ޕަވާ-ސްޓިއަރިންގެ މައްސަލައެއް ދިމާވެދާނެތީ 40،000 ކާރު އެމެރިކާގެ މާކެޓުން އަނބުރާ ގެންދަން ޓެސްލާާ ކުންފުނިން ނިންމައިފި އެވެ.
ޓެސްލާއަކީ ބިލިއަނަރު އެލޮން މަސްކްގެ ކަރަންޓު ކާރު އުފައްދާ ކުންފުންޏެވެ. އެ ކުންފުނިން ބުނީ ކާރުތަކުގެ ޕަވާ-ސްޓިއަރިން އެސިސްޓް ސިސްޓަމް ފެއިލްވުމުގެ ފުރުސަތު އެބަ އޮތް ކަމަށެވެ.
މާކެޓުން 40،000 ކާރު އަނބުރާ ނަގަން ޓެސްލާއިން ނިންމި އިރު، މައްސަލަ ދިމާވާ ސިސްޓަމް ރީކެލިބްރޭޓް ކުރުމަށް މުޅިން އާ ސޮފްޓްވެއާ އަޕްޑޭޓެއް ކުންފުނިން ވަނީ ނެރިފަ އެވެ.
ޓެސްލާއިން ބުނީ ކާރަކަށް އެ މައްސަލަ ދިމާވެ އެއްވެސް އެކްސިޑެންޓެއް ހިނގައި، މީހަކު މަރުވެ ނުވަތަ އަނިޔާވިކަމުގެ އެއްވެސް ރިޕޯޓެއް މިހާތަނަށް ލިބިފައި ނުވާ ކަމަށެވެ.
މާކެޓުން އަނބުރާ ނަގަން ނިންމޯ 2012-21 މޮޑެލް އެސް އަދި މޮޑެލް އެކްސް އުޅަނދުތަކެވެ.
ރިޕޯޓުތައް ބުނާ ގޮތުން މި އަހަރުގެ ތެރޭގައި ޓެސްލާއިން މާކެޓުން ކާރުތައް އަނބުރާ ނެގުމަށް 17 ފަހަރެއްގެ މަތިން ނިންމާފައިވެ އެވެ. އެއީ 3.4 މިލިއަން އުޅަނދެވެ.
މިދިޔަ ސެޕްޓެމްބަރު މަހު އެ ކުންފުނިން 1.1 މިލިއަން ކާރު އެމެރިކާގެ މާކެޓުން ނެގީ ކާރުގެ ކުޑަދޮރު މާ އަވަހަށް ލެއްޕުމުގެ މައްސަލަ ދިމާވެދާނެތީ އެވެ.
