ޓްވިޓާގެ ވެރިޔާ ބިލިއަނަރު އެލޮން މަސްކްއަކީ ގާނޫނަށް ވުރެ މަތީގައި ހުރި މީހެއް ނޫން ކަމަށް ބުނެ އެމެރިކާގެ ފެޑެރަލް ޓްރޭޑް ކޮމިޝަން (އެފްޓީސީ) އިން އިންޒާރު ދީފި އެވެ.
ރިޕޯޓުތައް ބުނާ ގޮތުން ޓްވިޓާގެ ގިނަ އިސް ބަޔަކު ވަނީ އިސްތިއުފާ ދީފަ އެވެ. އެއީ ޕްރައިވެސީ އާއި ކޮމްޕްލަޔަންސްގެ ކަންކަމާ ގުޅޭ އޮފިސަރުންނެވެ.
އެފްޓީސީއިން ބުނީ އެކަމާ މެދު "ނުހަނު ކަންބޮޑުވާ" ކަމަށާއި ކުންފުނީގެ އާ ސީއީއޯ މަސްކްއަކީ "ގާނޫނަށް ވުރެ މަތީގައި ހުރި މީހެއް ނޫން" ކަމަށެވެ.
ކުންފުންޏަށް މުހިއްމު ގިނަ ބަޔަކު އިސްތިއުފާ ދީފައިވާ އިރު، އާމްދަނީއަށް ވުރެ ހަރަދު އިތުރުވަމުންދާ ނަމަ ޓްވިޓާ ބަނގުރޫޓުވުމުގެ ފުރުސަތު ބޮޑުކަމަށް މަސްކް މުވައްޒަފުންނަށް އެންގި އެވެ.
މިދިޔަ ހަފުތާގައި ކުންފުނިން އެތައް ހާސް މުވައްޒަފުން ވަކިކުރުމާ އެކު، ޓްވިޓާގެ ކުރިމަގާ މެދު ގިނަ ސުވާލުތަކެއް ވަނީ އުފެދިފަ އެވެ.
ޕްރައިވެސީ އާއި ކޮމްޕްލަޔަންސްގެ ކަންކަން ބަލަހައްޓާ ވެރިން އިސްތިއުފާ ދިނުމުން، ރެގިއުލޭޓަރީ އިދާރާތަކުގެ އުސޫލާ ހިލާފަށް ޓްވިޓާއިން އަމަލު ކުރުމުގެ ފުރުސަތު ބޮޑުވެ އެވެ.
މިދިޔަ މޭ މަހު ޓްވިޓާ ބޭނުން ކުރާ މީހުންގެ ޑޭޓާ ވިއްކިކަން ސާބިތުވެ، އެ ކުންފުނި 150 މިލިއަން ޑޮލަރުން ޖޫރިމަނާކޮށް، ޕްރައިވެސީއާ ގުޅޭ އާ އުސޫލުތަކެއް ހެދި އެވެ.
