ވޮޝިންޓަން، އެމެރިކާ (ނޮވެމްބަރު 12) - ހަނދަށް ދާން އެމެރިކާގެ ޖައްވީ އިދާރާ ނާސާއިން އުފެއްދި އާ، ބިޔަ ރޮކެޓު ސްޕޭސް ލޯންޗް ސިސްޓަމް (އެސްއެލްއެސް) ލޯންޗު ކުރުން ތިން ފަހަރަށް ފަސް ކުރުމަށް ފަހު، ބުދަ ދުވަހު މިޝަން ފަށަން ނިންމައިފި އެވެ.
އެއީ މިހާތަނަށް ނާސާއިން އުފެއްދި އެންމެ ބިޔަަ އަދި ބާރުގަދަ ރޮކެޓެވެ. މިހާރު ނިންމާފައި ވަނީ ބުދަ ދުވަހު ޖީއެމްޓީ ގަޑިން ހެނދުނު 06:04 ގައި ރޮކެޓު ލޯންޗު ކުރުމަށެވެ. އާޓެމިސް 1 މިޝަންގައި އެއްވެސް އެސްޓްރޮނޯޓަކު ޖައްވަށް ނުދާނެ އެވެ.
އެ ރޮކެޓު ޖައްވަށް ދަތުރުކޮށް، ދުނިޔެއާ ވަރަށް ދުރުން އޮރަޔޯން ނަމަކަށް ކިޔާ ކެޕްސޫލެއް ދޫކުރަން ހަމަޖެހިފައިވެ އެވެ. އޭގެ ފަހުން ހަނދު ވަށައި ބުރު ޖެހުމަށް ފަހު ދުނިޔެއަށް ދަަތުރުކޮށް، ޕެސިފިކް ކަނޑުގެ ހިސާބަކަށް ތިރިކުރާނީ ހަ ހަފުތާ ފަހުންނެވެ.
ނާސާގެ އޮފިޝަލް ޖިމް ފްރީ ވިދާޅުވީ ބުދަ ދުވަހު ރޮކެޓް ލޯންޗު ކުރުމުގެ ކުރިން އަދިވެސް ބައެއް މަސައްކަތްތައް ކުރަން ޖެހޭ ކަމަށެވެ. އެގޮތުން ރޮކެޓަށް ބާރު ދީގެން ބައެއް ޓެކްނިކަލް ޓެސްޓުތައް ކުރިއަށް ގެންދަން ހަމަޖެހިފައިވެ އެވެ.
އޭނާ ވިދާޅުވީ ބުދަ ދުވަހު ލޯންޗު ނުކުރެވިއްޖެ ނަމަ ދެން ބަލާނީ ނޮވެމްބަރު 19 ނުވަތަ ނޮވެމްބަރު 25 ގައި މިޝަން ފެށުމަށް ކަމަށެވެ. މި ދަތުރުގައި ކަންކަން ރަނގަޅަށް ގޮސްފި ނަމަ 2024 އިން ފެށިގެން ހިންގާ މިޝަންތަކުގައި އެސްޓްރޮނޯޓުން ބައިވެރިވާނެ އެވެ.
