ސިޑްނީ (ނޮވެމްބަރު 9) - ސެމީ ފައިނަލުގައި ނިއު ޒީލެންޑް އަތުން ހަތް ވިކެޓުން މޮޅުވެ، ޕާކިސްތާނުން މިހާރު ކުރިއަށްދާ ޓީ20 ކްރިކެޓް ވޯލްޑް ކަޕްގެ ފައިނަލުގެ ފުރަތަމަ ޖާގަ ހޯދައިފި އެވެ.
މިއީ 2009 ވަނަ އަހަރުގެ ފަހުން ޕާކިސްތާން ކުޅޭ ފުރަތަމަ ފައިނަލެވެ. އެ ފަހަރު ފައިނަލުގައި ޕާކިސްތާން ވަނީ ސްރީ ލަންކާ އަތުން އަށް ވިކެޓުން މޮޅުވެފަ އެވެ. މިއީ، އޭގެ ފަހުން އެ ޓީމުގެ ފުރަތަމަ ފައިނަލެވެ. އަންނަ އާދިއްތަ ދުވަހު ކުޅޭ ފައިނަލުގައި ޕާކިސްތާނާ ދެކޮޅަށް ކުޅޭނީ އިންގްލެންޑާއި އިންޑިއާ ކުޅޭ ސެމީ ފައިނަލް މެޗުން މޮޅުވާ ޓީމެެކެވެ. މީގެ ކުރިން އިންޑިއާ އިން ވަނީ 2007 ވަނަ އަހަރު ޕާކިސްތާން ބަލިކޮށް ވޯލްޑް ކަޕް ތަށި އުފުލާލައިފަ އެވެ.
ޕާކިސްތާނަށް މި ފަހަރުގެ ކްރިކެޓް ވޯލްޑް ކަޕްގެ ސެމީ ފައިނަލުން ފުރުސަތު ލިބުނީ ވެސް އަމިއްލަ ބާރު ގެއްލި މުބާރާތުން ކަޓާނެ ކަމަށް ބެލެވިފައި އޮއްވައި ފަހިވި ފުރުސަތެއްގަ އެވެ. އެއީ ނެދަލެންޑްސް އިން ފަހު މެޗުގައި ދެކުނު އެފްރިކާ ބަލިކުރުމުން ލިބުނު ޖާގައެއްގެ ބޭނުންހިފައިގެންނެވެ. ނެދަލެންޑްސް އިން ދެކުނު އެފްރިކާ ބަލިކުރުމާ އެކު، ފަހު މެޗުގައި ބަންގްލަދޭޝް އަތުން ޕާކިސްތާނުން ހޯދި ފަސް ވިކެޓުން މޮޅުވެ ސެމީ އަށް ދަތުރުކުރީ އެވެ.
ޕާކިސްތާންގެ ސަޕޯޓަރުން މިއަދުގެ މެޗުގެ ތެެރެއިން އުފާފާޅުކުރަނީ.
ސެމީ ފައިނަލުގައި މިއަދު ޓޮސް ދިމާވުމުން ނިއު ޒީލެންޑުން ނިންމީ ކުޅެން އަރާށެވެ. ނިއު ޒީލެންޑުން އިނިންގްސް ނިންމާލީ 20 އޯވަރުގެ ތެރޭގައި ހަތަރު ކުޅުންތެރިން ނުބައިވެގެން 152 ލަނޑު ހަދައިގެންނެވެ. މިއީ އެ ޓީމުން ބޭނުންވި ސްކޯ އަކަށް ވުރެ މަދު އަދަދެކެވެ.
ނިއު ޒީލެންޑް ޓީމަށް އެންމެ ރަނގަޅު ކުޅުމެއް ދެއްކީ ނުބައިނުވެ، 53 ލަނޑު ހެދި ޑަރީލް މިޗެލް އެވެ. ނިއު ޒީލެންޑްގެ ކެޕްޓަން، ކޭން ވިލިއަމްސަން ނުބައިވީ 46 ލަނޑު ހަދާފައިވަނިކޮށެވެ. ވިލިއަމްސަންގެ އިތުރުން ފިން އެލަންގެ ވިކެޓް ނެގީ ޕާކިސްތާންގެ ކުޅަދާނަ އުކުންތެރިޔާ، ޝާހީން އަފްރީދީ އެވެ.
ޖަވާބުގައި ޕާކިސްތާނުން ކުޅެން އަރައި، ފުރަތަމަ ތިން ބެޓްސަމަނުން ވެސް ވަރުގަދަ ރޫހެއްގައި ކުޅެލިއިރު، 19.1 އޯވަރުގެ ތެރޭގައި ތިން ކުޅުންތެރިން ނުބައިވެެގެން 153 ލަނޑު ހަމަކޮށް، ހަތް ވިކެޓުން މެޗު ކާމިޔާބުކުރީ އެވެ.
ޕާކިސްތާންގެ ފުރަތަމަ ދެ ބެޓްސްމަނުން ވެސް ނިންމާލީ ހާފް ސެންޗަރީ ފުރިހަމަކޮށްފަ އެވެ. އެ ގޮތުން ބާބަރު އާޒަމް ވަނީ 53 ލަނޑު އެއްކޮށްފަ އެވެ. އަދި މުހައްމަދު ރިޒްވާން 57 ލަނޑު ހެދި އެވެ. މީގެ އިތުރުން، މުހައްމަދު ހާރިސް ވަނީ 30 ލަނޑު ހަދައިފަ އެވެ.
ނިއު ޒީލެންޑްގެ ކުޅަދާނަ އުކުންތެރިޔާ ޓްރެންޓް ބޯލްޓް ދެ ވިކެޓް ނެގި ނަމަވެސް ޕާކިސްތާން މާ ރަނގަޅު ފޯމެއްގައި ހުރުމުން އެ ޓީމު ހުއްޓުވޭ ގޮތެއްނުވީ އެވެ.
