ލަންޑަން (ނޮވެމްބަރު 11) - އިނގިރޭސި ލީގު ކަޕްގެ ހަތަރު ވަނަ ބުރުގައި އެންމެ ފަހުގެ ޗެމްޕިއަން ލިވަޕޫލާއި މެންޗެސްޓާ ސިޓީ ބައްދަލުކުރަން ޖެހިއްޖެ އެވެ.
ލިވަޕޫލަކީ މި މުބާރާތުގެ އެންމެ ކާމިޔާބު ޓީމެވެ. ލިވަޕޫލުން ނުވަ ފަހަރު މުބާރާތުގެ ތަށި އުފުލާލިއިރު، ސިޓީން ވަނީ އަށް ފަހަރު މުބާރާތް ކާމިޔާބުކޮށްފަ އެވެ. ލިވަޕޫލުން ގަދަ 16 ޓީމު ވާދަކުރާ ބުރުން ފުރުސަތު ހޯދީ ޕެނަލްޓީ ޖަހައިގެން، ޑާބީ ކައުންޓީ ބަލިކޮށްގެންނެވެ. ސިޓީ ވަނީ އަމިއްލަ ދަނޑުގައި ކުޅުނު މެޗުން ޗެލްސީ ކަޓުވާލައިފަ އެވެ.
މި ސީޒަނުގައި މިހާތަނަށް ލިވަޕޫލުން ވަނީ ދެ ފަހަރެއްގެ މަތިން ސިޓީ ބަލިކޮށްފަ އެވެ. ފުރަތަމަ ބައްދަލުކުރީ ސީޒަން ހުޅުވަން ކުޅޭ ޗެރިޓީ ޝީލްޑް މެޗުގަ އެވެ. އެ މެޗުން ލިވަޕޫލް މޮޅުވީ 3-1 އިންނެވެ. އަދި އޭގެ ފަހުން އިނގިރޭސި ޕްރިމިއާ ލީގުގައި ސިޓީ އަތުން ލިވަޕޫލް ވަނީ 1-0 އިން މޮޅުވެފަ އެވެ.
މެންޗެސްޓާ ޔުނައިޓެޑް ނުކުންނާނީ ބާންލީއާ ދެކޮޅަށެވެ. ޔުނައިޓެޑުން ހަތަރު ވަނަ ބުުރުގެ ފުރުސަތު ހޯދީ ރޭ ކުޅުނު މެޗުން އެސްޓަން ވިލާ އަތުން 4-2 އިން މޮޅުވެގެންނެވެ. ޔުނައިޓެޑަށް ރޭގެ މެޗުގައި ގޯލުތައް ޖަހައިދިނީ އެންތަނީ މާޝިއަލް، މާކަސް ރެޝްފޯޑް، ބްރޫނޯ ފެނާންޑޭސް އަދި ސްކޮޓް މެކްޓޮމިނޭ އެވެ. އަދި އެސްޓަން ވިލާގެ ފުރަތަމަ ގޯލު އޮލީ ވަޓްކިންސް ޖެހިިއިރު، އަނެއް ގޯލަކީ ޔުނައިޓެޑްގެ ޑިއޯގޯ ޑަލޯ އަތުން ބައިކޮޅަށް ވަން ގޯލެކެވެ.
ޔުނައިޓެޑާ ދެކޮޅަށް ކުޅޭ ބާންލީން ވަނީ ތިން ވަނަ ބުރުގައި ކްރޯލީ ޓައުން ބަލިކޮށްފަ އެވެ. ބާންލީގެ ކޯޗަކަށް ހުރީ ސިޓީގެ ކުރީގެ ޑިފެންޑަރު، ވިންސެންޓް ކޮމްޕެނީ އެވެ.
ލީގު ކަޕްގެ ގަދަ 16 ބުރުގައި ދެން ކުޅޭ މެޗުތަކަށް ބަލާއިރު، ވުލްވްސް ކުޅޭނީ ގިލިންހަމްއާ އެވެ. ސައުތެމްޓަނުން ލިންކަން ސިޓީއާ ބައްދަލުކުރާއިރު، ބްލެކްބާން ކުޅޭނީ ނޮޓިންހަމް ފޮރެސްޓާ އެވެ. ނިއުކާސަލާއި ބޯންމައުތު ބައްދަލުކުރާއިރު، ލެސްޓާ ނުކުންނާނީ އެމްކޭ ޑޯންސާ ދެކޮޅަށެވެ. އަދި އާސެނަލް ކަޓުވާލި ބްރައިޓަން އިން ދެން ކުޅެން ޖެހެނީ ޗާލްޓަންއާ އެވެ.
ލީގު ކަޕްގެ ހަތަރު ވަނަ ބުރުުގެ މެޗުތައް އޮތީ ވޯލްޑް ކަޕް ފައިނަލް ކުޅޭތާ ދެ ދުވަސް ފަހުން، ޑިސެމްބަރު 20 ވަނަ ދުވަހު އެވެ.
