މިހާރު ކުރިއަށްދާ 28 ވަނަ އެމްބީއޭ ޗެމްޕިއަންޝިޕުގައި އަންހެން ޑިވިޝަންގައި ކުޅުނު ފުރަތަމަ މެޗުތައް ކުއީންސް ބީސީ އާއި އެލީޓް ސްޕޯޓްސް ކުލަބުން ކާމިޔާބުކޮށްފި އެވެ.
މި އަހަރުގެ މުބާރާތުގެ އަންހެން ޑިވިޝަންގައި ވާދަކުރަނީ ހަ ޓީމެވެ. އެއީ ކުއީންސް، އެލީޓް، ބެންޗް ސްޕޯޓްސް ކުލަބު، ރައިޒިން ބާސްކެޓްބޯޅަ އެކަޑެމީ އަދި ލަޔަނެސް އެވެ. މި ހަ ޓީމް ދެ ގްރޫޕަކަށް ބަހާލާފައިވާއިރު ދެ ވަނަ ބުރުން ފުރުސަތު ލިބޭނީ ކޮންމެ ގްރޫޕެއްގެ ގަދަ ދެ ޓީމާއި، ތިން ވަނަ އަށް ދާ ދެ ޓީމް ކުޅޭ ޕްލޭއޮފް މެޗުން މޮޅުވާ ޓީމާ އެކު ޖުމްލަ ފަސް ޓީމަކަށެވެ.
އަންހެން ޑިވިޝަންގެ ފުރަތަމަ މެޗުގައި ބެންޗާއި ވާދަކޮށް އެލީޓުން މެޗު ކާމިޔާބުކުރީ 96-13 ޕޮއިންޓުންނެވެ. މެޗުގެ ފުރަތަމަ ކުއާޓާގައި އެލީޓަށް ސްކޯއެއް ނުކުރެވުނުއިރު، އެލީޓު ފެނުނީ މާ ވަރުގަދަކޮށެވެ.
ވަކި ވަކި ކުޅުންތެރިންގެ ކުޅުމަށް ބަލާއިރު، މެޗުގެ މޮޅު ކުޅުންތެރިޔާގެ މަގާމް ހޯދި އެލީޓުގެ ކެޕްޓަން އައިޝަތު އިނާޝާ އެޓީމަށް 15 ޕޮއިންޓް އެއްކޮށްދިނެވެ. މަރިޔަމް ކައިލީން ޝިރުހާންވެސް 15 ޕޮއިންޓް ސްކޯކުރިއިރު، ލީމް އަލީ ޝާހިދު ވަނީ 14 ޕޮއިންޓް އެއްކޮށްދީފަ އެވެ.
އެމްބީއޭ ޗެމްޕިއަންޝިޕްގައި ބެންޗާއި އެލީޓް ކުޅުނު މެޗުގެ ތެރެއިން.--- ފޮޓޯ: އަބްދުﷲ އިޔާން/ އަދަދު
ކުއީންސް ބީސީ އާއި ސައިކްލޯންގެ ކުރިމަތިލުން ކުއީންސް ކާމިޔާބުކުރީ 69-45 އިންނެވެ. މެޗުގެ ފުރަތަމަ ކުއާޓާގައި ވާދަވެރި ކުޅުމެއް ފެނުނުއިރު، މި ކުއާޓާގައި ލީޑު ކުރީ ސައިކްލޯނުންނެވެ. މިގޮތުން މި ކުއާޓާ ނިމުނުއިރު 13-12 އިން ސައިލްކޯން އޮތީ ކުރީގަ އެވެ. ދެވަނަ ކުއާޓާގައި ނުކުމެ ކުއީންސް އިން ލީޑު ނެގި އެވެ.
މެޗުގެ އޮއިވަރު އެއްކޮށް ބަދަލުވީ ތިން ވަނަ ކުއާޓާގަ އެވެ. ރައިފާ އިބްރާހިމް އާއި، އިސްރާއު އަބްދުއްޝުކޫރުގެ މޮޅު ކުޅުމާ އެކު ކުއީންސް އިން ލީޑު ފުޅާކޮށް ދެމި ގަތެވެ. ފަހު ކުއާޓާގައި ކުއީންސްގެ މައްޗަށް ސައިކްލޯނުން އަށް ޕޮއިންޓުން ކުރި ހޯދި ނަމަވެސް ބޮޑު ލީޑެއް އޮތުމާ އެކު އެ ޓީމުން މި ކުއާޓާ ނިންމާލީ ޕްރެޝަރެއް ނެތި އެވެ.
މެޗުގެ މޮޅު ކުޅުންތެރިޔާގެ މަގާމް ހޯދި އިސްރާއު, ކުއީންސް އަށް 28 ޕޮއިންޓް ސްކޯކޮށްދިންއިރު، ރައިފާ ވަނީ 21 ޕޮއިންޓް އެއްކޮށްދީފަ އެވެ. މުޅި މެޗަށް ބަލާއިރު މި ދެ ކުޅުންތެރިންގެ ޑޮމިނޭޝަން ވަރަށް ބޮޑަށް ފެނުނެވެ.
ސައިކްލޯން އަށް ބަލާއިރު، ފާތިމަތު ޝައިލާން އަފްޒަލް 19 ޕޮއިންޓް އެއްކޮށްދިނެވެ. އައިޝަތު ޒާނާ 13 ޕޮއިންޓް ހޯދައިދިންއިރު، ތަޖުރިބާކާރު ކުޅުންތެރިޔާ ޝިޒްނާ ރަޝީދު 10 ޕޮއިންޓް ހޯދައިދިނެވެ.
މުބާރާތުގައި މިއަދު ތިން މެޗެއް ކުޅޭނެ އެވެ. ފިރިހެން ޑިވިޝަންގައި ހަވީރު ކުޅޭ މެޗުގައި ވާދަކުރާނީ ދަ ބައުސް އާއި ހުޅުމާލެ ސްޕޯޓްސް ކުލަބެވެ. އޭގެ ފަހުން ކިންގްސް ބީސީ ނުކުންނާނީ ރޯޔަލްސް ބީސީ އާ ދެކޮޅަށެވެ. މާދަމާގެ ފަހު މެޗުގައި ޓީރެކްސް ނުކުންނާނީ ޔޫއެން ފްރެންޑްސްއާ ދެކޮޅަށެވެ.
