ޓްރަމްޕް އަލުން ރައީސް ކަމަށް ވާދަކުރައްވާނެކަމުގެ އިޝާރާތެއް

އެމެރިކާގެ ކުރީގެ ރައީސް ޑޮނަލްޑް ޓްރަމްޕް އަލުން ރައީސް ކަމަށް ވާދަކުރައްވާނެކަމުގެ ވަރުގަދަ އިޝާރާތެއް ދެއްވައިފި އެވެ.

އަޔޯވާގެ ކެމްޕެއިން އެއްވުމެއްގައި ޓްރަމްޕް ވިދާޅުވީ 2024 ވަނަ އަހަރު "އަލުން ވާދަކުރުމުގެ ފުރުސަތު ވަރަށް، ވަރަށް، ވަރަށް ބޮޑު" ކަމަށެވެ. އެމެރިކާގެ ނޫސްތަކުން ރިޕޯޓު ކުރި ގޮތުގައި ޓްރަމްޕްގެ ނިންމެވުން ރަސްމީކޮށް އިއުލާން ކުރާނީ ނޮވެމްބަރު 14 ގަ އެވެ.

އެމެރިކާގައި މިހާރު ކުރިއަށް ދަނީ ދައުރުގެ މެދުތެރެއިން އޮންނަ އިންތިހާބުގެ ކެމްޕެއިނެވެ. ޓްރަމްޕް ގެންދަވަނީ ރިޕަބްލިކަން ޕާޓީގެ ކެންޑިޑޭޓުންނަށް ކެމްޕެއިންކޮށްދެއްވަމުންނެވެ.

ރައީސް ޖޯ ބައިޑެން ވެސް އެމެރިކާގެ އެކި ސްޓޭޓްތަކަށް ވަޑައިގެން، ޑިމޮކްރެޓިކް ޕާޓީގެ ކެންޑިޑޭޓުންގެ ކެމްޕެއިންގައި ދަނީ ބައިވެރިވެވަޑައިގަންނަވަމުންނެވެ.

"މިޑްޓާމް" ނުވަތަ ދައުރުގެ މެދުތެރެއިން އޮންނަ އިންތިހާބުގައި ރައްޔިތުން ނިންމާނީ ކޮންގްރެސްގެ ބާރު ދެމިއޮންނާނެ ގޮތާއި ސްޓޭޓުތަކުގެ ގަވަރުނަރުން ހޮވާނެ ގޮތެވެ.

އެ އިންތިހާބަކީ ކުރިއަށް އޮތް ރިޔާސީ އިންތިހާބަށް ތައްޔާރުވާ އިރު، ސިޔާސީ މައިދާން ބައްޓަން ކުރުމަށް މުހިއްމު އިންތިހާބެކެވެ. އެހެންކަމުން ދެ ޕާޓީއިން ވެސް ދަނީ ވަރުގަދައަށް ކެމްޕެއިން ކުރަމުންނެވެ.

ރިޔާސީ އިންތިހާބުގައި އަލުން ވާދަކުރައްވާނެކަމުގެ އިޝާރާތެއް ޓްރަމްޕް ދެއްވި އިރު، ރިޕަބްލިކަން ޕާޓީގެ ތެރެއިން އެމަނިކުފާނަށް ގޮންޖެހުންތައް އޮންނާނެ އެވެ.

ޕާޓީގެ ތެރެއިން ޓްރަމްޕްއާ ވާދަކުރައްވާނެ ކަމަށް ބެލެވެނީ ކުރީގެ ނައިބު ރައީސް މައިކް ޕެންސް އަދި ފްލޮރިޑާގެ ގަވަރުނަރު ރޮން ޑެ ސަންޓިސް އެވެ.

ޓްރަމްޕް ވެރިކަމަށް ވަޑައިގެންނެވީ 2016 ވަނަ އަހަރު އެވެ. އެކަމަކު 2020 ވަނަ އަހަރު ދެ ވަނަ ދައުރަކަށް ވާދަކުރައްވައި ކާމިޔާބެއް ނުވި އެވެ.