މިހާރު ކުރިއަށްދާ ނުވަ ވަނަ އެމްބީއޭ ޗެމްޕިއަންޝިޕްގެ އަންހެން ޑިވިޝަންގައި ސައިކްލޯން ބީސީ އާއި ބެންޗު ސްޕޯޓުން ކުލަބުން، މި ފަހަރުގެ މުބާރާތުގައި އެ ޓީމުތަކުގެ ފުރަތަމަ މޮޅު ހޯދައިފި އެވެ.
މި މަހުގެ ފަސް ވަނަ ދުވަހު ފެށިި އެމްބީއޭ ޗެމްޕިއަންޝިޕުގެ އަންހެން ޑިވިޝަންގައި ވާދަކުރަނީ ހަ ޓީމެކެވެ. އެއީ ސައިކްލޯން، އެލީޓް ސްޕޯޓްސް ކުލަބު، ބެންޗު، ލަޔަނެސް، ރިއިޒިން ބާސްކެޓްބޯޅަ އެކަޑެމީ އަދި ކުއީންސް ބީސީ އެވެ.
މި ހަ ޓީމުގެ ތެރެއިން ފަސް ޓީމަކަށް ދެވަނަ ބުރުގެ ޖާގަ ލިބޭނެ އެވެ. ކަޓާނީ ދެ ފުރަތަމަ ބުރުގެ ގްރޫޕް ސްޓޭޖުން ފުލަށްދާ ދެ ޓީމްގެ މެދުގައި ޕްލޭ އޮފް ކުޅެގެން ބަލިވާ ޓީމެކެވެ.
ސައިކްލޯން ބީސީ އިއްޔެ ކުޅުނު މެޗުން މޮޅުވީ ލަޔަނެސްއާ ވާދަކޮށް 102-23 ޕޮޮއިންޓުންނެވެެ. ޒުވާން ކުޅުންތެރިންގެ މައްޗަށް އެކުލެވޭ ލަޔަނެސް އަތުން ހަތަރު ކުއާޓާގައި ވެސް ސައިކްލޯން އިން ކުރި ހޯދީ ތަފާތު ބޮޑުކޮށެވެ.
މި މެޗުގެ މޮޅު ކުޅުންތެރިޔާގެ މަގާމް ހޯދި ފާތިމަތު ޝައިލާން އަފްޒަލް، ސައިކްލޯން އަށް 24 ޕޮއިންޓް ސްކޯކޮށްދިންއިރު، އައިޝަތު ޒާނާ ވެސް 25 ޕޮއިންޓް ހޯދައިދިނެވެ. މީގެ އިތުރުން ކެޕްޓަން، މަރިޔަމް ސޮފްވަ ހަސަން 14 ޕޮއިންޓް ހޯދައިދިނެވެ.
ލަޔަނެސް ޓީމަށް ބަލާއިރު އެޓީމުން އެންމެ ރަނގަޅު ކުޅުމެއް ދައްކައިދިނީ ޒާނާ ޒާހިދު އެވެ. އޭނާ 10 ޕޮއިންޓް އެއްކޮށްދިންއިރު، މައިހާ ހަސަން މުހައްމަދު ފަސް ޕޮއިންޓް ސްކޯކޮށްދިނެވެ.
ބެންޗުން އެ ޓީމުގެ ފުރަތަމަ މޮޅު ހޯދީ ރައިޒިން ބާސްކެޓްބޯޅަ އެކަޑެމީއާ ވާދަކޮށް 98-18 ޕޮއިންޓުންނެވެ.
މި މެޗުގައި ބެންޗުގެ ފާތިމަތު އިފާ އާތިފް، 29 ޕޮއިންޓް ހޯދައިދިންއިރު، އީމާ އަހުމަދު، 22 ޕޮއިންޓް ސްކޯކުރި އެވެ. މީގެ އިތުރުން އިވާ އަޝްރަފް ވެސް އެޓިމަށް 20 ޕޮއިންޓް ސްކޯކޮށްދިނެވެ.
އެމްބީއޭ ޗެމްޕިއަންޝިޕްގައި މިއަދު ތިން މެޗެއް ކުޅޭނެ އެވެ. ހަވީރު ކުޅޭ މެޗުގައި ސްޕާޓަންސް އާއި ރޯޔަލްސް އެވެ. މިރޭގެ ފުރަތަމަ މެޗުގައި ރެޑްވިންގްސް ބީސީ އާއި ވައިޕާސް ވާދަކުރާއިރު، މިރޭގެ ފަހު މެޗުގައި ސްޓިންގާސް ނުކުންނާނީ ހުޅުމާލެ ސްޕޯޓްސް ކުލަބާއި ދެކޮޅަށެވެ.
