ޓްވިޓާއިން މުވައްޒަފުން ވަކިކުރަަނީ އިތުރު "ގޮތެއް ނެތިގެން" ކަމަށާއި ކުންފުންޏަށް ކޮންމެ ދުވަހަކު ވެސް ހަތަރު މިލިއަން ޑޮލަރުގެ ގެއްލުން ލިބެމުންދާ ކަމަށް ކުންފުނީގެ އާ ވެރިޔާ އެލޮން މަސްކް ބުނެފި އެވެ.
މީގެ ހަފުތާއެއް ކުރިން މަސްކް ޓްވިޓާ ގަތީ 44 ބިލިއަން ޑޮލަރަށެވެ. އޭނާ ނިންމާފައި ވަނީ ކުންފުނީގެ 50 ޕަސެންޓު މުވައްޒަފުން ވަޒީފާއިން ވަކިކުރުމަށެވެ.
ޓްވިޓާގެ ކޮންޓެންޓަށް ބޮޑު ބަދަަލުތަކެއް ގެނައުމުގެ ފުރުސަތު އެބަ އޮތް ކަމަށް އެކި ފަރާތްތަކުން ބުނު ނަމަވެސް، މަސްކް ބުނީ ސިޔާސަތު ބަދަލު ނުކުރާ ކަމަށެވެ.
ކޮންޓެންޓް މޮޑަަރޭޓް ކުރުމުގެ ވަޒީފާގައި ތިބި ގިނަ ބަޔަކު ވަކިކޮށްފައި ވާތީ، ކުރިއަށް އޮތް ތަނުގައި ޓްވިޓާގައި ކޮންޓެންޓް މޮޑަރޭޓް ކުރުމުގެ ސިޔާސަތު ބަދަލުވާނެ ކަމަށް ބަޔެއް ފަރާތްތަކުން ބުނެ އެވެ.
އޭގެ އިތުރުން އެމެރިކާގެ ކުރީގެ ރައީސް ޑޮނަލްޑް ޓްރަމްޕް ފަދަ ބޭފުޅުން އެނބުރި ޓްވިޓާއަށް އައުން އެކަށީގެންވާ ކަމަށް ވެސް ތަޖުރިބާކާރުން ބުނެ އެވެ.
ހުކުރު ދުވަހު މަސްކް ބުނީ ޓްވިޓާގެ "އާމްދަނީ ބޮޑުތަނުން ވެއްޓުނީ" އެމެރިކާގައި "ހިޔާލު ފާޅުކުރުމުގެ މިނިވަންކަމާ ދެކޮޅަށް" އުޅޭ އެކްޓިވިސްޓު ގްރޫޕުތަކުގެ ސަބަބުން ކަމަށެވެ.
ޓްވިޓާގެ ސޭފްޓީ އެންޑް އިންޓެގްރިޓީ ޑިޕާޓްމަންޓުގެ ވެރިޔާ ޔޮއެލް ރޮތު ބުނީ ކޮންޓެންޓް މޮޑަރޭޓް ކުރުމުގައި އުޅޭ 2،000 މީހުންގެ ތެރެއިން ގިނަ މީހުންގެ ވަޒީފާ ނުގެއްލޭ ކަމަށެވެ.
ޓްވިޓާގައި 7،500 މުވައްޒަފުން އުޅޭ އިރު، 50 ޕަސެންޓު މީހުންގެ ވަޒީފާ ގެއްލޭނެ އެވެ. އެ ނިންމުމުގެ އަސަރު ކުރަނީ ކޮންޓެންޓް މޮޑަރޭޓް ކުރުމުގައި އުޅޭ 15 ޕަސެންޓު މުވައްޒަފުންނަށެވެ.
ޓްވިޓާއަށް އަންނަމުންދާ ބަދަލުތަކާ ގުޅޭ ގޮތުން އެމެރިކާގެ ރައީސް ޖޯ ބައިޑެން ހުކުރު ދުވަހު ކަންބޮޑުވުން ފާާޅުކުރެއްވި އެވެ. އެމަނިކުފާނު ވިދާޅުވީ ނަފުރަަތު އުފެދޭ ފަދަ ވާހަކަތައް ފެތުރުމުގެ ފުރުސަތު އޮވެގެން ނުވާނެ ކަމަށެވެ.
ވޮލްކްސްވެގަން، ޖެނެރަލް މޮޓޯޒް އަދި ފައިޒާ ފަދަ ބައެއް ބޮޑެތި ކުންފުނިތަކުން ވަނީ ޓްވިޓާގައި އިޝްތިހާރު ކުރުން މެދުކަނޑާލައިފަ އެވެ.
މި ވަގުތު ޓްވިޓާގެ އާމްދަނީ ބިނާވަނީ އިޝްތިހާރުގެ މައްޗަށެވެ. މަސްކް ބޭނުން ވަނީ އެކަން ބަދަލުކޮށް، އިތުރު ގޮތްތަކަށް އާމްދަނީ އިތުރު ކުރުމަށެވެ.
