އެމެރިކާގެ ދައުރު މެދުތެރެއިން ބޭއްވި އިންތިހާބުގެ ނަތީޖާ އުއްމީދު ކުރި ވަރަށް ވުރެ ރަނގަޅު ކަމަށް ރައީސް ޖޯ ބައިޑެން ވިދާޅުވެއްޖެ އެވެ.
މިހާތަނަށް ލިބުނު ނަތީޖާއަށް ބަލާއިރު، ކޮންގްރެސްގައި ހިމެނޭ ހައުސް އޮފް ރެޕްރެޒެންޓޭޓިވްސްގެ ކޮންޓްރޯލް އިދިކޮޅު ރިޕަބްލިކަން ޕާޓީއަށް ލިބޭނެ ކަމަށް ބެލެވެ އެވެ.
ކޮންގްރެސްގައި ހިމެނޭ ސެނެޓުގެ ނަތީޖާ މިހާތަނަށް ދައްކަނީ ވަރަށް ވާދަވެރިކޮށެވެ. ތިން ގޮނޑިއެއްގެ ނަތީޖާ އަދި ފައިނަލް ނުވާ އިރު، ދެ ޕާޓީއަށް ވެސް ވޯޓު ލިބުނީ ދާދި އެއްވަރަކަށެވެ.
އާއްމު ގޮތެއްގައި ވެސް އެމެރިކާގެ ރައީސެއްގެ ފުރަތަމަ ދަައުރުގައި މެދުތެރޭ އިންތިހާބުން ރައީސްގެ ޕާޓީއަށް ކާމިޔާބެއް ނުލިބެ އެވެ. މި ވަގުތު ރައީސްކަމުގައި ހުންނެވި ބައިޑެންއަކީ ޑިމޮކްރެޓިކް ޕާޓީގެ ބޭފުޅެކެވެ.
އެމެރިކާގެ އިންފްލޭޝަން 40 އަހަރުގެ ތެރޭގައި މަތިނުވާ މިންވަރަށް މަތިވެފައި ވާތީ ރިޕަބްލިކަން ޕާޓީއިން އުއްމީދު ކުރީ ފަސޭހަކަމާ އެކު ކުރި ލިބޭނެ ކަމަށެވެ.
އެހެން ނަމަވެސް މިހާތަނަށް ނަތީޖާއިން ދައްކާ ގޮތުގައި ރިޕަބްލިކަނުންނަށް ވެސް މާ ބޮޑު ތާއީދެއް ނެތެވެ. ބޮޑަށް ބެލެވެނީ އެ ޕާޓީއިން އެބޯޝަން މަނާކުރުމަށް ބާރު އަޅާތީ ތާއީދު ކުޑަވި ކަމަށެވެ.
