ރާއްޖޭގައި އަރަބި ބަހުގެ ތަމްރީނުދޭ މަރުކަޒެއް ގާއިމުކުރުމަށް މިސްރުގެ އަލްއަޒްހަރު ޔުނިވާސިޓީއާ އެކު ދިވެހި ސަރުކާރުން މަޝްވަރާކޮށްފި އެވެ.
މި މަޝްވަރާ ކުރިއަށް ގެންގޮސްފައިވަނި ރައީސުލްޖުމްހޫރިއްޔާގެ ނައިބު ފައިސަލް ނަސީމް މިހާރު މިސްރަށް ކުރައްވަމުން ގެންދަވާ ދަތުރުފުޅުގައި މިއަދު އަލްއަޒްހަރު އަލް ޝާރިފްގެ ގްރޭންޑް އިމާމް، ޕްރޮފެސަރު ޝައިހު އަހުމަދު އަލްތޮއްޔިބާ އެކު ބޭއްވެވި ބައްދަލުކުރެއްވުމުގަ އެވެ.
މިސްރުގެ ވެރިރަށް ކައިރޯގައި ބޭއްވި މި ބައްދަލުވުމުގައި ދިވެހިރާއްޖެއަށް ކުރު މުއްދަތުގެ ތަމްރީނާއި ސްކޮލާޝިޕްގެ ފުރުސަތުތަކާއި މުދައްރިސުން ހަމަޖައްސަވައިދެއްވާނެ ކަމުގެ ޔަގީންކަން އިމާމު ދެއްވާފައިވާ ކަމަށް ރައީސް އޮފީހުން ވަނީ ބުނެފަ އެވެ.
މި ބައްދަލުކުރެއްވުމުގައި ދެ ބޭފުޅުން ވަނީ ހަރުކަށި ފިކުރާ ދެކޮޅަށް ކުރާ މަސައްކަތާ ބެހޭ ގޮތުންނާއި ދެ ގައުމުގެ މަސްލަހަތު ހިމެނޭ ތަފާތު މައުލޫތައް މަޝްވަރާ ކުރައްވާފަ އެވެ. އަދި، މިސްރާއި އެހެނިހެން ބައިނަލްއަގްވާމީ ގައުމުތަކާ ގުޅިގެން ހަރުކަށި ފިކުރާ ދެކޮޅަށް އެކުގައި މަސައްކަތް ކުރައްވާނެ ކަމަށް އުންމީދު ކުރައްވާ ކަމަށް ވެސް ނައިބު ރައީސް ވިދާޅުވި އެވެ.
މި ބައްދަލުކުރެއްވުމުގައި އިމާމު ރާއްޖެ ވަޑައިގަތުމަށް ނައިބު ރައީސް ދައުވަތު ދެއްވިއިރު، އެ ދައުވަތު އެމަނިކުފާނު ގަބޫލުކުރައްވާފައިވާ ކަމަށް ވެސް ރައީސް އޮފީހުން ބުނެ އެވެ.
ނައިބު ރައީސް މިސްރަށް ކުރައްވާ ދަތުރުފުޅަކީ އެ ގައުމުގެ ޝަރްމުއްޝެއިހްގެ އިންޓަނޭޝަނަލް ކޮންވެންޝަން ސެންޓަރުގައި ކުރިޔަށްދާ އދ.ގެ 2022 ވަނަ އަހަރުގެ ކުލައިމެޓް ޗޭންޖް ކޮންފަރެންސް (ކޮޕް27) ގައި ބައިވެރިވެވަޑައިގަތުމަށް ކުރައްވަމުން ގެންދަވާ ދަތުރުފުޅެކެވެ.
އަޒްހަރަކީ 1980 ގެ އަހަރުތަކުގެ ކުރީކޮޅުން ފެށިގެން ކޮންމެ އަހަރަކުވެސް ދިވެހި ދަރިވަރުންނަށް ދިގު މުއްދަތުގެ ސްކޮލާޝިޕްތައް ދެމުން އަންނަ ޔުނިވާސިޓީއެކެވެ.
