އެމްބީއޭ ޗެމްޕިއަންޝިޕްގެ ތިން ވަނަ ބުރުގައި ވެސް ކިންގްސް ބާސްކެޓްބޯލް ކްލަބް އަތުން މޮޅުވެ، ޓީރެކްސް އިން މުބާރާތުގައި އެ ޓީމުގެ 100 ޕަސެންޓް ރެކޯޑު ދަމަހައްޓައިފި އެވެ.
އެމްބީއޭ ޗެމްޕިއަންޝިޕުގެ ތިން ވަނަ ބުރުގައި ގަދަ ހަތަރު ޓީމު ވާދަކުރާއިރު، ފައިނަލުން ފުރުސަތު ލިބޭނީ ލީގު ބުރުގެ ގަދަ ދެ ޓީމަށެވެ. އަންހެން އަދި ފިރިހެން ފައިނަލް މެޗުތައް ކުޅޭނީ އަންނަ އަންގާރަ ދުވަހު އެވެ. ފިރިހެން ޝީލްޑް ބައިގެ ފައިނަލް އޮންނާނީ އަންނަ ބުދަ ދުވަހުގަ އެވެ.
ފިރިހެން ބައިގެ ތިން ވަނަ ބުރުގައި އެންމެ ފަހުން ކުޅުނު މެޗުގައި ވާދަކުރީ ކިންގްސް ބީސީ އާއި ޓީރެކްސް ބީސީ އެވެ. މި މެޗު 79-61 ޕޮއިންޓުން ކާމިޔާބުކުރީ ޓީރެކްސް އެވެ. މި ދެ ޓީމު ދެ ވަނަ ބުރުގައި ކުޅުނު މެޗުވެސް ކާމިޔާބުކުރީ ޓީރެކްސް އިންނެވެ.
ރޭގެ މެޗުގެ މައިގަނޑު ތަފާތެއްގެ ގޮތުގައި ފެނުނީ ފުރަތަމަ ކުއާޓަރުގަ އެވެ. އެ ގޮތުން މި ކުއާޓާގައި ޓީރެކްސް އިން ނެގި 11 ޕޮއިންޓުގެ ލީޑު މެޗު ނިމެންދެން އެ ޓީމުން ދެހެއްޓި އެވެ. ފަހު ތިން ކުއާޓާގައިވެސް ސްކޯތައް ފެނުނީ ވާދަވެރިކޮށެވެ.
މި މެޗުގައި ޓީރެކްސް ޓީމަށް އެންމެ ގިނަ ޕޮއިންޓް ސްކޯކޮށްދިނީ މުހައްމަދު ހުވައިލިދު އަލީ (ހުވޭ) އެވެ. މީގެ އިތުރުން އަހުމަދު ޒަބީރު 14 ޕޮއިންޓް ސްކޯ ކޮށްދިންއިރު، ޒަކަރިއްޔާ އަބްދުއްލަތީފް 12 ޕޮއިންޓް ސްކޯކޮށްދިނެވެ.
ކިންގްސް އަށް ބަލާއިރު އެހެން މެޗުތަކެކޭ އެއްގޮތަށް މި މެޗުގައިވެސް މުހައްމަދު ސަބީހު ތައުފީގު ރަނގަޅު ކުޅުމެއް ދެއްކި އެވެ. ސަބީހު 12 ޕޮއިންޓް ސްކޯކޮށްދިންއިރު، އަހުމަދު ހުޝާމް (ތުއްބެ) 11 ޕޮއިންޓް ސްކޯކޮށްދިނެވެ.
މި މުބާރާތުގައި ރެޑްވިންގްސް އިން ވަނީ ދެ ވަނަ ބުރުގައި އެ ޓީމުގެ ފުރަތަމަ މޮޅު ހޯދައިފަ އެވެ. ރެޑްވިންގްސް މޮޅުވީ ބައުސް އާ ވާދަކޮށް 77-67 ޕޮއިންޓުންނެވެ. ވާދަވެރި މެޗުގެ އެންމެ ބޮޑު ތަފާތެއް ފެނުނީ ފުރަތަމަ ކުއާޓާގަ އެވެ. އޭގެ ފަހުން ދެ ވަނަ ކުއާޓާގައި ރެޑްވިންގްސް އިން އެ ޓީމުގެ ލީޑު ފުޅާކުރިއިރު، ފަހު ދެ ކުއާޓާގައި ބައުސް އިން ރަނގަޅު ފައިޓެއް ދިނެވެ.
މި މެޗުގައި ރެޑްވިންގްސްގެ ކެޕްޓަން މުހައްމަދު އަޝްމަލް އަހުމަދު 23 ޕޮއިންޓް ސްކޯކޮށްދިންއިރު، މުޅި މެޗު އެއްކޮށް ފުރިހަމަކުރި ޝިރުފާން އަހުމަދު 15 ޕޮއިންޓް ސްކޯކޮށްދިނެވެ. މުޅި މެޗުގައި ޝިރުފާން 23 ރީބައުންޑެއް ނެގި ކަން ފާހަގަކޮށްލެވެ އެވެ.
ބައުސް އަށް ބަލާއިރު، އެ ޓީމަށް އެންމެ ގިނަ ޕޮއިންޓް ސްކޯކޮށްދިނީ 18 ޕޮއިންޓް އެއްކޮށްދިން އިބްރާހިމް ނަސީމް އެވެ. މީގެ އިތުރުން މުހައްމަދު ސަމޫހު 13 އަދި ކެޕްޓަން އަހުމަދު އަދުހަމް 12 ޕޮއިންޓް ސްކޯކޮށްދިނެވެ.
މުބާރާތުގައި މިއަދު ކުރިއަށްދާނީ އަންހެން ޑިވިޝަންގެ ދެ މެޗެވެ. ހަވީރު ކުޅޭ މެޗުގައި އެލީޓް ސްޕޯޓްސް ކުލަބުން ބެންޗް ސްޕޯޓްސް ކުލަބާ ދެކޮޅަށް ނުކުންނައިރު، މިރޭ ކުއީންސް ނުކުންނާނީ ސައިކްލޯން ބީސީ އާ ދެކޮޅަށެވެ.
