ގިނަ އަހަރުތަކަކަށް ފަހު ރާއްޖެ އިސްލާމް ކުރެއްވި އަބުލް ބަރަކާތުލް ޔޫސުފުލް ބަރުބަރީ ފަސްދާނުލެވިފައިވާ މެދުޒިޔާރަތުގައި ދިދަ ނަގަން ފެށުމާ އެކު އަމާޒުވި ފާޑުކިޔުންތައް އާޓްސް އެންޑް ކަލްޗާ މިނިސްޓަރު ޔުމްނާ މައުމޫން ރައްދު ދެއްވައިފި އެވެ.
އިއްޔެ މެދުޒިޔާރަތުގައި އަލުން ދިދަ ނަގާފައިވަނީ އެއިރުގެ ފޮޓޯތަކުން ފެންނަން ހުރި ގޮތަށް ތިން ކަން ލާފައި ހުރި ބޮޑު ދިދައަކާއި ކުދި ދިދަ އެކެވެ. ދިދައިގެ ވަށައިގެން ހުންނަނީ ގައުމީ ކުލަތަކުގެ ބޯޑަރެއް ލައިފަ އެވެ. ބޮޑު އެއް ދިދައިގެ އިތުރުން ދެން ޖަހާފައިވަނީ މެދު ސައިޒުގެ 10 ދިދައާއި ޒިޔާރަތުގެ ވަށައިގެން ކުޑަ 24 ދިދަ އެވެ.
މި ދިދަތައް ނެގުމާ އެކު ބައެއް ފަރާތްތަކުން ވަނީ ވަރަށް ބޮޑަށް ސަރުކާރަށް ފާޑުކިޔާފަ އެވެ. އެގޮތުން، އެއީ ސަގާފީ ކަމެއް ނޫން ކަމަށާއި އެއީ އެއީ މުންކަރާތެއް ދިރުވުމަށް ކުރަމުންދާ ކަމެއް ކަމަށް ބުނެފަ އެވެ. އިސްލާމް ދީނުގައި އެކަމަށް ހުއްދަ ދީފައި ނުވާ ކަމަށް ވެސް ދީނީ ބައެއް އިލްމުވެރިން ވަނީ ބުނެފަ އެވެ.
އެއާއެކު، 24 ގަޑިއިރު ނުވަނީސް ސަރުކާރުން ވަނީ ދިދަތައް ބާލާފަ އެވެ. "އަދަދު" އަށް އެނގިފައިވާ ގޮތުގައި ސަރުކާރުން ދިދަތައް ނަގަން އެންގީ ފާޑުކިޔުންތައް ގިނަވެ ޕްރެޝަރު ބޮޑުވުމުންނެވެ.
"މިއީ އެއްވެސް ގޮތަކަށް ދީނީ ކަމެއްގެ ގޮތުގައި ކުރާ ކަމެއް ނޫން. ސަގާފީ ކަމެއް،" ފާޑުކިޔުންތަކަށް ރައްދު ދެއްވައި ޔުމްނާ ކުރެއްވި ޓްވީޓެއްގައި ވިދާޅުވި އެވެ.
އެ ދިދަތައް ޖެހީ ޒިޔާރަތްތަކާއި އާސާރީ ތަންތަން އިހު ހުރި ގޮތަށް އާންމުންނަށް ދައްކާލުމުގެ މަގުސަދުގައި ކަމަށް ސަރުކާރުން ކުރިން ހާމަކޮށްފައިވެ އެވެ.
"މެދުޒިޔާރަތް ފަދަ އާސާރީ ބިނާތަކުގެ އާބާތުރަފިލުވައި ޖުމްހޫރީ ދުވަސް ފަދަ ގައުމީ މުނާސަބަތުތަކުގައި އެ ތަންތާ ދިދަ ނެގުމަކީ ދިވެހީންގެ ސަގާފަތް ދިރުވާ ގައުމީ ޖޯޝު އުފެދިގެންދާނެ ކަމެއް. އެއީ އެ ފަދަ އާސާރުތައް ބަލައިލުމަށް ދިވެހީންގެ އަދި ފަތުރުވެރީން ޝައުގުވެރިވާނެ ކަމެއް،" ޔުމްނާ ވިދާޅުވެފައިވެ އެވެ.
މެދުޒިޔާރަތަށް މެދުޒިޔާރަތް ކިޔަން ފެށުނީ އެދުވަސްވަރު މާލޭގެ ބިން އޮތް ގޮތުން އެ ޒިޔާރަތް މާލޭގެ މެދުގައި ހުރުމުން ކަމަށް ތާރީހީ ލިޔުންތައް ބުނެ އެވެ. މެދުޒިޔާރަތް މިހާރު އެހުރި ގޮތަށް ހެއްދެވީ ޝަމްސުއްދީން ރަދުންގެ ރަސްކަމުގައި އަބްދުލްމަޖީދު ރަންނަބަނޑޭރިކިލެގެފާނެވެ.
އިހުގައި ދިވެހިންގެ މެދުގައި އޮތް ޒިޔާރަތްތަކަށް ނަދުރު ބުނުމުގެ ސަގާފަތުގެ ތެރެއިންް މެދުޒިޔާރަތުގައި ވެސް އެކަން ހިނގަމުން އައެވެ. ސަރުކާރުން އެކަން މަނާކުރީ 1957 ވަނަ އަަހަރު އެވެ.
