ކުރީގެ ރައީސް އަބްދުﷲ ޔާމީންގެ ވެރިކަމުގައި އެ މަނިކުފާނު ހައްޔަރުކުރަން ކޯޓު އަމުރެއް ނެރެން އުޅުނު ކަމަށް ބުނާ މައްސަލައިގައި ހަ އަހަރު ފަހުން، އދ. މާމިގިލީ ކޯޓުގެ އިސް މެޖިސްޓްރޭޓް އަހުމަދު ނިހާނާ މެދު ސުލޫކީ ފިޔަވަޅު އަޅަން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.
ޖޭއެސްސީން ބުނީ ފުލުހުންގެ ބަޔަކު އާންމު މީހަކު ގޮވައިގެން މާމިގިލީ ކޯޓަށް ގޮސް ކޯޓު އަމުރެއް ހޯދަން މަސައްކަތް ކުރިއިރު އާންމު މީހާއަށް އެ އަމުރާ ބެހޭ ގޮތުން ވާހަކަ ދެއްކުމުގެ ފުރުސަތު ދީފައިވާކަން އެ ކޮމިޝަނަށް ސާބިތުވާ ކަމަށެވެ.
އެހެންވެ، އޭނާއާ މެދު އެޅުމަށް ނިންމި ފިޔަވަޅަކީ، ކޮމިޝަނުން ކަނޑައަޅާ ތަމްރީން ޕްރޮގްރާމެއް ފުރިހަމަ ކުރަން ޖެހުމެވެ.
މެޖިސްޓްރޭޓު ނިހާނާމެދު ފިޔަވަޅު އެޅީ ޔާމީން ހައްޔަރު ކުރަން އަމުރު ނެރެދޭން އުޅުނު މައްސަލައާ ގުޅިގެން ކަމެއް ޖޭއެސްސީން ރަސްމީކޮށް ހާމައެއް ނުކުރެ އެވެ. ނަމަވެސް "އަދަދު" ނޫހަށް އެނގިފައިވާ ގޮތުގައި ނިހާނާމެދު ފިޔަވަޅު އެޅީ، ކުރީގެ ކޮމިޝަނުން ބަލަން ފަށާފައި އޮތް އެ މައްސަލައިގަ އެވެ. އެ ކޮމިޝަނުން އޮތީ ފިޔަވަޅު ނާޅައި މައްސަލަ ބާއްވައިފަ އެވެ.
މާމިގިލީ ކޯޓުން އަމުރެއް ނެރެ ޔާމީން ހައްޔަރުކުރަން އުޅުނު ކަމަށް ބުނެ މެޖިސްޓްރޭޓް ނިހާނާއި ކުރީގެ ޕްރޮސެކިއުޓާ ޖެނެރަލް މުހުތާޒް މުހުސިންގެ މައްޗަށް ޓެރަރިޒަމްގެ ދައުވާ، ޔާމީންގެ ވެރިކަމުގައި އުފުލި އެވެ. އަދި އެ ދެ މީހުން 17 އަހަރަށް ޖަލަށް ލުމަށް 2016 ވަނަ އަހަރު އޭރު ހުކުމް ވެސް ކުރި އެވެ.
ޔާމީން ހައްޔަރުކުރަން ކޯޓު އަމަރު ހޯދަން ފުލުހުންގެ ބަޔަކާއެކު މާމިގިލީ ކޯޓަށް ލޯންޗުގައި ދިޔައީ މުހުތާޒު އެވެ.
މުހުތާޒު އާއި ނިހާނުގެ މައްޗަށް އިއްވި ހުކުމް، ނިމިގެން ދިޔަ ރިޔާސީ އިންތިހާބަށް ފަހު، ހައި ކޯޓުން ބާތިލު ކުރުމުން އެ ދެ މީހުން މިނިވަންވި އެވެ.
