ލިވަޕޫލް (ނޮވެމްބަރު 5) - އިނގިރޭސި ޕްރިމިއާ ލީގުގައި މެންޗެސްޓާ ސިޓީ އަތުން ލިވަޕޫލް މޮޅުވި މެޗުގައި އެ ޓީމުގެ ކޯޗު ޔާގެން ކްލޮޕް އަށް ދެއްކި ރަތް ކާާޑާ އެކު އޭނާގެ މައްސަލަ ބަަލައި، 38000 ޑޮލަރުން ޖޫރިމަނާކުރަން ތިން މެމްބަރުންގެ ޕެނަލުން ނިންމި ނިންމުމާ ދެކޮޅަށް އިނގިރޭސި އެފްއޭ އިން އެޕީލްކޮށްފި އެވެ.
ސިޓީ އަތުން މިދިޔަ މަހު 16 ވަނަ ދުވަހުގެރޭ ލިވަޕޫލް 1-0 އިން މޮޅުވި މެޗުގެ ފަހު ވަގުތު ލިވަޕޫލްގެ މުހައްމަދު ސަލާހަށް ސިޓީގެ ބެނާޑޯ ސިލްވާ ފައުލުކުރި ނަމަވެސް ރެފްރީ އެ ފައުލެއްގެ ގޮތުގައި ނުދައްކާތީ ކްލޮޕް ވަރަށް ބޮޑަށް ހިތްހަމަނުޖެހުން ފާޅުކުރި އެވެ. އެކަމާ މެޗުގެ ރެފްރީ އެންތަނީ ޓޭލާއާ ބޭއަދަބީކޮށް މުހާތަބުކުރުމުން ކްލޮޕަށް ރަތް ކާޑު ދެއްކި އެވެ.
އިނގިރޭސި އެފްއޭގެ ޕެނަލުން އެ މައްސަލަ ބަލަން ފަށައި، ޖަވާބުދާރީވާން ދިން ފުރުސަތުގައި ކްލޮޕް ވަނީ އެޕީލްކުރަން ދެކޮޅު ހަދައި، އޭނާ އަށް ދެއްކި ރަތް ކާޑަކީ ވެސް ރަނގަޅު ނިންމުމެއް ކަމަށް ބުނެ، ކަންކަން ދިޔަ ގޮތަށް މައާފަށް އެދިފަ އެވެ. އެހެންވެ، މައްސަލަ ބެލުމަށް ފަހު އިނގިރޭސި އެފްއޭގެ ޕެނަލުން ނިންމީ ކްލޮޕަށް ސަސްޕެންޝަނެއް ދިނުމުގެ ބަދަލުގައި 38000 ޑޮލަރުން ޖޫރިމަނާ ކުރާށެވެ.
ތިން މެމްބަރުންގެ ޕެނަލުން މައްސަލަ ނިންމި ގޮތާ ދެކޮޅަށް އެޕީލްކުރަން އެފްއޭ އިން ނިންމީ މައްސަލަ ނިންމި ގޮތުގެ ރިޕޯޓަށް ބެލުމަށް ފަހު އެވެ.
އެފްއޭ އިން އެޕީލްކުރާނެކަން އިއުލާނުކޮށް ނެރުނު ރިޕޯޓްގައި ބުނެފައިވަނީ ކްލޮޕްގެ މައްސަލައިގައި ބަލަންޖެހޭ ހުރިހާ ކަމަކަށް ރިއާޔަތްކުރުމެއް ނެތި ޕެނަލުން ގޮތް ނިންމާފައިވާތީ، އެކަންކަން އަލުން ބަލަން ހުށަހަޅަން އެފްއޭ އިން ނިންމީ ކަމަށެވެ.
ޕެނަލުން ދެން މައްސަލައިގައި ގޮތެއް ނިންމާއިރު، ކްލޮޕަށް ބެންޗަށް ނާދެވޭ ގޮތަށް ސަސްޕެންޝަނެއް އައުމުގެ ފުރުސަތު ބޮޑެވެ. އެއީ ރެފްރީސް އެސޯސިއޭޝަނުން ވެސް ކްލޮޕަށް ދިން އަދަބާ މެދު ހިތްހަމަނުޖެހުން ފާޅުކޮށްފައިވާތީ އެވެ.
މިދިޔަ އަހަރުގެ ފެބްރުއަރީ މަހު ވެސް އިނގިރޭސި އެފްއޭ އިން ވަނީ ކްލޮޕް 51000 ޑޮލަރުން ޖޫރިމަނާކޮށްފަ އެވެ. އެ ފަހަރު ކްލޮޕް ޖޫރިމަނާކުރީ ލިވަޕޫލާއި ވެސްޓް ހޭމް 1-1 އިން އެއްވަރުވި މެޗުގައި އެ މެޗުގެ ރެފްރީ ކެވިން ފްރެންޑްގެ ނިންމުންތައް ހުރީ އެއް ފަރާތަކަށް ޖެހިފައި ކަމަށް ބުނެ، ރެފްރީއާ މެދު ފާޑުކިޔާފައިވާތީ އެވެ.
