ލަންޑަން (ނޮވެމްބަރު 10) - އިނގިރޭސި ލީގު ކަޕްގެ ތިން ވަނަ ބުރުގައި ރޭ ލިވަޕޫލާއި މެންޗެސްޓާ ސިޓީ ކުޅުނު މެޗުތަކުން މޮޅުވެ، މުބާރާތުގެ ގަދަ 16 ޓީމުގެ ބުރުން ފުރުސަތު ހޯދިއިރު، ލަންޑަންގެ ފަސް ޓީމެއް ކަޓައިފި އެވެ.
ޒުވާން ގިނަ ކުޅުންތެރިންތަކެއް ހިމަނައިގެން ރޭގެ މެޗަށް ނުކުތް، އެންމެ ފަހުގެ ޗެމްޕިއަން، ލިވަޕޫލް ވަނީ ޕެނަލްޓީ ޖަހައިގެން 3-2 އިން ޑާބީ ކައުންޓީ އަތުން މޮޅުވެފަ އެވެ. މިދިޔަ ހަ ވަރަަކަށް އަހަރު ތެރޭ ގިނަ ފަހަރުތަކެއްގެ މަތިން ލީގު ކަޕް ކާމިޔާބުކުރި، ސިޓީ ވަނީ 2-0 އިން ޗެލްސީ ބަލިކޮށްފަ އެވެ. ޗެލްސީގެ އިތުރުން ލަންޑަނަށް ނިސްބަތްވާ އިތުރު ހަތަރު ޓީމެއް ވަނީ ކަޓައިފަ އެވެ. އެއީ ޕްރިމިއާ ލީގުގެ އެއް ވަނައިގައި އޮތް އާސެނަލް، ވެސްޓް ހޭމް ޔުނައިޓެޑް، ޓޮޓެންހަމް ހޮޓްސްޕާސް އަދި ކްރިސްޓަލް ޕެލަސް އެވެ.
އާސެނަލް ކެޓީ އަމިއްލަ ދަނޑުގައި ބްރައިޓަން އަތުން 3-1 އިން ބަލިވެގެންނެވެ. ވެސްޓް ހޭމް ކެޓީ ބްލެކްބާން ރޯވާސްއާ 2-2 އިން އެއްވަރުވެ، ޕެނަލްޓީ ޖަހައިގެން 10-9 އިން ބަލިވުމުންނެވެ. ނޮޓިންހަމް ފޮރެސްޓް އަތުން 2-0 އިން ބަލިވެގެން ޓޮޓެންހަމް ކެޓިއިރު، ނިއުކާސަލް ޔުނައިޓެޑުން ވަނީ ޕެނަލްޓީ ޖަހައިގެން 3-2 އިން ކްރިސްޓަލް ޕެލަސް ކަޓުވާލައިފަ އެވެ.
ރޭ ސިޓީގެ މާރޭޒް (ކ) ޖެހި ބޯޅައެއް ޗެލްސީގެ ކީޕަރު މެންޑީ މަތަކުރަނީ.
ލިވަޕޫލް ދަނޑުގައި ޕެނަލްޓީ އަށް ދިޔަ މެޗުގައި އެ ޓީމުގެ ތަރި އަކީ މިދިޔަ ސީޒަނުގައި ވެސް މި މުބާރާތުގެ ޕެނަލްޓީތަކުގައި ތަފާތު ދެއްކި ލިވަޕޫލްގެ ދެ ވަނަ ކީޕަރު، ކޮއިމްހިން ކެލަހާ އެވެ. އޭނާ ވަނީ ޑާބީގެ ތިން ޕެނަލްޓީއެއް މަތަކޮށްފަ އެވެ. ލިވަޕޫލުން ނާކާމިޔާބުވީ ބަޖްސެޓިޗް އާއި ރޮބާޓޯ ފިރްމީނޯ ޖެހި ޕެނަލްޓީ އެވެ. އޮކްސްލޭޑް ޗެމްބަލެއިން އާއި ޑާވިން ނޫނޭޒް އަދި ހާވީ އެލިއަޓް ވަނީ ޕެނަލްޓީ ވައްދާލައިފަ އެވެ.
ޗެލްސީގެ ގިނަ ހަމަލާތަކެއް ސިޓީގެ ކީޕަރު ސްޓެފަން އޯޓޭގާ މަތަކުރި މެޗުގައި ސިޓީ އަށް ލީޑުނަގައިދިނީ ހިލޭ ޖެހުމަކުން ރިޔާދު މާރޭޒް އެވެ. އަދި ދެ ވަނަ ލަނޑު މާރޭޒް ދިން ބޯޅައަކުން ޖެހީ ހޫލިއަން އަލްވަރޭޒް އެވެ.
ސިޓީގެ ކޯޗު ޕެޕް ގާޑިއޯލާ، 2016 ވަނަ އަހަރު އެ ޓީމާ ހަވާލުވި ފަހުން އެ ޓީމު ލީގު ކަޕްގެ ތިން ވަނަ ބުރުން ކަޓާފައިނުވެ އެވެ. އަނެއްކޮޅުން ޗެލްސީގެ ކޯޗު ގްރަހަމް ޕޮޓާ އަށް މި ވަނީ އަނެއްކާ ވެސް ނާކާމިޔާބީ އަކާ ކުރިމަތިލާން ޖެހި، ޕްރެޝަރު ބޮޑުވެފަ އެވެ.
އާސެނަލް ދަނޑުގައި އެޑީ އެންކެޓިއޭ އެ ޓީމަށް ލީޑުނަގައިދީފައިވަނިކޮށް ބްރައިޓަން އިން ނަތީޖާ އަނބުރާލީ ފަހަތުން އަރަ އެވެ. ބްރައިޓަންގެ ލަނޑުތައް ޖެހީ ކުރިން އާސެނަލަށް ކުޅުނު އިނގިރޭސި ފޯވާޑް، ޑެނީ ވެލްބެކް އާއި ފަހަކަށް އައިސް ރަނގަޅު ފޯމެއްގައި ކުޅެމުން އަންނަ ޖަޕާންގެ ވިންގް، ކައޯރޫ މިޓޯމާގެ އިތުރުން ގާނާ ގައުމީ ޓީމަށް ބަދަލުވި ފުލްބެކް، ތޯރިގު ލަމްޕްޓޭ އެވެ.
އެންޓޯނިއޯ ކޮންޓޭގެ ކޯޗުކަމުގައި ކުޅޭ ޓޮޓެންހަމް ބަލިވީ ނޮޓިންހަމް ފޮރެސްޓުން ދެ ވަނަ ހާފުގައި ޖެހި ގޯލުތަކުންނެވެ. ދެ ވަނަ ހާފްގައި .ހަތް މިނިޓް ތެރޭގައި ރެނަން ލޯޑީ އާއި ޖެސީ ލިންގާޑް ޖެހި ގޯލުތަކުން ޓޮޓެންހަމްގެ މައްޗަށް ފޮރެސްޓް ކުރިހޯދީ އެވެ.
