލު މަގެއްގައި ކަމަށް އިސްތަންބޫލުގެ ގަވަރުނަރު އަލީ ޔެރްލިކަޔާ ވިދާޅުވި އެވެ.
ނައިބު ރައީސް ފުއާތް އޮކްތޭ ވިދާޅުވީ ބެލެވޭ ގޮތުގައި އެއީ އަންހެން މީހަކު ދިން ޓެރަރިސްޓު ހަމަލާއެކެވެ. ރައީސް ތައްޔިބް އުރުދުގާން ވިދާޅުވީ އެކަން ކުރި މީހުންނަށް އަދަބު ދޭނެ ކަމަށެވެ.
ރިޕޯޓުތައް ބުނާ ގޮތުން ހަމަލާއަށް ފަހު އިސްތިކްލާލް މަގާއި ވަށައިގެންވާ ސަރަހައްދުގައި ގިނަ އަދަދެއްގެ ފުލުހުން ހަރަކާތްތެރިވަމުންދެ އެވެ.
އާއްމު ގޮތެއްގައި އަބަދުވެސް ފުރިފައި އޮންނަ މަގުގެ ފިހާރަތައް ހިންގާ މީހުން ތިބީ ޝޮކެއްގަ އެވެ. ރިޕޯޓުތައް ބުނާ ގޮތުން ބާރުގަދަ ގޮވުމެއްގެ އަޑަށް ފަހު ކަޅު ދުންތަކެއް އެރި އެވެ.
އޭގެ ފަހުން ފެނުނީ ބިންމައްޗަށް ގިނަ ބަޔަކު ވެއްޓިފައި ތިއްބަ އެވެ. މީގެ ކުރިން 2016 ވަނަ އަހަރު ވެސް އެ މަގަށް އަމާޒުކޮށް ހަމަލާއެއް ދިނެވެ.
