އެމެރިކާގެ ދައުރު މެދުތެރެއިން ބާއްވާ އިންތިހާބުގައި އިދިކޮޅު ރިޕަބްލިކަން ޕާޓީގެ ކެންޑިޑޭޓުންނަށް ވޯޓު ދިނުމަށް ބިލިއަނަރު އެލޮން މަސްކް ގޮވާލައިފި އެވެ.
މަސްކް ކުރި ޓްވީޓެއްގައި ބުނީ ދައުލަތުގެ ހުރިހާ ބާރުތައް އެއް ޕާޓީއަކަށް ލިބުމަކީ ގެއްލުން ބޮޑު ގޮތެއް ކަމަށާއި އެހެންވެ ކޮންގްރެސްގައި ގިނަ ވާން ޖެހޭނީ ރިޕަބްލިކަން ޕާޓީގެ މެމްބަރުން ކަމަށެވެ.
ދާދި ފަހުން މަސްކް ވަނީ 44 ބިލިއަން ޑޮލަރަށް ޓްވިޓާ ގަނެފަ އެވެ. ރިޕަބްލިކަން ޕާޓީއަށް ނިސްބަަތްވާ އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ އެކައުންޓަށް އަލުން ހުއްދަ ދޭނެކަމުގެ އިޝާރާތެއް އޭނާ ދިނެވެ.
އެހެން ނަމަވެސް އިންތިހާބުގެ ކުރިން ޓްރަމްޕްގެ އެކައުންޓް އަަލުން އެކްޓިވޭޓް ވާނެ ކަމަށް ނުބެލެވެ އެވެ. ޓްރަމްޕް ޓްވިޓާއިން ސަސްޕެންޑް ކުރީ ދޮގު ހަަބަަރު ފަތުރައި، ހަމަނުޖެހުމަށް ހިތްވަރުދޭ ކަމަށް ބުނެ އެވެ.
ދައުރުގެ މެދުތެރެއިން އޮންނަ އިންތިހާބުގެ ކެމްޕެއިން ކުރިއަށް ދާއިރު ޓްރަމްޕް ގެންދަވަނީ ރިޕަބްލިކަން ޕާޓީގެ ކެންޑިޑޭޓުންނަށް ކެމްޕެއިންކޮށްދެއްވަމުންނެވެ.
ރައީސް ޖޯ ބައިޑެން ވެސް އެމެރިކާގެ އެކި ސްޓޭޓްތަކަށް ވަޑައިގެން، ޑިމޮކްރެޓިކް ޕާޓީގެ ކެންޑިޑޭޓުންގެ ކެމްޕެއިންގައި ދަނީ ބައިވެރިވެވަޑައިގަންނަވަމުންނެވެ.
"މިޑްޓާމް" ނުވަތަ ދައުރުގެ މެދުތެރެއިން އޮންނަ އިންތިހާބުގައި ރައްޔިތުން ނިންމާނީ ކޮންގްރެސްގެ ބާރު ދެމިއޮންނާނެ ގޮތާއި ސްޓޭޓުތަކުގެ ގަވަރުނަރުން ހޮވާނެ ގޮތެވެ.
އެ އިންތިހާބަކީ ކުރިއަށް އޮތް ރިޔާސީ އިންތިހާބަށް ތައްޔާރުވާ އިރު، ސިޔާސީ މައިދާން ބައްޓަން ކުރުމަށް މުހިއްމު އިންތިހާބެކެވެ. އެހެންކަމުން ދެ ޕާޓީއިން ވެސް ދަނީ ވަރުގަދައަށް ކެމްޕެއިން ކުރަމުންނެވެ.
