މިހާރު ކުރިއަށްދާ 29 ވަނަ އެމްބީއޭ ޗެމްޕިއަންޝިޕްގެ މެންސް ޑިވިޝަން، ކަޕް ފައިނަލުގައި، ޓީރެކްސް ބާސްކެޓްބޯލް ކްލަބާއި ކިންގްސް ބާސްކެޓްބޯލް ކްލަބުން ކުރިމަތިލާން ޖެހިއްޖެ އެވެ.
މި ދެ ޓީމުން ފައިނަލުގެ ޖާގަ ހޯދާފައިވަނީ އިއްޔެ ކުޅުނު ސެމީ ފައިނަލް މެޗުތަކުން މޮޅުވެގެންނެވެ. އެ ގޮތުން، ސެމީ ފައިނަލުގައި އިއްޔެ ޓީރެކްސް އިން ވަނީ ރެޑްވިންގްސް ބާސްކެޓްބޯލް ކްލަބް އަތުން 76-70 އިން މޮޅުވެފަ އެވެ. އަދި، ކިންގްސް އިން ވަނީ ރެޕްޓާސް ބާސްކެޓްބޯލް ކްލަބް އަތުން 76-50 އިން މޮޅުވެފަ އެވެ.
ޒުވާނުންގެ މަރުކަޒު އެތެރެ ކޯޓުގައި އިއްޔެ ހަވީރު ކުޅުނު ސެމީ ފައިނަލުގެ ފުރަތަމަ ކުއާޓަރު ނިމުނުއިރު، ޓީރެކްސް އާއި ރެޑްވިންގްސް އޮތީ 19-19 އިން އެއްވަރުވެފަ އެވެ. ދެ ވަނަ ކުއާޓަރު ނިމުނުއިރު، ޓީރެކްސް އިން އެއް ޕޮއިންޓުގެ ލީޑެއް ނަގައި، ތިން ވަނަ ކުއާޓަރުގައި އެ ލީޑުފުޅާކުރި އެވެ. ފަހު ކުއާޓަރަށް ބަލާއިރު، ރެޑްވިންގްސްގެ ސްކޯ ރަނގަޅު ނަމަވެސް، ޓީރެކްސް ކައިރިން ނަތީޖާ އަނބުރާލެވޭ ގޮތެއްނުވެ، މެޗުން ބަލިވީ އެވެ.
މި މެޗުގައި އެންމެ ރަނގަޅު ކުޅުމެއް ދެއްކީ، ރެޑްވިންގްސް އަށް މުހައްމަދު ޒީދާން ނައީމް އާއި ޓީރެކްސް އަށް އައިކް އަހުމަދު މައުރޫފް އެވެ.
ރޭ ކުޅުނު ސެމީ ފައިނަލުގައި، ފުރަތަމަ ކުއާޓަރުގައި ރެޕްޓާސް އިން ވަނީ، ލީޑެއް ނަގައިފަ އެވެ. އެއީ، 11-18 އިންނެވެ. އެކަމަކު، ދެ ވަނަ ކުއާޓަރުން ފަށައިގެން ކިންގްސް އިން މެޗުގެ ކޮންޓްރޯލް ނަގައި، ޑޮމިނޭޓް ކުރަން ފެށި އެވެ. ނަތީޖާއެއްގެ ގޮތުން، އެ ރަނގަޅު ކުޅުން ފަހު ތިން ކުއާޓަރުގައި ދަމަހައްޓައި މެޗުން މޮޅުވީ އެވެ.
މި މެޗުގައި ކިންގްސް އަށް އެންމެ ރަނގަޅު ކުޅުމެއް ދައްކައިިދިނީ، މުހައްމަދު ޖިދާދު އިބްރާހިމް އެވެ. އަދި، ރެޕްޓާސް އަށް އެންމެ ރަނގަޅު ކުޅުމެއް ދެއްކީ އަހުމަދު ރާއިދު ސަލީމް އެވެ.
އެމްބީއޭ ޗެމްޕިއަންޝިޕްގެ ކަޕް ފައިނަލް އޮންނާނީ އަންނަ ހުކުރު ދުވަހުގެރޭގަ އެވެ.
