އައްޑު އަށް ދަތުރުކުރަމުން ދިޔަ ކޮޅުވެއްޓި މިއަދު ބަންޑުން ޖަހާލީ އެ އުޅަނދު ފަޅައިގެން ގޮސް ދިޔަވެގެން ކަމަށާއި ބަންޑުން ޖަހާލުމަށް ނެގީ ކުޑަ ހިނދުކޮޅެއް ކަމަށް، ސަލާމަތްވި މީހުންނާ ހަވާލާދީ ސީވީޑު ދޯނީގެ ކެޔޮޅު ބުނެފި އެވެ.
ލިއޯ ޓްރޭޑިންގެ 250 މެޓްރިކް ޓަނުގެ "ލިއޯ ސަކްސެސް" ކޮޅުވެއްޓި މިއަދު ހެނދުނު ބަންޑުން ޖަހާލީ އަށް ކޮންޓެއިނަރުގެ މުދާ އަރުވައިގެން އައްޑުއަށް ދަތުރުކުރަމުން ދަނިކޮށް ގދ. ވާދޫގެ 12 މޭލު ބޭރަށެވެ. އެ އުޅަނދު ބަންޑުން ޖަހާލާފައި އޮއްވާ ފެނިގެން އެންމެ ފުރަތަމަ އެ ސަރަހައްދަށް ގޮސް މީހުން ސަލާމަތް ކުރީ، މަހަށް ނުކުމެ އުޅުނު ގއ. ވާދޫ ސީވީޑް ދޯނިންނެވެ.
އެ ދޯނީގެ ކެޔޮޅު، މުހައްމަދު އަރުޝަމް "އަދަދު" ނޫހަށް ބުނީ ކޮޅުވެއްޓި ބަންޑުން ޖަހާލުމުގެ ކުރިން ވެސް އެ ދޯންޏަށް އެ އުޅަނދު ފެންނަ ކަމަށެވެ.
އިރުކޮޅަކުން އަހަރުމެންނަށް ފެނުނީ އޭތި ބަންޑުން ޖަހާލާފަައި އޮއްވާ. ކިހިނެއް ވީތޯ ޔަގީން ކޮށްލަން ދުރުމީ އަޅައިލި އިރު ތިން މީހަކު އޭގެ މަތީގައި ތިއްބާ ފެނުނީ،" އޭނާ ބުންޏެވެ.
އެ ދޯނިން ކޮޅުވެއްޓިއާ ކައިރިކޮށް އޭގެ މަތީގައި ތިބި ތިން މީހުން ދޯންޏަށް ނެގި އެވެ.
އެ މީހުންނާ ހަވާލާދީ އަރުޝަމް ބުނީ، ކޮޅުވެއްޓި ބަންޑުން ޖަހާލީ ހެނދުނު 10:00 ހާއިރު ކަމަށެވެ. އަދި އޭގެ އެއް ފަޅުވެރިޔަކު މަދުކަމަށް ބުނުމުން، އެ މީހާ ހޯދުމުގެ މަސައްކަތް ފެށި ކަމަށާއި ހައެއްކަ މޭލުގެ ސަރަހައްދެއް އެ ދޯނިން ބެލި ކަމަށް އޭނާ ބުންޏެވެ.
ކޮޅުވެއްޓިން ގެއްލުނީ އިންޑިއާ ރައްޔިތެއްކަމަށް ލިއޯ ޓްރޭޑިން ކޮމްޕެނީ ބުނެ އެވެ. އިތުރު މައުލޫމާތެއް އެ ކުންފުނިން ނުދެ އެވެ.
"އޭނާ ހޯދާތާ ގާތްގަނޑަކަށް ދޮޅުގަޑިއިރެއް ހާއިރުވީ ފަހުން ކޯސްޓުގާޑަށް އާދެވުނީ، އެ ހިސާބުން ސަލާމަތްވި ތިން މީހުން އަހަރުމެން ސިފައިންނާ ހަވާލު ކުރީ،" އޭނާ ބުންޏެވެ.
އެ ތިން މީހުންގެ ހާލު ރަނގަޅު ކަމަށާއި އެ އެންމެން މިއަދު ހަވީރު ގދ. ވާދޫއަށް ގެންގޮސްފައިވާ ކަމަށް އެމްއެންޑީއެފުން ބުނެ އެވެ.
ސަލާމަތްވި މީހުންނާ ހަވާލާދީ އަރުޝަމް ބުނީ ގެއްލުނު މީހާ އެންމެ ފަހުން އެ މީހުންނަށް ފެނިފައި ވަނީ ކޮޅުވެއްޓީގައި ހުރި ކޮންޓޭނަރުތަކާއި ގެގަނޑާއި ދެމެދުގައި ހުއްޓާ ކަމަށެވެ. އޭރު އޭނާ އަތުގައި ލައިފް ބޮއެއް އޮތް ކަމަށް އެ މީހުން ބުނެ އެވެ.
އެ މީހާ ހޯދުމުގެ މަސައްކަތް ކުރަމުން ދިޔައިރު އެ ލައިފް ބޮއެ ފެނިފައިވާ ކަމަށް އަރުޝަމް ބުންޏެވެ. ނަމަވެސް މީހާ އަދި ނުފެނެ އެވެ.
އެ މީހުން ބުނީ ބޮޑަށް ލަފާ ކުރެވެނީ އެއްޗެހި ތަކެއް ބަލައި ކޮޓަރިއަށް ވަނީ ކަމަށޯ، އޭނަ އަދި އެއަށް އެރިތާ މާގިނަ ދުވަހެއް ނުވާނެޔޯ، ހަތަރު ފަސްދުވަހޯ ވާނީ،" ކޮޅުވެއްޓި ގެއްލުނު މީހާއާ ބެހޭ ގޮތުން ލިބުނު މައުލޫމާތު ހިއްސާ ކުރަމުން އަރުޝަމް ބުންޏެވެ.
ކޮޅުވެއްޓި ބަންޑުން ޖަހާލީ އޭގެ އެއް ފަރާތުގެ ޓޭންކެއް ފަޅައިގެންގޮސް ދިޔަ ވެގެން ކަމަށާއި ދިޔަވެ، ބަންޑުން ޖަހާލަން ގިނަ ވަގުތެއް ނުނަގާ ކަމަށް އެ އުޅަނދުގެ ފަޅުވެރިން ބުނި ކަމަށް އަރުޝަމް ބުންޏެވެ.
އެމްއެންޑީއެފުން ބުނި ގޮތުގައި ކޮޅުވެއްޓި ބަންޑުން ޖަހާލި ކަމުގެ ރިޕޯޓު ލިބުނީ 12:50 ހާއިރު އެވެ. އެ ރިޕޯޓު ލިބުމާއެކު، އެ ގެއްލުނު މީހާ ހޯދުމަށާއި ސަލާމަތްވި މީހުން ވާދޫއަށް ގެންދިއުމުގެ މަސައްކަތް ފެށި ކަމަށް އެމްއެންޑީއެފުން ބުނެ އެވެ. މި އޮޕަރޭޝަންގައި އެ ވަގުތުން ފެށިގެން ސަދާން އޭރިއާއިން ހަރަކާތްތެރިވާން ފެށި ކަމަށާއި އެ އޮޕަރޭޝަންގައި ކޯސްޓްގާޑުގެ ދެ އުޅަނދެއް ހަރަކާތްތެރިވެ އެވެ.
