އަޑެލެއިޑް، އޮސްޓްރޭލިއާ (ނޮވެމްބަރު 5) - ޓީ20 ކްރިކެޓް ވޯލްޑް ކަޕްގައި މިއަދު ކުޅުނު މެޗުތަކުން ނިއު ޒީލެންޑުން 35 ލަނޑުން އަޔަލެންޑް ބަލިކޮށްފައި ވަނިކޮށް، ފަހުން ކުޅުނު މެޗުގައި އޮސްޓްރޭލިއާ އަށް އަފްގާނިސްތާންގެ މައްޗަށް ކުރިހޯދުނީ ހަތަރު ލަނޑުން ކަމަށްވާތީ ނިއު ޒީލެންޑަށް ސެމީގެ ޖާގަ ޔަގީންވެއްޖެ އެވެ.
ސުޕަ 12 (ގަދަ 12) ގައުމު ވާދަކުރާ ބުުރުގެ ފުރަތަމަ ގްރޫޕުން ސެމީގެ އެއް ޖާގަ ނިއު ޒީލެންޑުން ޔަގީންކުރުމާ އެކު ދެން އޮތް ޖާގަ އަށް ވާދަކުރަނީ އޮސްޓްރޭލިއާ އާއި އިންގްލެންޑުންނެވެ. މި ގްރޫޕްގައި ދެން އޮތް އޭޝިއާގެ ޗެމްޕިއަން، ސްރީ ލަންކާ، އަޔަލެންޑް އަދި އަފްގާނިސްތާން ވަނީ ކަޓައިފަ އެވެ.
އެއް ވަނައިގައި އޮތް ނިއު ޒީލެންޑާއި ދެ ވަނައިގައި އޮތް އޮސްޓްރޭލިއާ އަށް ހަތް ޕޮއިންޓް ލިބިފައިވާއިރު، ތިން ވަނައިގައި އިންގްލެންޑް އޮތީ ފަސް ޕޮއިންޓާ އެކު އެވެ. ހަތަރެއްގައި އޮތް ލަންކާ އަށް ހަތަރު ޕޮއިންޓް ލިބިފައިވާއިރު، ފަސް ވަނައިގައި އޮތް އަޔަލެންޑަށް ލިބިފައިވަނީ ތިން ޕޮއިންޓެވެ. އެންމެ ފުލުން ނިންމާލި އަފްގާނިސްތާނަށް ވަނީ ދެ ޕޮއިންޓް ލިބިފަ އެވެ.
ސެމީގެ ޖާގަ އޮސްޓްރޭލިއާ އަށް ލިބެން އޮތީ މާދަމާ ލަންކާ އަތުން އިންގްލެންޑަށް މޮޅުނުވެވިއްޖެނަމަ އެވެ. އިންގްލެންޑުން ލަންކާ ބަލިކޮށްގެން ސެމީ އަށް ދެވޭނެ އެވެ.
އަޑެލެއިޑް އޯވަލް ސްޓޭޑިއަމްގައި ކުޅުނު މެޗުގައި އަޔަލެންޑުން ޓޮސް ދިމާވުމުން ނިންމީ ފީލްޑް ކުރުމަށެވެ. ނިއު ޒީލެންޑުން ކުޅެން އަރައި، 20 އޯވަރުގެ ތެރޭގައި ހަ ކުޅުންތެރިން ނުބައިވެގެން 185 ލަނޑު ހެދި އެވެ. އެ ޓީމުން އެންމެ ރަނގަޅު ކުޅުމެއް ދެއްކީ، 35 ބޯޅައިން 61 ލަނޑު ހެދި ޓީމުގެ ކެޕްޓަން، ކޭން ވިލިއަމްސަން އެވެ. ނުބައިނުވެ ޑަރީލް މިޗެލް ވެސް މި މެޗުގައި ރަނގަޅަށް ކުޅުނެވެ. އޭނާ ވަނީ 21 ބޯޅައިން 31 ލަނޑު ހަދައިފަ އެވެ.
ޖަވާބުގައި އަޔަލެންޑުން ކުޅެން އަރައި، 20 އޯވަރުގެ ތެރޭގައި ނުވަ ކުޅުންތެރިން ނުބައިވެެގެން ހެދުނީ 150 ލަނޑެވެ.
މި އިނިންގްސްގައި އަޔަލެންޑުން އެންމެ ރަނގަޅު ކުުޅުމެއް ދެއްކީ 27 ބޯޅައިން 37 ލަނޑު ހެދި ޕޯލް ސްޓާލިން އެވެ. އަޔަލެންޑްގެ ކެޕްޓަން، އެންޑްރޫ ބަލްބާނީ ވަނީ 25 ބޯޅައިން 30 ލަނޑު ހަދައިފަ އެވެ. ނިއު ޒީލެންޑްގެ ލޯކީ ފާގަސަން ވަނީ ތިން ވިކެޓް ނަގައިފަ އެވެ.
މުބާރާތުގައި މާދަމާ އޮތީ ލަންކާ އާއި އިންގްލެންޑް ބައްދަލުކުރާ މެޗެވެ.
