ފަސް ވިކެޓުން ޕާކިސްތާން ބަލިކޮށް އިންގްލެންޑުން ޓީ20 ކްރިކެޓް ވޯލްޑް ކަޕްގެ ޗެމްޕިއަންކަން މިއަދު ހޯދައިފި އެވެ.
މި ކާމިޔާބީއާ އެކު އިންގްލެންޑުން ވަނީ ވެސްޓް އިންޑީސްގެ ރެކޯޑާ ހަމަކޮށްފަ އެވެ. ޓީ20 ވޯލްޑް ކަޕް 2007 ވަނަ އަހަރު ފެށި ފަހުން މި މުބާރާތް ދެ ފަހަރު ކާމިޔާބުކުރުމުގެ ރެކޯޑް މިހާރު އޮތީ ވެސްޓް އިންޑީސް އާއި އިންގްލެންޑް އަތުގަ އެވެ. އިންގްލެންޑުން ވަނީ މީގެ ކުރިން 2010 ވަނަ އަހަރު ވެސް މި މުބާރާތުގެ ތަށި އުފުލާލައިފަ އެވެ.
ޕާކިސްތާނުން 2009 ވަނަ އަހަރުގެ ފަހުން ކުޅުނު ފުރަތަމަ ޓީ20 ވޯލްޑް ކަޕް ފައިނަލުގައި މިއަދު ފުރަތަމަ ޖެހުނީ ކުޅެން އަރާށެވެ. އެއީ އިންގްލެންޑަށް ޓޮސް ދިމާވުމުން އެ ޓީމުން ނިންމީ ފީލްޑް ކުރަން ކަމަށްވާތީ އެވެ. ހަނި ފުރުސަތެއްގައި ފައިނަލަށް ދަތުރުކުރި ޕާކިސްތާނުން ކުޅެން އަރައި، 20 އޯވަރު ހަމަވިއިރު، އަށް ކުޅުންތެރިން ނުބައިވެގެން ހެދުނީ 137 ލަނޑެވެ.
އިންގްލެންޑްގެ ބެން ސްޓޯކްސް އެ ޓީމުގެ ލިއަމް ލިވިންސްޓޯންއާ އެކު އުފާފާޅުކުރަނީ.
މި އިނިންސްގައި އިންގްލެންޑްގެ ސޭމް ކުރަން ވަނީ ތިން ވިކެޓް ނަގައިފަ އެވެ. އާދިލް ރާޝިދު އާއި ކްރިސް ޖޯޑަން ކޮންމެ ކުޅުންތެރިއަކު ދެ ވިކެޓް ނެގި އެވެ. ޕާކިސްތާނަށް އެންމެ ރަނގަޅު ކުޅުމެއް ދެއްކީ، 28 ބޯޅައިން 38 ލަނޑު ހެދި، ޝާން މައްސޫދު އެވެ. ޕާކިސްތާނަށް ޕްރެޝަރު ބޮޑުވީ، މުހައްމަދު ރިޒްވާން އާއި ބާބަރު އާޒަމް އަށް ނުކުޅެވި ފައިބަން ޖެހުމުންނެވެ. ބާބަރަށް އެއްކުރެވުނީ 32 ލަނޑެވެ. އަދި ރިޒްވާނަށް ހޯދުނީ 15 ލަނޑެވެ.
ޖަވާބުގައި އިންގްލެންޑުން ކުޅެން އަރައި، 19 އޯވަރުގެ ތެރޭގައި ފަސް ކުޅުންތެރިން ނުބައިވިއިރު، 138 ލަނޑު ހަަމަކޮށް މެޗުން މޮޅުވީ އެވެ. އިންގްލެންޑުން ކުޅެން އަރައި، ފުރަތަމަ ޕްރެޝަރު ވަގުތުކޮޅެއް ދިޔަ އެވެ. އެއީ އިންޑިއާ މެޗުގައި ތަފާތު ދެއްކި، އިންގްލެންޑްގެ ކެޕްޓަން، ޖޯޝް ބަޓްލާ އާއި އަލެކްސް ހޭލްސް އަށް ރަނގަޅު ޕާޓްނަޝިޕެއްގައި ކުޅެން ނުފެށި އަވަަހަށް ނުބައިވުމުންނެވެ. ބަޓްލާ 26 ލަނޑަށް ނުބައިވިއިރު، ހޭލްސް އަށް އެއްކުރެވުނީ އެންމެ ލަނޑެކެވެ.
އިންގްލެންޑް މޮޅުކޮށްދޭން ތަފާތު ދެއްކީ ބެން ސްޓޯކްސް އެވެ. އޭނާ ވަނީ ނުބައިނުވެ، 49 ބޯޅައިން 52 ލަނޑު ހަދައިފަ އެވެ. ޕާކިސްތާންގެ ހާރިސް ރައުފް ވަނީ ދެ ވިކެޓް ނަގައިފަ އެވެ.
